Tiko Voli mai na Lekutu 13 - Vakavakadewa Vou kei na iVola tale eso（FNVDC12）

Talaki i Kenani o Ira na Yamata Vuni(Vrua 1.19-33)

1A sa tukuna vei Mosese o Jiova,

2“Mo digitaka e dua na turaga i liuliu mai vei ira yadudua na mataqali e tinikarua, ka talai ira yani me ra yamata, me ra la'ki vakaraica mai na vanua o Kenani, o koya ka'u sa solia tiko vei ira na Isireli.”

3A sa talai ira yani mai na vanua lala o Perana o Mosese, me vaka na i vakaro i Jiova. O ira kecega na talai oqo, era sai liuliu digitaki vei ira na Isireli.

4Oqo na yacadra:

Mai na mataqali Rupeni, o Samua na luve i Sakuri;

5mai na mataqali Simione o Safati na luve i Ori;

6mai na mataqali Juta, o Kelevi na luve i Jifune;

7mai na mataqali Isakari, o Ikiali na luve i Iosefo;

8mai na mataqali Ifereimi, o Osea na luve i Nuni;

9mai na mataqali Penijamini, o Piliti na luve i Rafu;

10mai na mataqali Sevuloni, o Katieli na luve i Soti;

11mai na mataqali Iosefo, (o ya na mataqali Manasa), o Kati na luve i Susi;

12mai na mataqali Tani, o Amieli na luve i Kimali;

13mai na mataqali Aseri, o Sicuri na luve i Maikeli;

14mai na mataqali Navitalai, o Napi na luve i Vofisi;

15mai na mataqali Kata, o Queli na luve i Maki.

16Oqo na yacadra na tamata ka talai ira o Mosese me ra la'ki yamata ka butu vanua. Sa qai veisautaka o Mosese na yaca i Osea na luve i Nuni me yacana o Josua.

17A sa talai ira yani o Mosese me ra la'ki vakaraica ka butuka na vanua o Kenani, ka sa kaya vei ira, “Mo ni muria cake yani na vualiku mo ni donuya kina na ceva ni vanua o Kenani, ka cabe ki na kena veidelana.

18Dou vakadikeva mada se e mataqali vanua vakacava, ka vica na tamata era tiko kina, ka vakaevei na nodra kaukauwa.

19Dou vakadikeva mada se vakaevei tu na vanua era tiko kina, e vanua vinaka se ca, ka vakacava na veikoro era tiko kina, era tiko ga e nodra veivalelaca se koro vakabai.

20Dou vakadikeva mada na nodra qele, e qele vinaka se qele ca; e tubu kina na kau se sega. Mo ni yaloqaqa ka loma dei, ka mo ni kauta talega mai eso na vuata ni vanua o ya.” (Na vula o ya sa donuya na gauna era dau dreu kina na qerepi.)

21Era sa lako cake ka vakadikeva na vanua me vakatekivu mai na vanua lala o Sini ka yacovi Riopi, me voleka ki na i curucuru ki Emaci ena vualiku.

22Era sa curuma yani na ceva ni vanua ka yaco ki Epironi, ka ra tiko kina na kawa i Anaki o ya o Eimani, o Sesei, kei Talimei. (Sa vitu na yabaki na kena duri tu na vanua o Epironi ni bera ni qai tara na vanua o Soani mai Ijipita).

23Ni ra sa yaco ki na Buca o Esikoli, era sa taya mai kea e dua na taba ni vaini ka koto kina e dua na i soso qerepi, ka rau colata ena i vua e rau lewe rua baleta ni sa rui bibi vakalevu; ka ra kauta talega eso na vuanilolo kei na pomekaraneti.

24(Sa vakatokai na yasana o ya na Buca o Esikoli ena vuku ni soso qerepi ka ra taya mai kea na Isireli.)

25Ia ni sa oti e vasagavulu na siga ni vakadidike, era sa lesu tale mai na turaga era a talai me ra rai vanua.

26Era sa qai lako yani vei rau o Mosese kei Eroni, kei ira kecega na lewenivanua taucoko ni Isireli e Katesi ena vanua lala mai Perana; ka tukutuku vei rau, kei ira kece talega na lewenivanua, ka vakaraitaka vei ira na vuata ni vanua.

27Era sa tukuna vei Mosese, “Keimami sa vakadikeva oti mai na vanua o ni sa talai keimami kina; ka sa dave dina kina na wai ni sucu kei na oni, ka sai koya oqo eso na kena vuata.

28Ia, o ira ga na tamata era tiko ena vanua o ya era sa rui tamata kaukauwa, kei na nodra koro era tiko kina e sa rui lelevu ka vakabai vinaka. Na leqa levu sara sai koya na neimami raici ira talega na kawa ni tuwawa mai kea.

29O ira na Amalekaiti era tiko ena ceva ni vanua, ka ra tiko ena vanua veidelana o ira na Itaiti, o ira na Jepusaiti, kei ira na Amoraiti; o ira na kai Kenani era tiko tikiva na wasawasa kei na bati ni Joritani.

30Sa qai vagalui ira na tamata o Kelevi e mata i Mosese, ka kaya, “Me da cavu tu ena gauna sara ga oqo, ka taukena na vanua; ni sa rawa vei keda me da vakamalumalumutaka.”

31Ia era sa kaya o ira na tamata era sa lako vata kaya, “E sega, eda na sega ni vorati ira rawa na kai vanua o ya, ni ra sa rui kaukauwa cake mai vei keda.”

32Era sa qai vakadewataka yani ena kedra maliwa na Isireli e dua na i tukutuku lasu me baleta na vanua era sa talai me ra la'ki raica. Era sa tukuna, “Na vanua o ya e sega mada ga ni rawa ni vakania na levu ni tamata era tu kina. Na tamata kecega keimami sotava era sa tamata balabalavu.

33Keimami raici ira talega na tuwawa ena vanua o ya, oqori o ira na kawa i Anaki. Keimami vakila ni keimami sa rui tamata lalai vakalevu me vaka na i rairai ni vodre e matadra, ka oqori na i yaloyalo e vakabauti ni ra raici keimami talega kina vakakina.”