1 Veigauna 15 - Vakavakadewa Vou kei na iVola tale eso（FNVDC12）

Vakarau Tokitaki na Kato ni Veiyalayalati

1A sa tara o Tevita eso na vale me nona ena Koro i Tevita. A vakarautaka talega e dua na i tikotiko ni Kato ni Veiyalayalati ni Kalou, ka birika e dua na kena valelaca tabu.

2A qai kaya o Tevita, “Me sa nodra i tavi duadua ga na Livai me ra dau colata na Kato ni Veiyalayalati, baleta ni sai ira ga sa digitaki ira o Jiova me ra qaravi koya ka tawa mudu.”

16A sa vakarota o Tevita vei ira na nodra i liuliu na Livai me ra lesi ira na wekadra me ra digitaka eso na Livai me ra daunisere ka ra vakatagitaka na veisere rogo vinaka ka vakavure marau ena api kei na sibali.

17Ia o ira na Livai era a digitaki Imani na luve i Joeli tagane, kei na wekana o Esava na luve i Berekaia tagane, kei Icani na luve i Kusaia tagane, mai na mataqali nei Mirari.

18E muria tarava yani ena i tagede e tarava o Sakaraia, o Peni, o Jesieli, o Simiramoci, o Jieli, o Uni, o Iliavi, o Pina, o Mesea, o Maticaia, o Ilifileu, o Mikiniaia, o Opeti Itomi vata kei Jieli; o ira oqo era sa dauyadrava na valenisoro.

19O iratou na daunisere o Imani, o Esava vata kei Icani me ratou na qiria na sibali parasa;

20o iratou o Sakaraia, o Asieli, o Simiramoci, o Jieli, o Uni, o Iliavi, o Meesea vata kei Penaia me ratou na qiria na api rogo memela;

21ia o iratou o Maticaia, o Elifileu, o Mikiniaia, o Asasaia vata kei rau na dauyadrava na valenisoro o Opeti Itomi kei Jieli me ratou na qiria na api rogo malumu.

22A sa digitaki o Kinanaia me liutaka na nodra matasere na Livai baleta ni sa kena dau o koya ena sere kei na i vakatagi.

23E rau sa digitaki o Perakaia kei Elikena, vata kei rau o Opeti Itomi kei Jiaia ena kena yadravi na Kato ni Veiyalayalati.

24E ratou a digitaki me ratou dau uvuca na davui ena mata ni Kato ni Veiyalayalati o iratou na bete: o Sipanaia, o Josafati, o Nacanieli, o Amasai, o Sakaraia, o Penaia vata kei Iliesa.

Kau ki Jerusalemi na Kato ni Veiyalayalati(2Samu 6.12-22)

25A sa qai lako o Tevita na tui kei ira na nodra i liuliu na Isireli kei ira na turaganivalu ki na vale i Opeti Itomi me ra la'ki kauta mai na Kato ni Veiyalayalati, era sa qai kauta mai ena marau levu.

26Sa vakacabora kina e vitu na bulumakau kei na vitu na sipi tagane, baleta ni sa vukei ira na Livai na Kalou ena kena colati na Kato ni Veiyalayalati.

27A sa tokara toka o Tevita e dua na i tutuvi sa caka ena lineni matailalai vinaka ka vaka talega kina o ira na lewe ni matasere, o Kinanaia na nodra i liuliu kei iratou na Livai e ratou colata na Kato. A sa tokara talega o Tevita e dua na efoti lineni.

28Era sa qai kauta mai na Kato ni Veiyalayalati ki Jerusalemi o ira kece na Isireli ena domo ni kaila ni marau, kei na domo ni davui, na koneti, na sibali, vata kei na rorogo ni api.

29Ia ni sa yaco yani na Kato ki na Koro i Tevita, a sa vakararai tiko mai na katubaleka e cake o Mikali na luve i Saula yalewa, ka raici Tevita na tui ni sa mekemeke tiko ka ladelade voli ena marau, ka sa lomacataki koya kina.