Siraki 49 - Vakavakadewa Vou kei na iVola tale eso（FNVDC12）

Josaia

1 2Tui 22.1; 22.11-13; 23.3,25 Na vakanananu kei Josaia e vaka na boi vinaka ni mira e vakarautaka vakamaqosa na kenadau;

e kamica vaka na oni; na kena ikanakana, e vaka na ivakatagi e na soqo ni gunuwaini.

2E donu nona veisautaka nodra itovo na nona tamata, a kauta laivi na ivakarau vakasisila ni ivalavalaca.

3A yalodina vua na Turaga; e na gauna ni ivalavalaca, a vakabibitaka na ivalavala dodonu.

Jeremaia

4Era valavalaca vakalevu kece na lewenivanua vakavo ga o Tevita, Esekaia kei Josaia,

era sega ni muria na lawa nei koya na Cecere Sara; era mai kawaboko na tui kei Juta,

5nira solia nodra vakataulewa vei ira e so tale, nodra lagilagi vua na matanitu tani.

6 Jere 1.4-10; 39.8 O ira era mani vakama na koro tabu digitaki, ra biuta me lala na kena veitolonisala, me vaka a parofisaitaka o Jeremaia.

7nira a vakararawataki koya na lewenivanua, dina ni asa vakatabui tu mai kete i tinana me parofita,

me cavuraka totogitaka vaqeyavutaka, ia me vakadeitaka teivaka tale ga.

Isikeli

8 Isi 1.3-15; 14.14-20 O Isikeli a raica na raivotu ni lagilagi a vakaraitaka na Kalou e doka ni nodra qiqi na kerubimi,

9ni ravuti ira na kena meca na Kalou e na uca bi, caka vinaka vei ira era valavala dodonu.

Parofita e lewe tinikarua

10Me bula tale mada ga mai na vanua era davo tu kina na suidra na parofita e tinikarua,

nira vakacegui ira na tamata ni Jekope, sereki ira e na vakanuinui dei.

Serupepeli kei Josua

11 Esera 3.2; Ake 2.23 Meda vakalagilagi Serupepeli beka vakacava? E vaka na mama ni sitaba e na liga i imatau.

12 Ake 1.1,12 E vaka kina o Josua na luve i Josateki;

e na nodrau gauna, erau tara kina na vale ni Turaga, na valenisoro me vakatabui vua na Turaga, me lagilagi tawamudu.

Niemaia

13 Nie 6.15 Etudei tale ga na ivakananumi kei Niemaia; a tara na bainikoro asa talaraki,

vakina na matamata kei na kena samugakagaka, tara tale ga na noda vale sa vakarusai.

O ira na Pateriaki

14E sega ni se buli e vuravura e dua tale me vakataki Inoke ni a kau cake i lomalagi.

15E sega tale ga ni se sucu e dua me vakataki Iosefo, nodratou iliuliu na tacina, nodra ivakadei na lewenivanua; e maroroi vinaka tu na suina.

16Erau dokai tale ga o Semi kei Seci, ia o Atama e cecere duadua vei ira kece na kabula.