Cakacaka 26 - Vakavakadewa Vou kei na iVola tale eso（FNVDC12）

Sa Taqomaki Koya o Paula ena Mata i Akariva

1Sa qai kaya vei Paula o Akariva, “Sa rawa ni o vakamacalataki iko mai ena gauna oqo.” Sa qai dodoka na ligana o Paula ka vakatekivu me tukuni koya:

2“Au nanuma ni'u sa kalougata oi au, kemuni Akariva na tui, ni'u sa na tukuni au edaidai e matamuni ena vuku ni veika kecega era beitaki au kina na Jiu,

3vakabibi ni o ni sa rui kila vinaka kece sara na nodra i valavala na Jiu kei na veika era dau veiletitaka. Au sa kerei kemuni kina mo ni rogoci au ena yalo vosota.

4“Era sa kila kece sara na Jiu na i tovo ni noqu bula mai na gauna ni noqu gone ka yacova mai oqo. Era kila ni'u a dau tu ga e liu mai na noqu vanua, ka vakakina na noqu bula mai Jerusalemi.

5Era sa kila makawa tu mai, kevaka e lomadra, sa rawa ni ra vakadinadinataka vei kemuni, ni'u a bula tu mai ena i vakarau ni bula vaka-Farisi, o ya na taba ni neimami lotu ka dau muria vakamatailalai sara na kena lawa.

9“Oi au vakai au, au a nanuma ni sa dodonu me'u cakava na veika kecega au rawata me'u saqata kina na yaca i Jisu na kai Nasareci.Na Ka e qai Yaco ena Vuku ni Vosa i Paula

24Ni sa tukuni koya tikoga vaka o ya o Paula, sa kaya mai o Vesito ena domo levu, “Sa ca na ulumu o iko, Paula. Sa vakalialiataki iko na levu ni nomu kila-ka!”

25Sa qai kaya o Paula, “Au sega ni lialia, kemuni, Vesito, na turaga dokai, ia au sa cavuta ga na vosa dina ka dodonu.

26E kila tu na tui na veika oqo, ka'u sa vosa doudou tiko kina e matana; ni'u sa kila dina ni sega na ka e vuni vua, ni a sega ni caka na ka oqo ena dua na yasana vuni.

27I kemuni Akariva, na tui, o ni vakabauti ira li na parofita se sega? Au kila ni o ni vakabauti ira!”

28Sa qai kaya vei Paula o Akariva, “Ena gauna lekaleka ga oqo, o sa nanuma li ni o rawa ni veisautaki au kina me'u lotu Vakarisito?”

29Sa qai kaya o Paula, “Se gauna lekaleka se gauna balavu, sa noqu masu ga oqo vua na Kalou me baleti kemuni kei ira kece sara era sa vakarogoci au tiko edaidai mo ni yaco mo ni vakataki au, ia me kakua ga ni o ni vesu tu ena sinucodo me vakaoqo!”

30E ratou sa qai tu cake na tui, kei koya na kovana, kei Verenaisi, kei ira era dabe vata tiko kei iratou,

31ka ra sa qai lako vakatikitiki ka veivosaki vakai ira ka kaya, “Na tamata oqo sa sega ni cakava e dua na ka me dodonu me mate kina se me biu tiko kina ena valeniveivesu.”

32Sa qai kaya vei Vesito o Akariva, “Kevaka me a sega ni kerea na tamata oqo me vakataulewa vua o Sisa, ke a sa sereki sara ga.”