2 Tui 5 - Vakavakadewa Vou kei na iVola tale eso（FNVDC12）

Vakabulai Mai na Vukavuka o Nemani

1O Nemani, na turaganivalu ni mataivalu ni Siria, a sa dokai vakalevu mai vua na tui Siria, baleta ni a solia o Jiova na qaqa vei Siria ena vukuna. A sa dua na sotia qaqa o koya, ia sa tauvi koya na vukavuka.Luke 4.27

2Ena dua na nodra a valuti Isireli, era a qai kauta lesu vakabobula e dua na goneyalewa lailai ni Isireli, ka yaco me nona dauveiqaravi na wati Nemani.

3A sa kaya na goneyalewa lailai oqo vua na nona marama ena dua na siga, “Isa! ke lako mada ga na noqu turaga vei koya na parofita mai Samaria! Ena rawa ni vakabulai koya mai na nona vukavuka.”

4Ni sa rogoca oqo o Nemani, a sa lako vua na tui ka tukuna vua na veika e tukuna na goneyalewa ni Isireli.

5A sa kaya o tui Siria vei Nemani, “Mo lako sara vua, ka'u na vola e dua na i vola mo kauta vua na tui Isireli.”

A sa lako yani o Nemani ka kauta vata yani e 30,000 na tiki ni siliva, kei na 6,000 na tiki ni koula, kei na tini na i wasewase ni sulu digitaki.

6A kauta na i vola o ya vua na tui Isireli, ka vakaoqo na lewena, Ni yaco yani vei iko na i vola oqo, o sa kila ni'u sa tala yani vei iko na noqu tamata o Nemani, mo vakabulai koya mai na nona vukavuka.

7Ia ni wilika oti na i vola o ya na tui Isireli, a dresulaka na nona i sulu, a kaya, Oi au beka na Kalou, me rawa ni'u veivakamatei ka veivakabulai, ka tala mai kina vei au na tamata oqo me'u vakabulai koya mai na nona vukavuka? Ia mo ni vakasamataka mada, ka raica, ni sa via vakatubu veivala vei au o koya.

8Ia ni rogoca o Ilaisa na tamata ni Kalou, ni a dresulaka na nona i sulu na tui Isireli, a talatala vua na tui, ka kaya, A cava o dresulaka kina na nomu i sulu? Me lako mada mai vei au o Nemani, me kila kina ni sa tiko e dua na parofita e Isireli.

9A lako mai o Nemani kei ira na nona ose, kei na nona qiqi vakaturaga, a tu e katuba ni vale i Ilaisa.

10A tala e dua na i talai vua o Ilaisa, ka kaya, Mo ni la'ki sili vakavitu ena Joritani: ena qai bula tale mai na lewemu, ia o na savasava mai.

11A cudru o Nemani, ka lako tani, ka kaya, Raica, au a nanuma ga ni na lako dina mai vei au o koya, ka mai tu, ka masuta na yaca i Jiova na nona Kalou, ka yalovaka na ligana ki cake ka vakabula na noqu vukavuka.

12E sega li ni vinaka cake o Epana kei Paripari, na uciwai e rua mai Tamasiko mai na wai kecega ni Isireli? Me'u kakua li ni sili kina, ka savasava mai? A sa vuki ga o koya ka lako vakacudrucudru yani.

13Era a toso volekati Nemani yani o ira na nona dauveiqaravi ka kaya vua, “I'saka, kevaka sa vakarota vei kemuni e dua na ka dredre na parofita, o ni sa rawa ga ni vakayacora. Ia e vakaevei mo ni la'ki vakasavasavataki kemuni ga, me vaka sa vakarota o koya, ka mo ni vakabulai kina?’

14A sa qai lako sobu o Nemani ki na Joritani ka toni vakavitu ena loma ni wai, me vaka na vosa i Ilaisa na tamata ni Kalou, ka sa vakabulai. A sa savasava tale ni sa yaco me kaukauwa ka bulabula na lewena, me vaka na lewe ni gone lailai.

15A sa qai lesu tale o Nemani vua na tamata ni Kalou kei ira kece na nona tamata, a la'ki tucake tu e matana, ka kaya, “Raica, au sa qai kila tu oqo ni sa sega ni dua tale na Kalou e vuravura taucoko, io, e Isireli duadua ga; ia oqo, mo taura mada e dua na i loloma mai vei au na nomuni tamata.”

16A sa kaya o koya, “Me vaka sa bula o Jiova, o koya ka'u sa qarava, au na sega ni taura e dua na i loloma.”

A sa cikevi koya vagumatua o Nemani me taura; a bese na tamata ni Kalou.

17A sa kaya o Nemani, Ia kevaka o sega ni via taura, mo solia mada vei au na nomu tamata eso na qele me keitou kauta, me rauta ni rau colata e rua na meule; ni'u na sega ni vakacabora tale e dua na i soro kama, se e dua na i madrali, vei ira na kalou tani, vei Jiova duadua ga.

18Me kakua ni cudruvi au na nomu tamata o Jiova ena vuku ni ka oqo, ni dau curu na noqu turaga ki na burekalou i Rimoni, me soro kina, au dau sala vata kaya, ka cuva ena burekalou i Rimoni, me vosoti au o Jiova ena vuku ni ka oqo.

19A sa kaya vua o Ilaisa, Mo lako yani ena vakacegu. A lesu tale yani o koya.

Na Koco ni Loma i Keasi

20Ia ni sega soti ni yawa na vanua a lakova o Nemani, a kaya o Keasi na cauravou i Ilaisa na tamata ni Kalou, Raica, sa lomani Nemani na kai Siria na noqu turaga, ena nona sega ni taura mai vua na ka a kauta mai. Me vaka sa bula o Jiova, au na cici muri koya, ka kauta mai vua eso na ka.

21A cici muri Nemani o Keasi. Ia ni sa raica o Nemani ni sa cici muri koya tiko e dua na tamata, a sobu mai na nona qiqi vakaturaga me la'ki tavaki koya, a kaya, E dua li na leqa?

22A sa kaya o koya, Sa vinaka saka, sa talai au mai na noqu turaga, ka kaya, ‘Raica, e rau sa qai lako wale ga yani vei au e rua na cauravou mai vei ira na luvedra na parofita mai na vanua veiulunivanua o Ifereimi, au kerei kemuni mo ni solia mada mai e dua na taledi siliva, kei na rua na i sulu ni solevu.’

23A sa kaya o Nemani, Sa vinaka, mo kauta yani e rua na taledi. A cikevi koya matua, ka vauca vua e rua na taledi siliva ena rua na taga, kei na rua na i sulu ni solevu me rauta na i dalobi, ka tauca vei rau e rua na nona tamata; e rau a colata ka liu vei Keasi.

24Ia ni yaco o koya ki na delana, a taura vei rau, ka biuta e loma ni vale; ka talai rau yani na tamata me rau lako.

25A la'ki tucake tu ena mata ni nona turaga. A sa kaya vei Keasi o Ilaisa. O lako mai vei Keasi? A sa kaya o koya, Sa sega ni lako ki na dua na vanua, na nomuni tamata.

26A sa kaya tale vua o Ilaisa, A sega li ni lako vata kei iko na yaloqu ni sa la'ki tu suka tale mai na tamata mai na nona qiqi vakaturaga me tavaki iko? Sa kena gauna li oqo mo taura kina na i lavo kei na i sulu, na olive kei na loganivaini, na sipi kei na bulumakau, na tamata kei ira na vada?

27Ia oqo, ena kabiti iko na vukavuka i Nemani kei ira na nomu kawa ka tawa mudu. A lako tani o koya mai vua, ka tauvi vukavuka me vaka na uca vulavula.