1 Maciu 12.42; Luke 11.31 Ia ni rogoca na ranadi ni Sipa na i rogorogo kei Solomoni, a lako mai ki Jerusalemi me mai vakadinadinataka, ena nona taroga na veitaro dredre eso; era a lewe vuqa sara na nona lewe ni sala, kei na kameli era usana mai e levu sara na ka boi vinaka, kei na levu na koula kei na vatu talei. Ia ni yaco yani vei Solomoni na ranadi ni Sipa, a tukuna vua na veika kece a tu e lomana.
2A sauma vua na ranadi ni Sipa o Solomoni na nona taro kece; a sega ni dua na ka me vakavotaka o Solomoni, me a sega ni vakamacalataka rawa vua.
3Ia ni raica oti na ranadi ni Sipa na vuku titobu i Solomoni, na vale ka a tara,
4na kakana ena nona teveli, na nodra tiko na nona vakailesilesi, na nodra tu na nona tamata era veiqaravi, na nodra i sulusulu, na nona dau tauri bilo, kei na i soro kama ka dau vakacabora ena Valenisoro, a sa vakadrukai kina vakaca.
5A sa kaya o koya vua na tui, Sa dina sara na i rogorogo ka'u a dau rogoca tu mai na noqu vanua, ena vuku ni veika me baleti kemuni, kei na nomuni vuku,
6ia ka'u a sega ga ni vakadinata na veitukutuku ka rogo tu yani, me yacova na noqu lako mai oqo, ka mai raica sara e mataqu; ia raica sa tukuni vakaveimama wale ga na nomuni vuku; ni o ni sa uasivi cake mai na veitukutuku ka'u a rogoca.
7Era a reki na nomuni tamata oqo, o ira ka ra dau tu e matamuni ena veisiga, ka rogoca na nomuni vuku!
8Me vakarokorokotaki o Jiova na nomu Kalou, o koya sa dau vinakati kemuni, ka vakatikori kemuni ena nona i tikotiko vakaturaga, mo ni tui ena vuku i Jiova na nomuni Kalou! Ni sa lomani Isireli na nomu Kalou, ka na vakataudeitaki ira me tawa mudu, a sa lesi kemuni kina mo ni nodra tui, me rawa ni caka kina na lewa dodonu, kei na i valavala dodonu.
9A solia o koya na ranadi ni Sipa vei Solomoni na tui e va na tani koula, kei na levu sara na ka boi vinaka, kei na vatu talei eso; a sega tale ni dua na ka boi vinaka me vaka na kena ka a solia na ranadi ni Sipa vei Solomoni na tui.
10Ia o ira na tamata nei Irami, kei ira na tamata i Solomoni, ka ra kauta mai na koula mai Ofira, era a kauta talega mai na kau talei eso, ka vakakina na vatu talei.
11A cakava na tui na i kabakaba ni vale i Jiova ena kau talei oqori, kei na valenitui, ka caka talega kina na api, na soliteri vei ira na daunisere; a sega ni dua me tautauvata kaya me a bau kune e liu ena vanua o Juta.
12A solia vua na ranadi ni Sipa o Solomoni na tui na ka kecega a gadreva, me i kuri ni yau e solia vua ka sivita sara na levu ni loloma ka a kauta mai o koya vua na tui. A sa lesu tale o koya ki na nona vanua kei ira era qaravi koya.
Nona i Yau na Tui o Solomoni(1Tui 10.14-25)13Ena veiyabaki, sa dau kumuna o Solomoni na tui e rauta ni 23,000 na kilokaramu na koula,
14ka vakuri oqo mai na i vakacavacava era sauma vua o ira na dauvolivolitaki kei ira na dauveivoli. Era a kauta talega mai na siliva kei na koula vei Solomoni o ira kece na tui ena vanua vaka-Arapea kei ira na kovana ni veitikina e Isireli.
15A sa cakava o Solomoni na tui e 200 na i sasabai lelevu ena koula sa lautuki, ka vakarautaki ni rauta e 7 na kilokaramu na bibi ni koula lautuki e vakayagataki ena dua na i sasabai.
16A cakava talega e 300 na i sasabai lalai ena koula lautuki, ka vakarautaki ni rauta e 3 na kilokaramu na bibi ni koula lautuki e vakayagataki ena dua na i sasabai; ka sa la'ki maroroi ira ena Vale ni Veikau ni Lepanoni.
17A sa cakava talega na tui e dua na i dabedabe vakaturaga cecere. E dua na tikina sa ukucavutaki ena ivori, ka boroi na yasana kadua ena koula dina.
18E ono taucoko na levu ni kabakaba me lako cake ki na i dabedabe vakaturaga, ka sa toka ravita na i tutu ni yava sa boro ena koula. E toka ruarua na i taqataqa ni liga ena i dabedabe vakatui, ka rau duri e yasadrau na i vakatakarakara ni laione e rua.
19A tu kina e tinikarua na laione, a ono ena yasa ni tagede ka dua, ka ono ena yasa ni tagede ka dua. A sega tale ni bau dua na ka vaka o ya a bau caka ena dua na matanitu.
20A sa koula kecega na bilo i Solomoni na tui, kei na i yaya kece e loma ni Vale ni Veikau ni Lepanoni sa buli ena koula dina. E a se bera ni okati me i yau vakamareqeti na siliva ena dela ni gauna i Solomoni.
21Era a dau soko ki Tasisi na nona waqa na tui kei ira na tamata mai Irami; era a dau vakaiusana mai na waqa eso mai Tasisi ena veiyabaki tolu ka ra kauta mai na koula, na siliva, na ivori, na maqe eso, kei na pikoki.
Na Vuku i Solomoni22A sa uasivi cake o Solomoni na tui mai vei ira kecega na tui e vuravura, ena levu ni nona i yau kei na vuku.
23Era a gadreva me ra raici Solomoni o ira kecega na tui e vuravura, me ra rogoca na nona vuku ka a solia ki na yalona na Kalou.
24Era a kauta yadudua yani vua na tui na nodra ka ni loloma, eso na i yaya siliva, ka so na i yaya koula, eso na i sulu, na ka boi vinaka, eso na ose kei na meuli, ka vaka tiko oqo ena veiyabaki.
25 1Tui 4.26 A sa nei Solomoni na tui e 4,000 na i tutu ni ose kei na qiqi ni valu, ka ra lewe 12,000 na lewe ni nona mataivalu vodo ose, ka ra a lesi me ra tiko ena veikoro ni qiqinivalu, se me ra vakaitikotiko ga e Jerusalemi kei koya na tui.
26 Vteki 15.18; 1Tui 4.21 A lewai ira na tui kecega o koya me vakatekivu mai na Uciwai na Uferetisi ki na nodra vanua na kai Filisitia, ka vakakina ki na i yalayala kei Ijipita.
27A ka levu sara na siliva era a kauta mai ki Jerusalemi na tui, a la'ki vakawaleni kina na i yau oqo me vaka ga na vatu ni koro o ya, ka vuqa sara na vunisitari me vaka na levu ni vunilolo ka ra tu ena buca mai Sepela.
28Vrua 17.16A dau kau tiko mai eso na ose mai Ijipita vei Solomoni, kei na veivanua e vuqa.
Tukutuku Lekaleka ni Bula i Solomoni(1Tui 11.41-43)29Ia oqo na vo ni cakacaka i Solomoni, mai na kena i tekivu ki na kena i otioti, ka sega li ni volai ena i vola tukutuku ni gauna i Necani na parofita, kei na parofisai i Eaija na kai Sailo, kei na raivotu i Ito na daurairai, me baleti Jeropoama na luve i Nipati?
30A lewai ira kecega na Isireli mai Jerusalemi o Solomoni me vasagavulu na yabaki.
31A mate o Solomoni ka moce kei ira na nona qase, a bulu ena koro i Tevita na tamana; ka lewa o Reopoama na luvena me kena i sosomi.
Who We AreWhat We EelieveWhat We Do
2025 by iamachristian.org,Inc All rights reserved.
