Yalomatua 9 - Vakavakadewa Vou kei na iVola tale eso（FNVDC12）

E kerea na isolisoli ni yalomatua o Solomoni

1 1Tui 3.6-9; Ym 7.7 “I kemuni nodra Kalou noqu qase, Turaga ni yalololoma, oni sa bulia na ka kece e na nomuni vosa,

2e na nomuni yalomatua oni a bulia kina na tamata me lewa na veika oni sa bulia,

3me liutaki vuravura e na yalosavasava kei na yalododonu, me vakatulewa e na dina.

4Ni solia vei yau na yalomatua e tu e na yasa ni nomuni idabedabe vakatui, moni kua ni besetaka meu nomuni italai.

5O yau na nomuni bobula, na luve ni nomuni vada, au malumalumu, lekaleka noqu bula, au lecaika e na vakatulewa kei na lawa;

6ke mani uasivi vakacava e dua, qai yali vua na yalomatua e vu vei kemuni, e okati me ka wale.

7Oni sa digitaki yau meu nodra tui na nomuni tamata, nodra turaganilewa na luvemuni.

8Oni sa lewa meu tara na valenisoro e na nomuni ulunivanua tabu kei na yaletare e na koro oni tiko kina, me ivakatakarakara ni valelaca tabu oni a vakarautaka mai na ivakatekivu.

9E tu vei kemuni o yalomatua, e kila nomuni cakacaka, a tu kina e na nomuni buli vuravura, e kila na ka e vinaka e matamuni, kei na ka e salavata kei na nomuni ivakaro.

10“Moni talai koya mai na itikotiko tabu vakalomalagi, moni talai koya mai na idabedabe vakatui ni nomuni lagilagi, me keirau mai cakacaka vata meu na vulica kina se cava e vinaka vei kemuni.

11E kila tu na veika kece, e na tuberi yau vakavuku e na noqu ivalavala, e na maroroi yau e na nona lagilagi.

12Sana qai raidonu noqu cakacaka, au na qai vakatulewa vakadodonu vei ira nomuni tamata, sana qai ganiti yau na idabedabe nei tamaqu.

13“O cei mada e kila rawa na inaki ni Kalou? Se me kila na loma ni Turaga?

14E seva wale na vakasama ni tamata, e dreve vakalevu na neimami inaki,

15ni bika tiko na yalo na yago dau vuca; na waqawaqa qo e vakabera na vakasama.

16E kilakilai dredre se cava e tu e vuravura, na ka mada ga e tu e mata i keimami e kunekunei dredre; o cei gona me kila rawa na ka e tu mai lomalagi?

17O cei sa kila na nomuni inaki keoni sega ni solia na yalomatua, se tala mai nomuni Yalotabu mai cake?

18Sa qai vakadodonutaki kina na nodra sala na kai vuravura, era sa qai vakavulici e na ka e vinaka vei kemuni, era vakabulai e na yalomatua.”