1Ena dua na gauna e muri, sa qai mate o Neasi na tui Amoni, ka sa buli me tui na luvena tagane o Anuni.
2Sa kaya o Tevita, “E dodonu me'u vakaraitaka na noqu veitokani dina vei Anuni, me vaka sa dau vakayacora vei au o Neasi na tamana.” A mani tala kina o Tevita eso na mata me ra la'ki vakaraitaka na nona lolosi kei na rarawa.
Ni ratou yaco yani ki Amoni ka cabe yani vei Anuni na tui,
3era sa qai kaya vua na tui o ira na nodra turaga na Amoni, “O sa nanuma li ni sa vakarokorokotaki tamamu vakaidina o Tevita ena nona talai ira mai na tamata oqo me ra mai vakaraitaka na nona rarawa? E sega sara ga ni vakakina! E sa talai ira oqo me vaka na yamata vuni ka mai rai vanua, me rawa kina ni ra taura vakaukauwa!”
4Sa qai vesuki iratou na tamata i Tevita o Anuni, ka toroya laivi na kumidratou, ka kotiva laivi na nodratou i sulu me tekivu mai dibidratou, ka vakatalai iratou yani.
5A sa dredre sara vei iratou na lesu ki vale ena vuku ni madua levu sa tarai iratou. Ni sa rogoca o Tevita na ka sa yaco, a sa vakauta na nona i tukutuku me ratou wawa tikoga mai Jeriko ka qai lesu tale ena gauna sa tubu tale kina na kumidratou.
6Ni sa liaca o Anuni na tui kei ira na Amonaiti na veika era cakava sa vakavuna tale me ra veimecaki kei Tevita, era sa qai sauma e 34,000 na kilokaramu na siliva me kedra i voli na mataivalu vodo ose kei na qiqinivalu ni Colo i Mesopotemia kei na vanua qali ki Siria, o ya o Meka vata kei Sopa.
7Era sa yaco mai na 32,000 na qiqinivalu saumi kei na mataivalu i tui Meka, ka ra mai keba volekati Meteva. Era a lako talega mai na nodra veikoro o ira na Amonaiti me vakarau ia na i valu.
8Ni sa rogoca o Tevita na veika sa yaco tiko, a sa talai Joape yani kei ira kece na nona sotia.
9Era sa qai tayabe na Amonaiti ka tuva vakaivalu ena matamata ni koro o Rapa, na nodra koro turaga, ka ra sa tuvani tu ena vanua lala o ira na tui era sa lako mai me ra veivuke.
10Ni sa raica o Joape ni ra na valuti koya na meca mai liu ka vakakina mai dakuna, sa qai digitaka o koya eso na sotia digitaki ni Isireli ka biuti ira me ra tuva e matadra na kai Siria.
11Sa qai biuti ira na vo ni sotia ena ruku ni veiliutaki nei Apisai na tacina, ka tuvai ira e matadra na Amonaiti.
12A sa kaya vua o Joape, “Kevaka o raica ni ra sa vakadrukai au tiko na kai Siria, mo qai lako mai ka vukei au; ia kevaka era sa vakadrukai iko tiko na Amonaiti, au na lako yani ka vukei iko.
13Mo kaukauwa ka yaloqaqa! Me da vala vakaukauwa sara ena vukudra na noda tamata kei na veikoro ni noda Kalou. Me qai vakayacora ga o Jiova na ka sa vinaka vua.”
14A toso yani ki liu o Joape kei ira na nona tamata me ra vala, ka ra sa dro na kai Siria.
15Ni ra sa raica na Amonaiti na nodra sa cici na kai Siria ena vaqara bula, era a qai dro tani talega mai vei Apisai, ka curu lesu ki na nodra koro. A sa mani lesu tale ki Jerusalemi o Joape.
16Ni ra sa liaca na kai Siria na nodra sa vakadrukai mai vei ira na Isireli, era sa qai la'ki kauta mai eso na sotia mai na vanua qali ki Siria era tiko ena tokalau ni Uciwai na Uferetisi, ka biuti ira ena ruku ni veiliutaki i Sopaki na komada ni mataivalu nei Etareseri na tui Sopa.
17Ni sa rogoca o Tevita na kena i tukutuku, a sa soqoni ira vata mai na sotia ni Isireli, ka ra qalo kosova na Joritani, ka la'ki tuva vakaivalu me ra veirai mata kei ira na kai Siria. A sa tekivu na i valu,
18ka sa biligi ira lesu na mataivalu ni Siria o ira na Isireli. A ravuravu o Tevita kei na nona tamata ka ra vakamatea e 7,000 na nodra draiva ni qiqinivalu na kai Siria kei na 40,000 na lewe ni mataivalu ni vanua. Era a vakamatei Sofaki talega, o koya na komada ni mataivalu ni Siria.
19Ni ra sa raica na tui eso ka ra qali vei Etareseri ni ra sa vakadrukai mai vei Isireli, era sa qai soro ka ia na veisaututaki kei Tevita, ka sa tauri ira o koya me ra nona tamata. O ira na kai Siria era a sega tale ni qai vinakata tale me ra vukei ira na Amonaiti.
Who We AreWhat We EelieveWhat We Do
2025 by iamachristian.org,Inc All rights reserved.
