Siraki 23 - Vakavakadewa Vou kei na iVola tale eso（FNVDC12）

1I Turaga, na Tamaqu na iLiuliu ni noqu bula, ni kua ni laiva meu vakacacani e na noqu vosa, se meu bale kina!

2Isa! Meu kanakuitataki mada ga e na vuku ni noqu vakanananu, me se lewa na noqu vakasama na yalomatua!

Meu vakadodonutaki niu cala, vunauci niu valavalaca;

3me kua kina ni vakalevutaki na noqu cala, kua ni bini na noqu ivalavalaca.

Au sana qai sega ni bale e matadra na kequ meca, era sana sega ni mani marau e na qaqa.

4I Turaga, Tamaqu na Kalou ni noqu bula, ni kua ni solia vei yau na mata dokadoka,

5ni kauta laivi vei yau na gagadre ca.

6Me kua ni rawai yau na kana vakasese kei na garogaro ca, meu kua ni rawai e na gagadre ca au na madua kina.

Bubului

7Ni rogoca na luvequ na noqu ivakasala me baleta na vosa; o koya e muria, e na sega ni tobo.

8Na dauvalavalaca e tobo e na tebenigusuna, erau tarabe kina na dau vosa dokadoka kei na viavialevu.

9 Maciu 5.34; Jeme 5.12 Kua ni vakamatautaka na gusumu e na bubului se mo dau cavuta tu ga vakaveitalia na yaca i koya na Tabu Duabau;

10me vaka e na levu na nona mavoa na dauveiqaravi e dau moku,

e vakina o koya e dau bubului, dau taurivaka na Yaca tabu, e na tu ga na nona cala.

11Na tamata e dau bubului vakalevu, e na sinai e na ca, e na sega ni yali na leqa e na nona vale. Ke sega ni vakayacora taucoko na nona bubului, sa cala; ke sega ni kauaitaka, sa cala vakarua.

Ke lasu nona bubului, e na sega ni vosoti, e na sinai na nona vale e na leqa.

Vosa vakasisila

12E tiko na ivosavosa e tautauvata kei na mate; me kua sara ni kune e na kawa i Jekope!

Na cala kece qo e yawa vei ira na kila na Kalou, era na sega ni bale kina.

13Kua ni vakamatautaka na vosa vakasisila, ni cala na mataqali ivosavosa qo.

14Nanumi rau o tamamu kei tinamu nio dabe vata kei ira na turaga lelevu

deo guiguileca e matadra, era qai vakalialiai iko e na nomu ivakarau ca;

o na qai gadreva mo a kua ni sucu, vosacataka na siga o a sucu kina.

15Na tamata sa matau e na vosa veibeci, e na sega ni lewai koya rawa kina e na nona bula taucoko.

Valavalaca ni veidauci

16E rua na mataqali tamata erau vakalevutaka na ivalavalaca, kena ikatolu e nona na isamu ni dawa.

Ni sa katakata na gagano me vaka na bukawaqa, e na sega ni cegu me yacova ni sa kamayavu;

na tamata e veiyacovi kei na wekana, e na sega ni cegu me yacova ni sa vakamai koya na buka.

17Vua na dauveidauci, na veimataqali madrai e kana vinaka, e na sega ni cegu me yacova ni sa mate.

18Na tagane e beca na nona vosa ni yalayala ni vakamau, e vakaiulubaletaka, “O cei e raici yau?

E buto tu na vanua, e vunitaki yau na lalaga ni vale, e sega ni dua e raici yau. Na cava meu rerevaka?

O koya na Cecere Sara e na sega ni liaca na noqu ivalavalaca.”

19Na nona rere e yalani, ni kauaitaka ga na rai vakatamata, e sega ni kila ni mata ni Turaga e rarama cake vakatini na udolu mai na rarama ni matanisiga;

e raica rawa na ivalavala kece ni tamata, ilova na veivanua vuni.

20Ni se bera ni buli na vuravura, sa kila tu o koya; vakina ni sa buli oti.

21Na tamata valavalaca e na totogitaki e na tolonisala e loma ni koro, e na tobo e na vanua sara ga e sega ni tadra.

22E vaka tale ga kina na yalewa e biuta na watina me vakasucuma na luvena e dua tani tale.

23Na imatai sara mada ga ni ka, sa beca na ivakaro nei koya na Cecere Sara; na ikarua, sa cala vei watina;

na ikatolu, sa veibutakoci e na nona saqamua kei na nona vakasucumi ira kina na gone ni dua tani na tamadra.

24E na kau sara ga o koya e matadra na lewe ni matabose, e na nodra tale ga na luvena na kena ca.

25Era na sega ni ciqomi, e na sega ni vua na tabadra.

26E na dau sevaki tu mai na vakanananu ni marama qori, e na sega ni bokoci rawa na nona madua.

27O ira na tu laivi mai, era na kila ni sega ni dua na ka e vinaka cake mai na lomana na Turaga, e sega ni dua na ka e kamikamica cake mai na rokova na ivakaro ni Turaga.

28E ka talei na muria na Kalou, nona ciqomi keda e na balavu kina na bula.