1Ni rogoca mada na ka oqo, na Isireli,
Oi kemuni o ni kawa mai vei Juta.
O ni sa dau vosa bubului ena yaca i Jiova
Ka vakatusa ni o ni sa vakalou ga
vua na nodra Kalou na Isireli;
Ia ka sega ena yalodina kei na yalo dodonu.
2O ni sa cibitaka ni kaya ni o ni lewe ni koro tabu
Ka sa dau vakararavi vua na nodra Kalou na Isireli
Ka yacana o Jiova ni lewevuqa.
3A sa kaya na Turaga vei Isireli,
“Au a tukuna makawa sara mai na veika ena yaco
Ia au sa qai vakavuna me yaco vakidacala mai.
4Au sa kila ni o ni na vakadrecike
Na domomuni ena kaukauwa me vaka na kaukamea
Kei na yadremuni ena kaukauwa me vaka na parasa.
5Au a tukuna ena gauna makawa na veika ena yacovi kemuni e muri,
Ka'u vakaraitaka vei kemuni na veika ena yaco
Ni ra sa bera ni yaco.
Mo ni kakua ni kaya kina, ni cakava na nomuni kalou matakau,
Ka ra vakavuna me yaco na nomuni matakau parasa.
6Na veika kece au a tukuna era sa yaco oqo;
E dodonu mo ni vakadinadinataka ni sa yaco na veika au tukuna.
Ia oqo au sa na tukuna vei kemuni na veika vou ena yaco,
Na veika au a sa sega ni vakaraitaka e liu.
7Au sa qai cakava me ra yaco wale ga oqo,
E sega ni dua na ka vaka oqo e a bau yaco oti e liu.
Mo ni kakua ni kaya kina, keimami sa kila tu.
8Au sa kila ni o ni na sega ni rawa ni vakadinati,
Me tekivu ni o ni a gone
O ni a kilai tu me dua na dauveisaqasaqa.
Sa i koya oqori na vuna o ni sega ni bau rogoca kina na ka oqo,
Se bau rogoca e dua na kena i tukutuku.
9Au sa tarova tikoga na noqu cudru
Ena vuku ni yacaqu,
Au sa tarova tikoga me'u kakua ni vakarusai kemuni.
10Au a vakatovolei kemuni ena buka ni veivakararawataki
Me vaka na siliva sa vakavoui ena lovo katakata.
11Ia au sa qai raica ni o ni sa tawa yaga.
Na ka au cakava, au sa cakava ga ena vukuqu.
Au na sega ni laiva na yacaqu me beci
Ka'u na sega ni laiva tale vua e dua na noqu dokai
Sa i koya na ka sa noqu, ka noqu taudua ga.”
Digitaki me Veiliutaki o Sairusi12 Aisea 44.6; Vtaki 1.17; 22.13 “Ni vakarorogo mada na Isireli, na matatamata au a digitaka.
Oi au na kena i vakatekivu kei na i vakataotioti
Ka'u sa Kalou taudua ga.
13Na ligaqu e a cakava na yavu kei vuravura
Ka tevuka na lomalagi na ligaqu i matau.
Ena gauna au kaciva kina na vuravura kei na lomalagi,
E rau na lako ruarua mai.
14“Ni soqoni vata kece ka vakarorogo.
E sega ni dua vei ira na kalou matakau e rawa ni yalataka,
Ni na valuti Papiloni na tamata au sa digitaka;
Ena cakava o koya na ka au sa vinakata me cakava.
15Oi au ga au vosa tiko, au sa kacivi koya.
Ka'u sa liutaki koya yani ka solia vua me rawata na veika e cakava.
16“Ia oqo ni toro voleka mai ka rogoca na ka au kaya.
Mai na i vakatekivu au a dau vosa vakamatata vei kemuni
Ka'u dau vakayacora dina na veika au tukuna.”
(Ia oqo sa solia vei au o Jiova na Kalou na nona
Kaukauwa ka talai au.)
Na i Naki i Jiova me Baleti Ira na Nona Tamata17Sa kaya o Jiova, na Kalou Yalo Savasava ni Isireli
O koya sa vakabulai kemuni.
“Oi au o Jiova na nomuni Kalou,
O koya sa vakavulici kemuni ena ka mo ni vinaka kina
Ka vakaraitaka vei kemuni na sala mo ni muria.
18“Kevaka wale ga o ni a muria na noqu i vakaro
Ke a drodro tu ga yani vei kemuni na veivakalougatataki
Me vaka na uciwai e sega ni maca rawa;
Kei na nomuni rawa ka me vaka na veitarataravi ni ua e matasawa.
19O ira na nomuni kawa era na lewe vuqa me vaka na mata ni nuku
Ka na sega ni bokoci na yacadra
Se vakarusai e mataqu.”
20 Vtaki 18.4 Ni biuti Papiloni ka lako yani ena galala.
Ni kailavaka na i tukutuku ni marau,
Ka tukuna yani ki na veivanua kecega:
“Sa vakabulai ira na nona tamata na Isireli o Jiova.”
21Ni na liutaki ira yani na nona tamata o Jiova
Ena dua na vanua katakata ka dravuisiga
Era na sega ni vakaleqai ena viagunu.
Ena vakadavea mai vei ira na wai mai na dua na vatu,
Ena vida rua o koya ka na coka mai kina na wai.
22 Aisea 57.21 Sa kaya o Jiova, “Sa sega ga na vakacegu vei ira era i tovo vakasisila.”
Who We AreWhat We EelieveWhat We Do
2025 by iamachristian.org,Inc All rights reserved.
