1Nira sa rogoca na veimatanitu tani voleka ni sa tara tale na yaletare, vakatabui na loqi tabu, sa duatani nodra cudru,
2era mani lewa mera vakawabokotaki ira na kawa i Jekope era maliwai ira tu. Era sa qai veivakamatei, ra vakacaca.
3Ia o ira na luve i Isoa, sa valuti ira o Jutasa e Akaravatene mai Itumea, baleta nira dau lawavaki ira na kai Isireli. E namuraki ira vakalolomataki ira qai yanaraki ira.
4E nanuma tale ga na nodra itovo ca na luve i Bayani nira dau coriti ira na kai Isireli, qai lawavaki ira e veigaunisala.
5E sogoti ira e na nodra valeniyadra, tuva ivalu e matadra, yalataka me vakawabokotaki ira, qai visa na valeniyadra kei ira kece na lewena.
6Sa qai cavutu me valuti ira na kai Amoni, na yavusa qaqa le levu, nodra iliuliu o Timoci.
7E vala vakavica vata kei ira qai butuqaqi ira; e mokuti ira.
8E rawati Jaseri tale ga kei na kena veikoro, qai suka i Jutia.
9Era qai soqoni e Kiliati na kaitani mera valuti ira na Isireli era maliwai ira tu e nodra vanua, mera vakawabokotaki ira. Ia era dro i na koronivalu o Dacema,
10ra vakau ivola vei Jutasa kei iratou na tacina, e volai kina: “Era sa soqoni vata mai na kaitani e ke mera vakawabokotaki keimami.
11Era sa vakarau mai kaba na koronivalu keimami sa dro mai kina, e liutaka tiko nodra mataivalu o Timoci.
12Dou mai vakabulai keimami ni levu vei keimami sa bale,
13era sa vakamatei kece na weka i keimami era a tiko e na vanua o Tovi; era sa vesu na veitinani kei na iyau, era sa vakamatei e kea e rauta ni le dua na udolu.”
14Ni se wili tiko ga na ivola, era sa tadu mai na mata tale e so mai Kaleli sa kakadresudresu nodra isulu, mera mai vakasavuya na itukutuku vata ga,
15era kaya nira sa tuva e matadra “mera vakawabokotaki keimami” na kai Tolemaisi, Taia kei Saitoni, kei ira kece na kaitani e Kaleli.
16Ni sa rogoca o Jutasa kei ira na lewenivanua na itukutuku qo, era sa kaciva e dua na bose levu se cava mera cakava me baleti ira na wekadra era leqa tu sa valuti ira tiko mai na meca.
17Sa qai tukuna o Jutasa vei Saimoni na tacina, “Digitaki ira nomu tamata, lai vakabulai ira na wekamu e Kaleli; o keirau kei tacidrau o Jonacani, keirau na gole i Kiliati.”
18Qai tataunaki Jutia vei rau o Iosefo na luve i Sakaraia, kei Asaraia na iliuliu vinaka, kei na vo ni mataivalu, mera taqomaka.
19A vakaroti rau vaqo, “Drau liutaki ira qo, drau kua ga ni veivala kei ira na kaitani me yacova neimami lesu mai.”
20Era qai lesi e le tolu na udolu mera tomani Saimoni i Kaleli, e walu na udolu mera tomani Jutasa i Kiliati.
21Sa qai lako o Saimoni i Kaleli, e vala vakavica kina kei ira na kaitani qai qaqiraki ira.
22A cemuri ira yacova na matamata kei Tolemaisi, era bale e tolu beka na udolu na kaitani, e qoqota na nodra iyau.
23Sa qai soqoni ira na Jiu e Kaleli kei Aravata, nodra veitinani kei na nodra iyau kece, qai kauti ira i Jutia e na marau levu.
24Erau kosova na Joretani o Jutasa Makabe kei Jonacani na tacina, rau lako siga tolu e vanua lala.
25Era sotavi ira na kai Navatea. O ira qo, ra veiciqomi, ra vakaraitaka na veika sa yacovi ira na wekadra e Kiliati:
26“E levu era sa virikovuti tu e Bosara kei Bosoro, e Alema kei Jasifo, Maketi kei Karanaimi” — koro lelevu kaukaua kece —
27“e so tale era sa virikovuti tu e na koro tale e so e Kiliati. Era sa vakavakarau na meca mera kaba kece na koronivalu qo nimataka, mera vakamatei ira kece na tamata qo e na dua ga na siga.”
28Sa qai suka vakatotolo i Bosara o Jutasa kei na nona mataivalu e na gaunisala e vanua lala; a vakavua na koro, vakamatei ira kece na tagane e na iselewau; sa qai yanaraka na koro, a visa sara.
29A cavutu e na bogi, ra lako sara i na koronivalu o Dacema.
30Ni cabe na siga, era sa tacake, sa tu e matadra na mataivalu vakaitamera sega ni wili rawa, ra cola ikabakaba kei na iyaragi ni ivalu mera vakavua na koro; era sa valuti ira tiko na Jiu e loma.
31Sa raica o Jutasa ni sa tekivu na ivalu, era sa tagi i lomalagi na lewenikoro e na kaikaila kei na uvu biukila.
32Sa qai kaya vei ira nona tamata, “Ni valataki ira nikua na wekamuni!”
33Sa qai toro yani i dakudra e tolu na kabani, ra uvu biukila, ra kaikaila e na masu.
34Nira sa kila na mataivalu nei Timoci ni ya o Makabe, era qai se. A qai waburaki ira vinaka o koya, era bale kina e na siga ya e walu beka na udolu.
35Sa qai golevi Alema, valuta, taura, vakamatea kece na kena tagane, yanaraka, visa.
36Sa qai cavu na ivalu me lai rawai Jasifo, Maketi kei Bosoro kei na veikoro tale e so e Kiliati.
37Oti qo, a soqona o Timoci e dua tale na mataivalu, lai keba donui Rafoni, e tai ni wai.
38A tala yamata o Jutasa i na keba, eratou qai mai tukuna vua, “Era soqo vua na kaitani kece ni vanua qo, sa tama ni mataivalu vakaitamera.
39Era sa saumi ira tale ga na kai Arapea mera vukei ira, era sa keba tiko e tai, ra vakarau mai valuti iko.” Sa qai lai valuti ira yani o Jutasa.
40Ni sa torova yani na wai o Jutasa kei nona mataivalu, sa kaya o Timoci vei ira nona turaganivalu, “Kevaka e takoso mai e liu, eda na sega ni vorati koya rawa, e na vakadrukai keda dina.
41Ia kevaka me via rere, qai keba e tai, meda takoso yani vua, da vakadrukai koya.
42Ni sa torova na drekeniwai o Jutasa, sa lesi ira na vunivola mera tu e batiniwai, vakaroti ira vaqo: “E tabu ni dua e biri valelaca; mera vala kece.”
43Sa qai takoso e liu, ra muri koya yani nona mataivalu taucoko. Era caqera kece na kaitani, era kolotaka laivi nodra iyaragi, ra dro i na lomanibai tabu e Karanaimi.
44A mani vakavua na koro, visa na lomanibai tabu kei ira kece era tiko kina. Sa rawai o Karanaimi, nira sa sega ni vorati Jutasa rawa.
45O Jutasa sa qai soqoni ira kece na Isireli e Kiliati, na turaga lalai, lelevu, nodra veitinani, na iyau, na ilala levu - mera lako i na vanua o Juta.
46Era mani yaco yani i Eferoni. Qo na koro levu kaukaua e gaunisala, era sega ni rawa ni muri i na imawi se imatau, mera curuma ga.
47Ia era latia na matamata na lewenikoro e na vatu.
48A vakauta vei ira o Jutasa na itukutuku malumalumu qo: “Me keimami bau takoso mada e nomuni vanua me keimami yacova na neimami. E sega ni dua e na vakaleqai kemuni, keimami via taubale ga yani.” Era bese ga na dolava vua.
49Sa qai vakarota o Jutasa me kacivaki vei ira na mataivalu mera dui keba ga e na vanua era tiko kina.
50Era sa mani keba na mataivalu, qai valuta na koro, siga kei na bogi, sa qai rawa.
51A vakamatei ira kece na tagane e na iselewau, yanaraka na koro qai visa. Sa qai kakalawaci ira ga na mate e loma ni koro e na nona takoso yani.
52Era kosova na Joretani, vavaca yani na buca levu e mata i Becisani.
53O Jutasa a vakayaloqaqataki ira na vakaberabera, veivakauqeti tiko ga, me yacova na vanua o Juta.
54Era cabeta na dela i Saioni e na marau kei na reki, ra vakacabo isoro kama kina baleta ni sega ni dua e leqa, ra sa lesu bula kece mai.
55E na gauna erau tiko mai kina i Kiliati o Jutasa kei Jonacani e tiko e Kaleli o Saimoni na tacidrau,
56erau sa rogoca o Iosefo na luve i Sakaraia kei Asaraia na iliuliu ni mataivalu, na nodra yaloqaqa e na ivalu.
57Erau kaya, “Medaru saga tale ga medaru rogo, daru lai valuti ira na kaitani era maliwai keda tu.
58Erau mani vakaroti ira na nodrau mataivalu mera cavutu mera valuti Jaminia.
59Sa qai biuta mai na koro o Qojiasi kei ira nona tamata mera vala.
60Erau sa druka vakaca sara o Iosefo kei Asaraia, rau cemuri me yacova sara na yalayala kei Jutia; era moku mate e na siga ya e rua beka na udolu na kai Isireli.
61Era vakalolomataki gona baleta ni nodrau via rogo e na yaloqaqa, erau sega ni vakarorogo kina vei Jutasa kei iratou na tacina.
62Erau sega ga ni lewe ni mataqali a rawata na tugalala nei Isireli.
63Eratou rokovi vakalevu o Jutasa kei iratou na tacina e Isireli, vakina vei ira na kaitani e na vanua kece e rogo kina na yacadratou.
64Era soqo mai vei iratou na tamata mera vakacaucautaki iratou.
65Eratou sa qai lako o Jutasa kei iratou na tacina meratou veivala kei ira na luve i Isoa i na ceva. A samuti Eperoni kei na kena veikoro, talaraka na koronivalu, visa na valeniyadra ra wavokita.
66Sa qai cavu yani i na nodra vanua na kai Filisitia, muri vaka e Marisa.
67Era bale e na siga ya na bete e so era via rogo e na yaloqaqa ra qai lewa cala mera lai vala.
68A golevi Asoto e nodra vanua na Filisitia o Jutasa, basuraka nodra yaletare, vakama nodra kalou matakau, yanaraka na veikoro qai lesu tale i na vanua o Juta.
Who We AreWhat We EelieveWhat We Do
2025 by iamachristian.org,Inc All rights reserved.
