2 Veigauna 28 - Vakavakadewa Vou kei na iVola tale eso（FNVDC12）

O Easi na Tui Juta(2Tui 16.1-4)

1A sa yabaki ruasagavulu o Easi ena gauna a tekivu veiliutaki kina vakatui mai Jerusalemi; a sa veiqaravi voli vakatui ena loma ni tinikaono na yabaki. A sa sega ni vakayacora o koya na ka dodonu e mata i Jiova, me vakataki Tevita na nona i tubutubu,

2ia sa muria ga na we ni yavadra na tui Isireli. E a cakava na matakau buli eso vei ira na Peali.

3A bau la'ki vakama talega o koya na ka boi vinaka ena Buca o Inomi, ka sa vakacabori ira me ra i soro kama na luvena ena bukawaqa, me vaka na nodra i valavala velavela na veimatanitu tani, ka vakasavi ira tani kina o Jiova e matadra na Isireli.

4A vakacaboisoro talega ka vakama na ka boi vinaka ena veitikina cecere, kei na veidelana, kei na ruku ni veikau drokadroka kecega.

Na i Valu i Siria kei Isireli(2Tui 16.5)

5 2Tui 16.5; Aisea 7.1 Ena vuku ni ka oqo, a soli koya yani o Jiova na nona Kalou ki na ligana na tui Siria, ka ni a vakamalumalumutaki koya, ka tauri ira vakabobula era lewe vuqa sara na nona tamata, ka kauti ira ki Tamasiko. A soli koya talega o Jiova ki na ligana na tui Isireli, ka vakamalumalumutaki koya ena dua na ravuravu levu.

6A sa ia na veivakamatei o Peka na luve i Rimalaia e Juta ena loma ni dua ga na siga, ni sa vakamatei kina e lewe 120,000 era sotia qaqa kece sara, baleta ni ra a biuti Jiova na Kalou ni nodra qase.

7A sa dua na sotia qaqa ni Isireli ka yacana o Sikiri sa vakamatei Mesa na luve i Easi na tui, kei Asirikame na vakailesilesi ni valenitui, kei Ilikana, o koya sa tarava na tui ena liutaki ni matanitu.

8Era a tauri ira vakabobula na kai Isireli era lewe 200,000 vei ira na wekadra, na yalewa na gonetagane, kei na goneyalewa; ka levu talega na i toki ni valu era kauta mai vei ira ka tokitaka sara ki Samaria.

Na Parofita o Oteti

9A sa tiko e kea e dua na parofita i Jiova na yacana o Oteti; a sa lako yani o koya ka la'ki tavaki ira na mataivalu sa lako yani ki Samaria, a sa kaya vei ira, Raica, ena vuku ni nona a cudruvi Juta o Jiova na Kalou ni nomuni qase, a sa soli ira kina ki na ligamuni; ia, o ni a qai vakamatei ira ena dela ni cudru katakata ka sa yaco sara yani ki lomalagi.

10Ia oqo, sa lomamuni mo ni vakamalumalumutaki ira na Juta kei ira mai Jerusalemi me ra nomuni bobula, na tagane kei ira na yalewa. Ia e sega li ni tu na nomuni dui i valavala ca vei Jiova na nomuni Kalou?

11Ni rogoci au mai! O ira o ni sa vesuka mai oqo era sa wekamuni ga. Ni sereki ira me ra lako, de qai totogitaki kemuni o Jiova ena nona cudru waqawaqa.

12Era a qai tucake eso vei ira na turaga mai vei ira na Ifereimi, o Asaraia na luve i Joanani, o Berekaia na luve i Mesilemoce, o Jesikaia na luve i Saluni, kei Amasa na luve i Atilai, ka saqati ira na qai suka mai na i valu,

13a kaya vei ira, Mo ni kakua sara ni kauti ira mai ke na bobula, ena vuku ni o ni a nakita mo ni kauta mai vei keimami na cala vei Jiova, me kena i kuri ni noda i valavala ca kei na nodra caka cala, ka sa qai waqawaqa sara ga na cudru vei ira na Isireli.

14Era a sereki ira na bobula, ka ra laiva na i toki ni valu o ira na tamata vakaiyaragi e matadra na turaga, kei na i soqosoqo taucoko.

15E ratou a tucake na lewe va ka cavuti yadua na yacadratou, ka kauti ira na bobula, vakasulumi ira kece era a luvawale, ena i toki ni valu; vakaivavataki ira, vakani ira, vagunuvi ira, lumuti ira; ka ra vakavodoki kece na malumalumu ena asa, ka kauti ira ki na wekadra mai Jeriko, na koro ni veiniu. Era a qai lesu tale ki Samaria.

Kere Veivuke o Easi ki Asiria(2Tui 16.7-9)

16Ia ena gauna o ya, a talatala o Easi na tui vei tui Asiria me kere veivuke.

17Era a kabai Juta tale na kai Itomi, era sa vakamalumalumutaki ira ka vakabobulataki ira.

18Era a kabakoro talega yani na kai Filisitia ki na veikoro ena vanua o Sepela kei Nejevi e Juta, ka ra vakadrukai Peci Semesi, o Eijaloni, o Kiteroci, o Soko kei na kena veikoro, o Timina kei na kena veikoro, o Qimiso kei na kena veikoro; ka ra sa qai la'ki vakaitikotiko kina.

19Ni sa vakamalumalumutaki Juta o Jiova ena vuku i Easi na tui Isireli, baleta ni a vakayacora na i valavala tawa kilikili vei ira na Juta o koya, ka sega ni yalodina vei Jiova.

20A sa lako mai vua o Tikilacapilineri na tui Asiria ka qai vakararawataki ira tale, ka sega ni taqomaki koya.

21Ni taura o Easi na ka eso mai na vale i Jiova kei na valenitui, mai vei ira talega na turaga, ka soli ka ni loloma vua na tui Asiria; ia a sega ga ni vukei koya.

Na i Valavala Ca i Easi

22Ena gauna e ca vakalevu kina na nona leqa, sa qai levu cake ga na i valavala i Easi na tui vei Jiova.

23A sa vakacaboisoro vei ira na kalou ni vanua o Siria, o ira ka vakadrukai koya ena i valu. A sa kaya, Me vaka ni a vukei ira na tui ni Siria na nodra veikalou na kai Siria, au sa na vakacaboisoro kina vei ira, ka me ra vukei au talega kina. Ia oqo sa vakavuna na nona rusa kei na nodra rusa na Isireli.

24A kumuna vata o Easi na bilo ni vale ni Kalou ka tatalaka vakamatailalai. A sa sogota na katuba eso ni Valenisoro ka cakava eso na nona i cabocabonisoro ena veiyasana kecega e Jerusalemi.

25A sa tara o koya eso na vanua ni sokalou ki na kalou tani ena veikoro yadua e Juta, me vakama kina na ka boi vinaka vei ira na kalou tani. Ena ka oqo sa cudruvi koya kina o Jiova na Kalou ni nona qase.

26Ia na vo ni nona cakacaka, kei na nona i valavala kecega, mai na kena i tekivu, ki na kena i otioti, raica, era a volai ena Kedra i Vola na Tui Juta kei Isireli.

27Aisea 14.28A bale ka moce o Easi kei ira na nona qase, ka bulu ena koro, o Jerusalemi, ni ra a sega ni kauti koya ki na nodra i bulubulu na tui Isireli. A lewa o Esekaia, na luvena me kena i sosomi.