1 Aisea 13.1–14.23; Jere 50.1–51.64 A sa kaya o Jiova,
“Papiloni, siro sobu mai na nomu i tikotiko vakaturaga,
Ka mai dabe ena qele.
O a vaka e dua na gone yalewa,
E dua na koro sega ni druka rawa!
Sa oti na kemu totoka kei na kemu lagilagi!
O sa yaco oqo mo dua na bobula!
2Yavalata na vatu ni qaqi ka qaqia na falawa!
Biuta tani na nomu i pulou ka luvata tani na nomu i sulu vinaka.
3Era na raica na tamata na nomu vakamaduataki,
Kei na nomu luvawale.
Au sa na sauma lesu na nomu ca
Ka sega ni dua me na tarovi au.”
4Sa noda i vakabula na Kalou Yalo Savasava ni Isireli
Ka sa yacana o Jiova ni lewevuqa.
5A sa kaya o Jiova vei Papiloni,
“Mo dabe galugalu ena vanua butobuto,
Era sa na sega tale ni kacivi iko mo ranadi ni veimatanitu!
6Au a cudruvi ira na noqu tamata.
Ka'u a cakava vei ira na i vakarau me vaka era sa sega ni noqu tamata:
Au a soli ira yani ki na ligamu,
Ia o sa sega ni lomani ira;
Ka vakacakacakataki ira vakaukauwa na qase.
7O a nanuma ni o na ranadi tikoga me tawa mudu
Ka sega ni vakasamataka na veika oqo e lomamu
Se vakananuma na kedra i cavacava kece.
8 Vtaki 18.7,8 Rogoca mada oqo o iko sa dau lomana na marau,
Ka nanuma ni o sa galala ka taqomaki vinaka.
O sa okata e lomamu mo cecere sara me vaka na Kalou
Ka sega tale ni dua me vakataki iko.
O nanuma ni o na sega ni yaco mo yada
Se rarawataka na nodra mate na luvemu.
9Ia, ena dua ga na gauna ena dua na siga,
Ena yaco ruarua kina vei iko na ka oqo.
Veitalia sara ga na veikaukauwa mana kece o na vakayagataka,
Era na yali ga na luvemu ka yaco mo yada.
10“O nanuma ni o sa taqomaki vinaka ena nomu i valavala ca.
O nanuma ni sega ni dua e kunei iko rawa.
Sa vakacalai iko na nomu vuku kei na kila-ka,
Ka kaya vakai iko ni o sa kalou,
Ka sa sega tale ni dua me vakataki iko!
11Ena yaco mai vei iko na veivakarusai
Ka na sega ni dua na nomu cakacaka mana me na tarova.
Sa na yaco vakidacala mai na rusa vei iko,
Na rusa o a sega mada ni bau tadra.
12Maroroya kece tiko na nomu kaukauwa mana kei na daurairai
O a dau vakayagataka me tekivu mai na gauna ni nomu gone.
De na rairai ena vukei iko ena so na ka,
Ka na rairai vakarerei ira na kemu meca.
13O na malumalumu ga ka veitalia sara na levu ni vakasala o rawata.
Laivi ira na nomu daunivakasala me ra lako mai ka vakabulai iko,
Oqo o ira era dikeva na veikalokalo,
Ka yalana na veiyalayala ni lomalagi
Ka ra dau tukuna tiko vei kemuni ena veivula
Na veika kece ena yacovi kemuni.
14“Era na vaka na tikitiki ni co madu,
Ka ra na vakamai ena buka!
Era sega mada ga ni vakabulai ira rawa
Mai na yameyame ni buka.
E sega ni qilaiso me caka kina na tatalai
Se me da dabe voleka kina.
15Ena vaka oqo na ka era cakava o ira era dau vakasalataki iko,
O ira o a dau oca ni qaravi ira me tekivu sara ni o sa gone.
Era na biuti iko tu ka dui lako yani ena nodra sala,
Ka na sega ni vo e dua me vakabulai iko.”
Who We AreWhat We EelieveWhat We Do
2025 by iamachristian.org,Inc All rights reserved.
