1A sa yabaki tinikarua o Manasa ni sa buli me tui. A sa veiliutaki voli vakatui mai Jerusalemi ena loma ni 55 na yabaki.
2Jere 15.4A sa dau vakayacora na i valavala ca o koya ena mata i Jiova, me vaka na nodra i valavala vakasisila na veimatanitu tani, o ira ka vakasavi ira tani o Jiova e matadra na Isireli.
3A tara vou tale o koya na veitikina cecere ka a basuraka sobu o Esekaia na tamana, a sa vakaduria tale na i cabocabonisoro me nodra na Peali, ka cakava na kalou yalewa ni veikau, a soro ka qaravi ira talega na kalokalo ni lomalagi.
42Vei 6.6A cakava talega o koya eso na i cabocabonisoro i Peali ena vale i Jiova, ia a sa kaya oti ki na Vale oqo o Jiova, Ena tikotiko ga mai Jerusalemi na yacaqu, ka sega ni mudu.
5A cakava talega o Manasa eso na i cabocabonisoro vei ira kecega na kalokalo ni lomalagi ena lomanibai ruarua ena vale i Jiova.
6A sa vakacabori ira na luvena ena Buca o Inomi me ra nona i soro kama. A sa dau lakovi ira na daurairai, ka qarava na i vakatakilakila kei na caka i sausau; a dau curuma na nodra i soqosoqo na dau vakadraunikau kei na vakaluveniwai. A sa valavala ca vakalevu sara o Manasa ka vakavuna me cudru vakalevu kina o Jiova.
71Tui 9.3-5; 2Vei 7.12-18A sa vakaduria e dua na matakau ceuceu ka cakava ga o koya ena loma ni Valenisoro, na vanua ka sa vosa oti kina na Kalou vei rau o Tevita kei Solomoni na luvena, ni sa kaya vakaoqo, Na koro o Jerusalemi ena Valenisoro oqo sai koya na tikina ka'u sa digitaka mai na nodra vanua na veimataqali kecega e tinikarua e Isireli me vanua me'u na dau qaravi kina.
8Ni kevaka era sa muria kece na Lawa ka a solia vei ira o Mosese na noqu tamata, au na qai sega kina ni vakatara me ra biu tani mai na vanua ka'u a solia vei ira na nodra qase.
9A sa liutaki ira na Juta o Manasa me ra vakayacora na i valavala ca sa levu cake sara mai na kena era dau vakayacora na veimatanitu ka sa vakarusa oti o Jiova e matadra na Isireli.
10A vosa vei Manasa o Jiova vei ira talega na nona tamata; ia era a bese sara ni rogoca.
11Ia ni vaka tu oqo, a kauti ira mai kina na i liuliu ni mataivalu i tui Asiria o Jiova, era a mai tauri Manasa, vauci koya ena wa vakavotona, ka vesuki koya ena sinucodo parasa, ka kauti koya ki Papiloni.
12Ia ni a rarawa vakalevu sara o koya, a qai vakamamasu vei Jiova na nona Kalou ka vakamalumalumutaki koya vakalevu sara ena mata ni Kalou ni nona qase.
13A masu vua, a ciqoma o Jiova ena nona vakamamasu, a sa yalo vinaka vua, ka kauti Manasa tale ki Jerusalemi ki na nona matanitu. A qai kila e kea o koya ni sa Kalou dina duadua ga o Jiova.
14Ia e muri, a qai viria o koya e dua na bai ena taudaku ni koro i Tevita mai na ra ni ulu ni wai na Qihoni, ena buca, ka yala ena Matamata ni Koro ni Ika, ka kauta yani me vakavolivoliti Ofeli, ka viria na bai me cecere sara; a vakatikori ira na turaganivalu ena veikoro ni valu e Juta.
15A kauti ira tani na kalou tani kei na matakau ceuceu mai na vale i Jiova, kei na veicabocabo ni soro kecega ka tara o koya ena ulunivanua ni vale i Jiova, kei Jerusalemi talega, ka sa biuti ira tani ki na taudaku ni koro.
16A sa vakavinakataka talega na i cabocabonisoro i Jiova, ka vakacabora kina na i soro ni veivinakati kei na i soro ni vakavinavinaka. A sa vakaroti ira kece na Juta me ra qaravi Jiova, na nodra Kalou na Isireli.
17Ia era a vakacaboisoro tiko o ira na tamata ena veitikina cecere, ia vei Jiova ga na nodra Kalou.
18Ia na veika tale eso sa vakayacora o Manasa, na nona masu vua na nona Kalou, kei na nodra vosa na parofita era vosa vei koya ena yaca i Jiova na nodra Kalou na Isireli, era sa volai kece ena i Vola Tukutuku ni Tui Isireli.
19Na nona masu na tui kei na i sau ni masu mai vua na Kalou, na i tukutuku me baleta na i valavala ca e vakayacora ni bera na nona veivutuni, oqori na cala ka kitaka, na vanua ni qaravi kalou tani kei na i vakatakarakara ni kalou yalewa o Asera ka sa bulia, vata kei na veimatakau e cuva kina, a sa volai ena nodra i Vola Tukutuku na Parofita.
20A sa mate o Manasa, ka sa buluti na yagona ena valenitui; ka sa sosomitaki koya o Emoni na luvena ena veiliutaki vakatui.
O Emoni na Tui Juta(2Tui 21.19-26)21A yabaki ruasagavulu karua o Emoni ena gauna a vakatekivu veiliutaki kina, mai Jerusalemi ka yabaki rua.
22A valavala ca o koya ena mata i Jiova me vaka a cakava o Manasa na tamana. A vakacaboisoro o Emoni ki na matakau ceuceu kece ka a cakava o Manasa na tamana, ka qaravi ira.
23A sega ni vakamalumalumutaki koya ena mata i Jiova, me vaka ni a vakamalumalumutaki koya o Manasa na tamana, ia o Amoni oqo, a qai toro cake ga na nona i valavala ca.
24Era a buki kena vere o ira na nona tamata, ka ra vakamatei koya ena nona vale.
25Ia o ira na lewe ni vanua era a vakamatei ira kece na a bukia na vere kei Emoni na tui ka ra buli Josaia na luvena me tui me kena i sosomi.
Who We AreWhat We EelieveWhat We Do
2025 by iamachristian.org,Inc All rights reserved.
