Dauveilewai 13 - Vakavakadewa Vou kei na iVola tale eso（FNVDC12）

Na Sucu nei Samisoni

1Era sa vuki tani tale na Isireli ni ra sa caka ca ena mata i Jiova, ka sa soli ira o Jiova ki na ligadra na kai Filisitia me 40 na yabaki.

2A bula donuya na gauna o ya e dua na tamata mai na koro o Sora, mai na mataqali i Tani, ka yacana o Manoa. A sa sega na luvena baleta ni sega ni vakaluveni rawa o watina.

3Sa qai rairai vua na yalewa na agilosi i Jiova ka tukuna: “O iko a sega ni vakaluveni rawa tiko, ia o na kunekune ka vakasucuma e dua na gonetagane.

4Ia mo qarauna mo kakua ni gunuva na waini se na gunu kaukauwa ni mateni, se kania e dua na kakana e sega ni savasava;

5ni o na kunekune ka vakasucuma e dua gonetagane, ka mo kakua ni kotiva na drauniuluna, baleta ni sa na vakatabui vua na Kalou mai na siga e sucu kina, me okati na gone oqo me nasiraiti. Ena tekivuna o koya na cakacaka ni nodra sereki na Isireli mai na ligadra na kai Filisitia.”

6A lako yani na yalewa me tukuna vua na watina ka tukuna, “A lako mai vei au e dua na tamata ni Kalou, ia na kena i rairai sa vaka na agilosi ni Kalou, e rairai bibi ka rerevaki, au a sega ni taroga vua se lako mai vei, ka sega ni tukuna vei au na yacana,

7ia e kaya ga vei au: “O na kunekune ka vakasucuma e dua na gonetagane. Ia mo kakua ga ni gunuva na waini se dua na gunu kaukauwa ni mateni, me'u kakua ni kania e dua na ka e sega ni savasava, baleta na gonetagane oqo me na vakatabui vua na Kalou me nasiraiti mai na nona sucu ka yacova na nona mate.”

8A vakamamasu vei Jiova o Manoa ka kaya: “Kemuni na noqu Turaga, au sa vakamamasu mo ni vakalesui koya tale mada mai na tamata ni Kalou o ni a tala mai me mai tukuna ka vakavulici keirau ena veika me keirau cakava ena vuku ni gone ena sucu mai.”

9A rogoca na masu i Manoa na Kalou, ka sa lako tale mai na agilosi ni Kalou vua na yalewa ena nona a tiko voli ena i teitei; ia sa sega ni tiko vata kei koya na watina o Manoa.

10A qai cici yani na yalewa ka tukuna vua na watina, “Na tamata ka a lako mai vei au ena siga o ya, sa rairai tale mai oqo vei au.”

11A tucake o Manoa ka muria yani na watina. A sa yaco yani vua na tamata ka taroga, “Sai kemuni beka na tamata ka vosa vua na watiqu oqo?”

A sa kaya o koya, “Sai au ga.”

12A sa taroga tale o Manoa, “Ena gauna sa na yaco me dina kina na nomuni vosa, a cava li me na vakayacora na gone oqo? Kei na mataqali i tovo ni bula cava me muria?”

13A sa tukuna na agilosi i Jiova vei Manoa: “Me rogoca vinaka ga na watimu na veika kece au sa tukuna vua ka me talairawarawa kina.

14Me kakua ni kania o koya e dua na ka sa lako mai na vunivaini; me kakua ni gunuva na waini se dua na gunu kaukauwa ni mateni, se kania e dua na kakana tawa savasava. Me doka ka vakamuria na veika kece sara ka'u sa vakarota vua.”

15A sa tukuna o Manoa vua na agilosi i Jiova: “Au kerea mo ni wawa mada. Me keirau la'ki vakarautaka mada e dua na luve ni me vei kemuni.”

16A mani tukuna na agilosi i Jiova vei Manoa, “Kevaka o na tarovi au, au na sega ni kania na kakana. Ia kevaka o via vakarautaka tikoga, ia mo qai cabora ga vei Jiova.” (A sega ni kila o Manoa ni sai koya ga na agilosi i Jiova na tamata oqo.)

17A sauma lesu o Manoa ka tukuna, “Ni tukuna mada mai vei keirau na yacamuni, ka me keirau vakacerecerei kemuni kina ni sa yaco dina na nomuni vosa.”

18A sa taroga lesu vua na agilosi i Jiova, “A cava o sa taroga kina na yacaqu? Ni sa veivakurabuitaki ka dredre me kilai.”

19A sa qai kauta na luve ni me kei na sila o Manoa ka vakacabora ena dela ni vatu vei Jiova, vei koya sa dau cakava na ka e veivakurabuitaki.

20Ia ni sa lako cake na yameyame ni buka mai na i cabocabonisoro, a sa raica vakakina o Manoa kei watina na nona sa lako cake talega na agilosi i Jiova ena yameyame ni buka; ka rau sa cuva vakatoboicu ga ki na qele.

21A sega tale ni rairai mai vei Manoa kei na watina na agilosi i Jiova. A qai kila o Manoa ni sai koya ga o ya na agilosi i Jiova.

22A sa tukuna o Manoa vei watina: “E daru na mate vakaidina, baleta ni daru sa raica na Kalou!”

23Ia sa qai tukuna vakaoqo na watina, “Kevaka sa nakita o Jiova me vakamatei kedaru, ke a sa sega ni vakadonuya na nodaru vakacaboisoro; ke a sega talega ni vakaraitaka ka tukuna vei kedaru na veika kece sara oqo.”

24A vakasucuma na yalewa e dua na gonetagane ka vakayacani koya o Samisoni. A tubu cake na gone ka sa vakalougatataki koya o Jiova.

25A sa vakatekivu me vakaukauwataki koya na yalo i Jiova ena nona a tiko voli ena tadrua ni vanua o Sora kei Esitaoli, ena i tikotiko o Tani.