Yalomatua 16 - Vakavakadewa Vou kei na iVola tale eso（FNVDC12）

1Sa tau donu gona vei ira na tamata qo me kedra kuita na manumanu vaqo, mera kune rarawa e na qele ni manumanu vakaitamera.

2Lako 16.11-13; Tiko 11.31,32Ia oni a sega ni vakararawataki ira vaqo nomuni tamata, oni a lomani ira, oni a solia na kedra bici, na icoi uasivi me vakamamautaki ira.

3Ia o ira na kai Ijipita, sa vuka vakadua nodra viakana e na vakasisila ni manumanu oni a tala vei ira. Ia o ira nomuni tamata, e lekaleka ga na nodra viakana, era sa qai kania na kakana maleka.

4A donu nodra kuitataki na dauveivakararawataki, mera raica nomuni tamata nodra vakararawataki na kedra meca.

5Tiko 21.6-9E na gauna era katilaki ira tiko kina nomuni tamata na gata, vakamatei ira e na batidra gaga, a sega ni mani dede nomuni cudru.

6Era vakararawataki ga vakalekaleka mera vuli kina, oni a qai sereki ira e na ivakatakilakila ni gata varasa mera nanuma kina na nomuni ivunau.

7O koya e rai kina, sa bula, sega ni baleta na ka e raica, e baleti kemuni ga, na ivakabula ni kawatamata.

8E na ka tale ga qo, oni sa vakadinadinataka kina vei ira na keimami meca ni o kemuni ga oni veisereki mai na ca.

9Era mate e na ikata ni vodre kei na lago, sega ni kune na kena iwali, ni donu ga mera totogitaki vaqo.

10Ia o ira na luvemuni, a sega mada ni rawati ira na gata batigaga, ni a sobuti ira na nomuni loloma qai vakabulai ira.

11Era laukata mera nanuma kina nomuni ivakaro, era sa qai vakabulai totolo tale dera qai guilecavi kemuni sara vakadua, sega ni vakawa na nomuni loloma.

12E sega ni vakabulai ira na draunikau se na ibulu, na nomuni vosa saka ga e bula kina na tamata kece,

13nioni lewa na bula kei na mate, oni veituberi i na matamata i Etesi qai veivakasukai tale.

14Na tamata ca e laba, e sega ga ni rawa ni kauta tale mai na yalo sa yali, se sereka na yalo e vesu tu.

Kuitataki o Ijipita e na cagilaba

15E sega ni rawa na dro mai ligamuni;

16o ira na tamata ca era besetaki kemuni, era sa kuitataki e na ligamuni qaqa, era sa kana uca, na ucaqereqere, kei na cagilaba, qai kama yavu.

17Na ka veivakurabuitaki duadua, e caudre vakalevu na buka e loma ni wai, na isui sara ga ni buka, baleta ni veikabuli e dau totaka na tamata yalododonu.

18E dua na gauna a tarovi kina na buka me kua ni vakamai ira na manumanu era talai mera kedra kuita na tamata ca, mera kila kina ni sa tau vei ira na nomuni lewa na Kalou.

19E dua tale na gauna, e loma mada ga ni wai, a caudre vakalevu kina, me kama yavu kina na iteitei e na nodra vanua na tamata ca.

Soli na kedra na yagilosi vei ira na Isireli

20 Lako 16.1-36 Ia o ira na nomuni tamata e duatani, oni a vakani ira e na kakana ni yagilosi. Era sega ni bunotaka na kedra, oni solia ga mai lomalagi na madrai sa buta rawa tu, madrai maleka, taleitaki raraba.

21Na nomuni veivakani a laurai kina na nomuni vakamenemenei ira na luvemuni. Sa qai vuki na ikanakana ni madrai me vaka nodra dui gagadre na kania.

22Na ucacevata kei na waicevata a sega ni waicala e na bukawaqa, mera kila kina nomuni tamata ni buka vata ga a kama yavu kina na nodra vuaniqele na meca e loma ni ucaqereqere,

23na buka e ro e na ucabi, a vakuai koya mera kana kina na yalododonu.

24Na veikabuli e qaravi kemuni na Dauveibuli; e dau gu me kuitataki ira na cala, qai yalomalua vei ira na nuitaki kemuni.

25Sa mani veivukiyaki e na gauna ya me sala ni nomuni veivakani loloma me vaka na nodra dui gagadre na leqa tiko;

26mera kila saka tale ga na luvemuni lomani ni sega ni bula na tamata e na vuaniqele, na nomuni vosa ga e maroroi ira na nuitaki kemuni.

27Na ka a sega ni kama yavu, ni cilavi siga vakalailai ga, sa waicala,

28me macala kina ni dodonu me yadra e dua ni bera ni cabe na siga me vakavinavinaka vei kemuni, me masu vei kemuni ni se qai kida na rarama.

29Na vakanuinui ni tamata dididi, e na waicala me vaka na tegucevata, qai drodro laivi vaka na wai ca.