1Ena kauti kemuni o Jiova na nomuni Kalou ki na vanua mo ni la'ki taukena ka tawana, ia ena vakasavi ira yani e vuqa sara na matanitu e matamuni, o ira na Itaiti, na Kakesaiti, na Amoraiti, na kai Kenani, na Perisaiti, na Ivaiti vata kei ira na Jepusaiti, e vitu na matanitu era lewe levu ka kaukauwa cake mai vei kemuni.
7“A sega ni vu ni nona lomani kemuni ka digitaki kemuni o Jiova baleta ni o ni sa lewe levu cake mai vei ira na veimatatamata tani tale eso; sai kemuni na matanitu lailai duadua e vuravura.
8Ia sa lomani kemuni o Jiova ka gadreva me maroroya na nona vosa ni yalayala ka vakayacora vei ira na nomuni qase. Sai koya oqo sa vakabulai kemuni kina ena nona kaukauwa levu ka sereki kemuni kina mai na nomuni vakabobulataki vua na tui Ijipita.
9O koya oqo mo ni kila ni sa Kalou duadua ga o Jiova na nomuni Kalou, ka sa yalodina o koya. Sa dau maroroya na nona veiyalayalati ka vakaraitaka na nona loloma tawa yalani vei ira sa lomani koya ka muria na nona i vakaro me yacova na udolu na nodra i tabatamata.
13Ena lomani kemuni ka na vakalougatataki kemuni mo ni lewe vuqa. Ena vakalougatataka na vua ni ketemuni, kei na vua ni nomuni qele, na waini vou kei na waiwai. Ena vakalevutaka na nomuni bulumakau kei na sipi. Ena solia vei kemuni na veivakalougatataki kece ni vanua ka yalataka vei ira na nomuni qase ni na solia vei kemuni.
14O ni na vakalougatataki vakalevu cake mai vei ira na veimatanitu kecega. Ena sega ni dua na tagane se yalewa me na sega ni vakaluveni vei kemuni, ka na vaka talega kina na nomuni manumanu.
15Ena maroroi kemuni mai na veimate kecega o Jiova. Ena sega ni vakatauva vei kemuni na veimate ca ka rerevaki o ni a raica mai Ijipita, ia ena vakatauva ga vei ira na kemuni meca.
16Ni vakarusa sara vakadua na veimatanitu kece sa solia vei kemuni o Jiova na nomuni Kalou ka mo ni kakua sara ni lomani ira. Ni kakua ni qarava na nodra kalou matakau, baleta ni na vakaleqai kemuni.
17“Mo ni kakua ni nanuma ni ra lewe levu cake mai vei kemuni, ka o ni na qai vakasavi ira tani vakacava?
18Ni kakua sara ni rerevaki ira; ni nanuma na ka sa cakava o Jiova na nomuni Kalou vua na tui Ijipita kei ira kece na nona tamata.
19Ni nanuma na veika rerevaki o ni a raica e matamuni, na veicakacaka mana kei na veika veivakurabuitaki; na kaukauwa levu kei na i gu sa sereki kemuni kina o Jiova na nomuni Kalou. Ena vakarusai ira kece na veimatanitu o ni rerevaki ira tiko oqo o Jiova.
20Me kena i kuri ena vakatauva vei ira na mate ca o Jiova me yacova ni ra sa vakarusai kece o ira na dro bula.
21Ni kakua sara ni rerevaki ira na tamata oqo. Sa tiko kei kemuni o Jiova na nomuni Kalou, na Kalou levu sa dodonu me rerevaki.
22Ena vakasavi ira tani yani vakalalai na veimatanitu oqo o Jiova, ia o ni na sega ni vakarusai ira taucoko ena dua ga na gauna, ia kevaka kina, ena tubu me levu na i wiliwili ni manumanu kila ka ra na qai vakatubu leqa vei kemuni.
23Ena soli ira na kemuni meca ki na ligamuni o Jiova, ka na vakavuna na nodra veilecayaki me yacova ni ra sa vakarusai.
24Ena soli ira na nodra tui ki na ligamuni; o ni na vakamatei ira ka ra na guilecavi sara yani vakadua. Ena sega ni dua me na rawa ni tarovi kemuni; me yacova ni o ni sa vakarusai ira kece sara.
25Mo ni vakama na nodra matakau ena buka. Kakua ni domona na siliva se na koula era kabi tu kina; ni kakua ni kauta me nomuni de yaco me vu ni leqa vei kemuni ka ni sa cata sara na qaravi kalou matakau o Jiova.
26Mo ni kakua ni kauta e dua vei ira na veimatakau oqo ki na nomuni veivale de yaco vei kemuni na ka ca ka dodonu me yacovi ira. Mo ni cata ka vakasisilataka na veimatakau oqori ka ni sa tu kina na cudru i Jiova.
Who We AreWhat We EelieveWhat We Do
2025 by iamachristian.org,Inc All rights reserved.
