2 Veigauna 34 - Vakavakadewa Vou kei na iVola tale eso（FNVDC12）

O Josaia na Tui Juta(2Tui 22.1-2)

1 Jere 3.6 A yabaki walu o Josaia ni buli me Tui, a tui ka lewa tiko e Jerusalemi me tolusagavulu kadua na yabaki.

2A cakava o koya na veika vinaka ka dodonu ena mata i Jiova, ka lako ena sala kecega a muria na nona qase o Tevita; ka sega ni vuki tani ki na i matau se ki na i mawi.

Saqata na Qaravi Kalou Tani o Josaia(2Tui 23.4-20)

3Ena i kawalu ni yabaki ni nona veiliutaki vakatui o Josaia, ni se gone sara, sa vakatekivu me qarava na Kalou i tamana o Tevita na tui. Ni oti e va na yabaki, a sa vakatekivu me vakarusa laivi na vanua ni qaravi kalou tani, kei na i vakatakarakara eso ni kalou yalewa o Asera, kei na kalou matakau tale eso.

42Tui 21.3; 2Vei 33.3Ena ruku ni nona veiliutaki, era a basuraka na i veicabocabonisoro e dau qaravi kina o Peali, ka vakarusai ira na i cabocabo ni ka boi vinaka era tu volekata. Era a vorolaka vakamatailalai na i vakatakarakara kece ni kalou yalewa o Asera kei ira na kalou matakau tale eso, ka qai kaburaka yani na kena dravusa ena dela ni nodra i bulubulu o ira ka ra dauqarava.

51Tui 13.2A vakama talega o koya na suidra na bete ni veikalou tani ena dela ni nodra i cabocabonisoro. Ena ka oqo sa ia kina na cakacaka ni veivakasavasavataki e Juta kei Jerusalemi.

6A sa vakayacora vakakina o Josaia ena veikoro kei na vanua sa vakacacani vei ira na Manasa, Ifereimi, kei Simione, ka yacova na vualiku vei ira na Navitalai.

7Ena vanua taucoko o Isireli, a sa talaraka sobu na i cabocabonisoro kei na i vakatakarakara eso i Asera, ka vorolaka me dravusa na veikalou matakau, ka vakacacana na i cabocabo ni veika boi vinaka kecega. A sa qai lesu tale ki Jerusalemi.

Kunei na i Vola ni Lawa(2Tui 22.3-20)

8Ena i katini kawalu ni nona yabaki ni nona tui, ni a vakasavasavataka na vanua kei na vale tabu, a vakaroti Savani na luve i Asalaia, Masaia na Turaga ni Koro, kei na vunivola o Joa na luve i Joasa, me ratou vakavinakataka na Valenisoro i Jiova na Kalou.

9E ratou a lako mai vei Ilikaia na bete levu ka solia vua na i lavo era sa kumuna na Livai era dauyadrava na Valenisoro. (A sa kumuni mai vei ira na Manasa kei Ifereimi, mai vei ira na vo-ni-bula e Isireli kei Juta kei Penijamini, kei ira talega sa vakaitikotiko mai Jerusalemi.)

10A sa mai soli oqo vei ira na i liuliu ni cakacaka era a qarava na cakacaka ni kena vakavinakataki na vale ni Kalou.

11Era a qai solia vei ira na matai kei na dautara vale me ra volia na vatu ceuti, na kauvaro kei na i sa ni vale era a vakalaiva tu ga me rusa o ira na tui Juta eso.

12O ira sa vakayacora na cakacaka era sa yalodina sara kina. Eratou sa lewe va na Livai sa liutaka voli na cakacaka: oi rau o Jeaci kei Opetaia mai na mataqali o Merari, vata kei rau o Sakaraia kei Mesulame mai na mataqali o Koaca. (Era sa dauniqiri vakatagi kece o iratou na Livai oqo.)

13Eso tale na Livai era sa liutaka na kena veikauyaki na i yaya kei na raici ni nodra i tavi na tamata ena veicakacaka duidui eso, ka so tale era sa lesi me ra vunivola, ka ra sa qarava na i tavi ni yadravi ni matamata ni koro eso tale.

14Ia ni ra a kauta mai na i lavo, a vakarautaki me vakavinakataki kina na vale i Jiova, a kunea kina o Ilikaia na bete na vola ni Lawa i Jiova ka a soli vei Mosese.

15A sa kaya o Ilikaia vei Savani na vunivola, Au sa kunea na i vola ni lawa ena vale i Jiova ka mani solia vua.

16A kauta o Savani vua na tui ka tukuna vua, Keimami sa vakayacora na veika kece sara o ni a vakarota.

17Keimami sa kauta kece mai na i lavo mai na kena kato mai na Vale ni Kalou ka solia yani vua na i liuliu ni matai.

18A mani vakaraitaka o Savani vua na tui, Sa solia vei au o Ilikaia, na bete e dua na i vola. A qai wilika vakadomoilevu vua na tui.

19Ni sa rogoca na vosa ni vunau na tui, sa dresulaka na nona i sulu ni sa kurabui ka rarawa vakalevu.

20Sa qai vakaroti Ilikaia, kei Aikami na luve i Savani, kei Apitoni na luve i Maika, kei Savani na nona vunivola ni lawa na tui, kei Asaia na dauveiqaravi ni tui, ka vaka,

21Dou lako ka vakatarogi Jiova ena vukuqu, kei na vukudra talega na lewenivanua era sa vo e Juta kei Isireli. Mo ni dikeva matua na i vakatavuvuli mai na i vola sa kune oqo. Sa cudruvi keda o Jiova baleta ni ra a sega ni talairawarawa ki na vosa i Jiova na noda qase, ka sega talega ni ra muria na i valavala sa tukuna na i vola oqo me vakayacori.

Gadrevi na i Vakasala ni Parofita

22Ena i vakaro ni tui a qai lako kina o Ilikaia kei ira a tala na tui vei Ulita na parofita yalewa, na wati Salumi na luve i Tokaci ka luve i Esava na i vakatawa ni sulu ni vale Tabu. E ratou a vakamacalataka vua na ka a yaco.

23A qai kaya vei iratou o koya me ratou lesu tale vua na tui ka solia vua

24na i tukutuku oqo mai vei Jiova: Au na cudruva vakaidina na vanua oqo kei ira era tiko kina, ka na yaco na veivakarusai me vaka sa volai tu ena i vola sa wiliki vua na tui.

25Era sa biuti au ka ra vakacaboisoro ki na veikalou tani, ka ra sa vakacudrui au kina ena cakacaka ni ligadra. Sa tubu cake vakalevu na kena waqa na noqu cudruva na vanua oqo, ka na sega ni bokoci rawa.

26Ia ena vukuna na tui Juta, o koya ka talai kemudou mo dou mai qarai Jiova, mo dou tukuna vua, Sa kaya vakaoqo o Jiova, na Kalou ni Isireli: Ni o a rogoca na veika sa volai ena i vola,

27o a qai veivutuni e vu ni yalomu ka vakamalumalumutaki iko e mataqu, ka dresulaka na nomu i sulu ka tagi vei au, ena nomu sa rogoca na noqu vosa me baleta na cudruvi nei Jerusalemi kei ira era tiko kina. Au sa rogoca na nomu masu,

28kei na cudru au sa via vakatauca oqo vei Jerusalemi ena sega mada ni yaco me yacova na nomu mate. O na kune vakacegu ena nomu mate.

Eratou a qai kauta lesu na i tukutuku oqo vei Josaia na tui.

Vakavoui na Veiyalayalati(2Tui 23.1-20)

29A qai vakauta na tui na i tukutuku me ra soqoni kece mai na turaga e Juta kei Jerusalemi.

30A lako cake na tui ki na vale i Jiova, kei ira kecega na Juta, ira era a tiko e Jerusalemi, o ira na bete na Livai, kei ira kecega na tamata lelevu, lalai, a wilika vei ira na vosa mai na i vola ni veiyalayalati, ka a kune mai na vale i Jiova.

31A tucake na tui ena nona i tutu vakatui ka cakava e dua na veiyalayalati vei Jiova ni na muri Jiova ga, ka muria na nona i vunau, na nona lewa, kei na nona i vakaro, ena lomana kei na yalona taucoko, me vakayacora kina na vosa ni veiyalayalati sa volai tu ena i vola.

32A vakaroti vei ira kece era a tiko ena siga o ya e Jerusalemi kei Penijamini me ra yalayala ena vuku ni veika oqo. Ia o ira kecega na lewe i Jerusalemi era a vakayacora me vaka na veika a tukuni ena veiyalayalati kei Jiova, na Kalou ni nodra qase.

33Ia o Josaia a kauta tani kece na veika vakasisila mai na veivanua kecega era taukena na Isireli, ka vakaroti ira kecega era a tiko e Isireli me ra qaravi Jiova na nodra Kalou. Ia na veisiga kecega i Josaia era a sega ni vuki tani kina mai vei Jiova na Kalou ni nodra qaqa.