Siraki 31 - Vakavakadewa Vou kei na iVola tale eso（FNVDC12）

Na leqa e vu mai na ilavo

1Na lomaleqataka na iyau e vakalutu yago, na nuiqawaqawataka e vakavuna na moce yadrayadra.

2Na nuiqawaqawa e vakadredretaka na moce me vaka na tauvimate bibi.

3E cakacaka vakaukaua na vutuniyau, sa mani bini nona iyau; ni qai vakacegu, sa vakayagataka na veika saulevu.

4E cakacaka vakaukaua na dravudravua, sa mani lailai ga nona iyau; ni qai vakacegu, sa dravudravua tu ga.

5O koya e lomana na koula, e na sega ni wili me tamata dodonu; o koya e qara ilavo, e na vakasesei kina.

6E lewe levu era sa leqa baleta na koula, era sa sota mamaca sara ga kei na leqa.

7E itatarabe vei ira era mateca, na dai era na coko kece kina na lialia.

8Kalougata na tamata e mai vutuniyau, e tawacala e na nona qara koula.

9O cei li o koya? Eda na vakacaucautaki koya, ni sa vakayacora na ka veivakurabuitaki e na kedra maliwa na lewenivanua.

10O cei sa vakatovolei e na sala qo qai rawata? Sa rauta me dokadokai koya. O cei a rawa ni lawaki, qai sega ga ni cakava; me caka ca, qai sega?

11Nona iyau sana tudei; sana veitukunitaki tiko na nona yalololoma.

Na ivakarau rakorako e na solevu ni kana

12O dabe tiko e na teveli ni dua na vutuniyau? Kua ni koco, kua tale ga ni kaya, “Sa dua na ka na levu ni kakana!”

13Nanuma ni ka ca na mata kocokoco. Na ka buli cava e kocokoco cake vua na mata? Ya na vuna e tagi kina na mata taucoko.

14Kua ni yaluma na veika taucoko o raica, kua ni usumaki iko mo kana i liu.

15Kila ni gagadre ni wekamu e tautauvata kei na nomu; mo veinanumi e na veika taucoko.

16Mo kania e na itovo rakorako na veika e biu e matamu, kua ni namunamu deo na sevaki.

17E matau mo cegu e liu e na kana; kua ni kana vakasese, e vakamadua.

18Keoni dabe vata tiko e levu tale, kua ni tatara mada yani.

19Vei koya na tamata vakaitovo, vakalailai sa rauti koya sara ga! E na sega tale ga ni ceguoca e na nona idavodavo.

20Na moce vinaka e vakatau e na kana vakarauta; e yadra vakamataka, bulabula vinaka na yagona.

O ira na kana vakasese era vakila na moce vakaca, na lomaocaoca, kei na mosi ni ketena.

21Kevaka o sa mamau vakasivia, vakacegu ni se caka tu ga na kana, e na vinaka vei iko.

22Rogoci yau na luvequ, kua ni beci yau; e muri o na marautaka noqu vosa.

E na nomu cakacaka taucoko, mo gugumatua, o na sega ni tauvimate kina.

23O ira na lewenikoro era dau vakacaucautaka na itaukei ni soqo e levu na kakana e vakarautaka; e dodonu qori.

24Era kudruvaki koya e mamaqitaka na kakana; e dodonu tale ga qori.

25Kua ni via qoroi e na gunu waini; e levu era sa vakaleqai kina.

26E vakaraitaki na kaukaua ni sitila ni vakatakatari qai toni i wai; na waini e laurai vaka kina na itovo ni tamata dokadoka ni veiba e na mateni.

27Na waini e vaka na bula vua na tamata e gunuva ga vakarauta.

Na cava na bula ke sega na waini? A buli meda marau kina na tamata.

28Na waini e gunuvi vakarauta e na kena gauna, e marau kina na yalo.

29Na waini e gunuvi vakasese e vakavu rarawa ni yalo, na cudrucudru kei na tatacebaceba.

30Na mateni e vakalevutaka na cudru ni tamata lialia, vakavuna me mavoa kina; e vakamalumalumutaki koya, rawarawa me moku.

31Kua ni vosataka na wekamu niodou gunu tiko; kua ni vakararawataki koya ni marau tiko;

e sega ni gauna vinaka mo vakalewai koya se lavaka na nona dinau.