Tobita 13 - Vakavakadewa Vou kei na iVola tale eso（FNVDC12）

Sere ni veivakalagilagi i Tobita

1Sa qai masu vaqo o Tobita:

“Me lagilagi na Kalou bula tawamudu,

me lagilagi na nona matanitu.

2E dau veikuitataki, qai loloma tale;

e dau veikau sobu i Etesi,

qai veikau cake tale mai,

e sega ni dua me dro bula rawa vua.

3I kemuni na luve i Isireli,

moni tusanaki koya vei ira na veimatanitu,

ni sa tolosevi keda kina o koya.

4 Aisea 63.16; Jere 3.4; Ym 14.3; Sr 23.1,4; Maciu 6.9 Moni vakatakila na nona cecere,

moni vakalagilagi koya e matadra kece na bula,

ni o koya e noda Turaga, noda Kalou,

e Tamada tawamudu.

5“E na kuitataki keda nida cala;

oti, e na qai lomani keda tale;

e na vakasoqoni keda mai na veimatanitu

da sa dui tolosevi tu kina.

6Keoni golevi koya e na lomamuni taucoko

kei na yalomuni taucoko moni yalodina vua,

e na golevi kemuni,

e na sega ni vunitaka na matana vei kemuni.

Moni raica ga na ka e na cakava vei kemuni,

moni vakavinavinaka vua e na domoilevu.

Moni vakacaucautaka na Turaga ni yalododonu,

moni vakacerecerea na Tui ni veigauna.

Au vakavinavinaka vua e na vanua au bobula tiko kina,

au vakatakila nona sau kei nona lagilagi e na matanitu ni dauvalavalaca qo.

Moni saumaki na dauvalavalaca, ni caka dodonu e matana;

de dua e na ciqomi kemuni, vosoti kemuni.

7Au vakacerecerea na noqu Kalou;

na yaloqu e vakacerecerea na Tui lomalagi,

e na marautaka na nona lagilagi.

8Na domo kece me vakavinavinaka vua mai Jerusalemi.

9 Aisea 60.1-22; Vtaki 21.9–22.5 “I Jerusalemi na koro tabu,

e na kuitataki iko e na nodra ivalavalaca na luvemu,

e na lomani ira tale na luvedra na yalododonu.

10Mo vakamuduo vua na Turaga,

mo vakacaucautaka na Tui ni veigauna,

me tara tale e na marau na nona valenisoro.

Me vakamarautaki ira na lewe i Jerusalemi era bobula tu,

lomani ira era bikai tu,

e na veitabatamata me tawamudu.

11“O Jerusalemi, o na vakararamataki vuravura taucoko.

E levu na matanitu era na lako vakayawa mai vei iko

mera rokova na Turaga na nomu Kalou,

mera vakaligaliga vua na Tui lomalagi.

E na nomu gaunisala era na vakacaucautaki iko e na marau na veitabatamata.

O na rogo tawamudu, koro digitaki ni Kalou.

12“Era na kalouca kece na cati iko,

o ira na vakacacani iko se basuka na kemuni bai,

o ira na vakabalea na kemu tawa se vakama nomu vale;

o ira ga na rokovi iko, era na kalougata tawamudu.

13Mo reki, mo marautaki ira na luvedra na yalododonu,

nira na soqoni mera vakacaucautaka na Turaga ni yalododonu.

14“Era kalougata dina na lomani iko!

Era na marau e na nomu sautu.

Era kalougata na lolositaka na kemu kuita kece,

nira na marautaki iko nira na raica na nomu lagilagi kece;

e na nodra na marau tawamudu.

15Yaloqu, mo vakacaucautaka na Kalou na Tui levu,

16ni na tara o Jerusalemi e na safaya kei na emeralita,

kena bai na vatu talei,

kena qatava kei na bainivalu na koula wale.

17E na tuva na salatu kei Jerusalemi e na berili,

na rupi kei na vatu ni Ofia;

18na kena sala kece era na vakaaleluia,

era na veivakacaucautaki:

‘Me lagilagi na Kalou,

ni sa vakacerecerei iko tawamudu’.”