1Au diva mada ga
Me a dua na i keliwai
Na uluqu
Ka i vurevure ni wai ni mata
Na mataqu,
Ka me'u tagi kina ena bogi kei na siga;
Me baleti ira na kai noqu era sa vakamatei.
2Au diva
Me dua na vanua
Me'u tiko kina
Ena vanua dravuisiga
Me rawa ni'u lako tani kina
Mai vei ira na kai noqu.
Era sa sega kecega ni yalodina,
E dua na i vavakoso dauveivakaisini.
3Era sa dau vakarau tu ga
Me ra dautukuna na ka lasu;
Sa yali na dina,
Sa kaukauwa na veika lasu
Ena loma ni vanua.”
A sa kaya o Jiova,
“Era sa vakayacora vakaveitarataravi
Na veika ca na noqu tamata;
Ka ra sa sega ni kilai au.
4Ni dui qarauni kemuni vinaka
Mai vua na wekana
Ka kakua ni vakadinata
E dua na tacimu;
Baleta ni sa dau veivakaisini na tacida yadua
Me vakataki Jekope;
Ka ra sa dui cavilaki ira na wekadra
Na tamata yadua.
5Era sa dau vakaisini kecega na wekana,
Ka sega e dua me tukuna na ka dina;
Era sa vakavulica na yamedra
Me ra dau lasu,
Era sai tovo ca,
Era sa sega ni lesu tani
Mai na nodra i tovo ca.
6Era sa cakava veitarataravi
Na i tovo kaukauwa,
Ka cakava veitarataravi
Na i tovo veivakaisini.
Era vosa vinaka
Vua na dui wekadra,
Ia e loma
Sa biriki kina e dua na dai
Me baleti koya.
7Ena vuku ni ka oqo
Sa kaya kina o Jiova,
“Au na vakasavasavataki ira na noqu tamata
Me vaka na vakasaqari ni kaukamea
Ena gauna e buli kina.
Kau na biuta na veivakatovolei e matadra.
Era sa cakava na veika ca,
Se cava tale me'u cakava vei ira.
8Na yamedra sa ka rerevaki
Ni ra sa dau lasulasu.
Sa tauca ga na vosa vinaka na tamata
Vei ira na wekadra,
Ia era sa tuvana dina ga
Na ka ni veivakatarabetaki.
9Me'u kakua li ni totogitaki ira
Ena ka oqo?
Me'u kakua li ni sauma lesu
Ki na dua na vanua vakaoqo,
Na nodra i valavala ca?
Oi au, o Jiova, ka'u sa kaya oqo.”
10A sa kaya o Jeremaia,
“Au na tagicaka na veiulunivanua,
Ka tagicaka na veico;
Baleta ni ra sa dravuisiga,
Ka sega me lako ena kedra maliwa.
Sa sega ni bau rogo kina
Na domo ni bulumakau;
Era sa dro ga ka lako
Na manumanu vuka kei ira na ka kila.”
11A sa kaya o Jiova,
“Au na vukici Jerusalemi
Me dua na i binibini
Ka sa rusa me dua na vanua
Me nodra i tikotiko na koli;
Kei na veikoro e Juta
Me dua na vanua lala.”
12A sa taroga o Jeremaia, “Kemuni Jiova, a cava ena rua kina na vanua ka mamaca me vaka na vanua dravuisiga, ka sega e dua me bau lako e loma? O cei sa vuku sara me kila na ka oqo? O ni sa vakamacalataka vei cei na ka oqo me na rawa ni tukuna vei ira na tani?
13A qai kaya o Jiova, “Sa yaco na ka oqo baleta ni ra sa biuta na noqu tamata na noqu i vunau au a solia vei ira. Era sa sega ni talairawarawa vei au se cakava na ka au tukuna vei ira me ra cakava.
14Era sa muria ga na lomadra ena yalo kaukauwa ka qaravi Peali me vaka era a vakavulici ira kina na nodra qase.”
15O koya oqo sa kaya kina o Jiova ni lewevuqa na nodra Kalou na Isireli. “Au sa solia vei ira na tamata oqo na kau gaga me ra kania kei na wai gaga me ra gunuva.
16Au na vakasavi ira yani ki na veimatanitu ka ra sa sega ni bau rogoca, se kila se o ira na nodra qase. Au na tala mai na veimatanitu me valuti ira me yacova ni'u sa vakarusai ira vakadua.”
Tagica na Veivuke o Ira mai Jerusalemi17A sa kaya o Jiova ni lewevuqa,
“Ni vakasamataka!
Ni kacivi ira na tagi
Me ra lako mai,
Ni sai ira na yalewa era kila
Na lagata na sere ni veibulu.”
18Era sa qai kaya na tamata,
“Tukuna vei ira
Me ra totolo mai ka lagata
E dua na sere ni veibulu vei keda,
Me yacova ni sa sinai na matada
Ena wai ni mata,
Ka suasua na bekabeka ni matada
Ena tagi.”
19Ni rogoca
Na domo ni tagi mai Saioni,
“Eda sa rusa!
Eda sa vakamaduataki sara ga!
Sa dodonu me da biuta na noda vanua;
Sa talaraki sobu na noda veivale.”
20A sa kaya o Jeremaia,
“Ni vakarorogo mada na yalewa
Ki na ka sa tukuna o Jiova,
Ka rogoca vinaka na nona vosa.
Ni vakavulici ira na luvemuni yalewa
Ena tagi,
Kei ira na wekamuni
Ena lagata na sere ni veibulu.
21Sa curu mai na mate
Ena nodra veikatuba leka,
Ka curuma na noda veivale vakaturaga;
Sa musuki ira sobu na gone
Ena veigaunisala,
Kei ira na cauravou
Ena veivanua ni veivoli.”
22A sa kaya o Jiova,
“Ena tayana na yago ni tamata mate
Me vaka na maniwa ena dela ni qele,
Me vaka na itei ni sila sa musu
Ka ra vakavoca tu na dautatamusuki.”
23A sa kaya o Jiova,
“Me kakua ni dokadokai koya
Na tamata vuku ena nona vuku,
Me kakua ni qaciqacia na tamata kaukauwa
Ena nona kaukauwa,
Me kakua ni dokai koya na tamata vutuniyau
Ena nona i yau.
24Ia kevaka e dua e via boletaka e dua na ka,
Me boletaka ga na nona yalomatua ni sa kilai au.
Ni sai au o Jiova,
Ka'u sa vakaraitaka na noqu yalo loloma.
Au sa vakayacora na ka dodonu
Kei na ka dina e vuravura.
Sa i koya oqo na veika au sa vinakata.”
25A sa kaya o Jiova, “Ena yaco mai na gauna au na vakaitotogitaki kemuni kina na tawa cilivi vakayalo;
26E Ijipita, Juta kei Itomi, o ira na luve i Amoni kei Moapi kei ira kece era tiko ena vanua dravuisiga ka sa kotiva na tutu ni drau ni uludra; ka ni ra sa tawa cili; sa tawa cili vaka talega e lomadra na Isireli.”
Who We AreWhat We EelieveWhat We Do
2025 by iamachristian.org,Inc All rights reserved.
