1 Tui 11 - Vakavakadewa Vou kei na iVola tale eso（FNVDC12）

Sa Vuki Tani ka Talaidredre o Solomoni

1A sa domoni ira e vuqa sara na yalewa tani o Solomoni. Ni tiko ga na luvena yalewa na tui Ijipita na watina, a sa taura talega me watina o ira na yalewa ni Itaiti kei ira na yalewa ni Moapi, Amoni, Itomi kei Saitoni.Vrua 17.17

2A sa vakawatitaki ira na yalewa oqo ka dina ga ni a sa vakarota o Jiova vei ira na Isireli me ra kakua ni vakawati kei ira, baleta ni ra na vagolea tani vakaidina na lomadra me ra muria na nodra kalou.Lako 34.16; Vrua 7.3-4

3A sa vakawatitaka e lewe 700 na raluve o Solomoni, ka ra lewe 300 na watina lalai. Era a qai vakavuna na watina me vuki tani mai vua na Kalou.

4Ia ni sa qase mai o Solomoni, era a vukica na lomana o ira na watina me muri ira na kalou tani; a sega ni dodonu taucoko sara na yalona vei Jiova na nona Kalou me vaka na yalo i Tevita na tamana.

5Ni sa muri Aseteroci na nodra kalou yalewa na kai Saitoni o Solomoni kei Moloke na nodra kalou vakasisila na Amoni.

6A sa cakava na ka ca o Solomoni ena mata i Jiova, ka sega ni muri Jiova vakatabakidua me vakataki Tevita na tamana.

7Sa qai tara o Solomoni ena ulunivanua vaka ki na tokalau kei Jerusalemi e dua na tikina me dau qaravi kina o Kimosi na nodra kalou vakasisila na Moapi, kei na tikina me qaravi kina o Moloke na nodra kalou vakasisila na kai Amoni.

8A sa tara talega na burekalou eso ena vukudra na watina kece era sa lako mai vanua tani, me ra vakama kina na ka boi vinaka, ka vakacaboisoro vei ira na nodra kalou.

9A cudruvi Solomoni o Jiova baleta ni sa gole tani na lomana mai vei Jiova na nodra Kalou na Isireli, o koya ka a rairai vakarua ki vua,

10ka a vakaroti koya ena vuku ni ka oqo me kakua ni muri ira na kalou tani: ia, sa mani sega ni muria vakakina na ka sa vakarota o Jiova.

11Ia a qai vosa vei Solomoni o Jiova, ka kaya, “Me vaka ni sa lomamu oqo, ka o sa sega ni muria na noqu veiyalayalati kei na noqu i lesilesi ka'u a vakarota vei iko, au na kaliraka tani vakaidina mai vei iko na matanitu, ka solia vua na nomu tamata.

12Ia au na sega ga ni cakava ena nomu gauna ena vuku i Tevita na tamamu; ia au na kaliraka ga mai na liga i na luvemu tagane.

13Ia au na sega ni kaliraka tani na matanitu taucoko; au na solia ga e dua na mataqali vua na luvemu ena vuku i Tevita na noqu i talatala, ena vuku i Jerusalemi talega, o koya ka'u a digitaka.

O Ira na Meca i Solomoni

14A sa vakauqeta o Jiova e dua na meca i Solomoni, o Etati na kai Itomi; a sa dua vei ira na kawa ni tui Itomi o koya.

15Ena gauna sa tiko kina mai Itomi o Tevita, a sa lako cake o Joape na komada ni mataivalu me buluti ira sa moku mate, ka sa mani vakamatei ira kece kina na tagane mai Itomi.

16A sa tiko mai Itomi o Joape kei ira na nona tamata me vula ono, ka ra vakamatei kece kina na tagane mai Itomi ena loma ni gauna o ya.

17Ia o Etati, ni se gone lailai sara, a sa qai drotaki ki Ijipita kei na so vei ira na vakailesilesi nei tamana era kai Itomi.

18Era a biuti Mitiani ka lako ki Perana, ka tomani ira eso na tamata mai kea. Era a qai lako ki Ijipita ka rairai vua na tui, ka sa solia o koya vei Etati e dua na tiki ni vanua kei na vale, ka vakarautaka vua na kakana.

19A sa taleitaki Etati vakalevu na tui Ijipita ka sa solia kina na nona daku, o ya na taci Ranadi Tapanesi na watina, me rau veiwatini kei Etati.

20A sa vakasucuma vua o koya na taci Tapanesi e dua na luvena tagane sa vakatokai o Kinupaca, ka susuga cake o Tapanesi na ranadi ena valenitui. A sa bula voli kei ira na luvena na tui Ijipita o Kinupaca.

21Ena nona a tiko voli mai Ijipita, a sa rogoca o Etati ni sa mate o Tevita, ka sa mate talega o Joape na komada ni mataivalu. Sa qai kaya vei tui Ijipita o Etati, “Mo laivi au me'u lako, ka me'u lesu tale ki na noqu vanua.”

22A sa taroga vua na tui, “A cava na vuna? E dua beka na ka au rairai sega ni solia vei iko? O ya beka na vuna o sa via lesu tale kina ki na nomu vanua?”

A sauma o Etati, “E segai; ia mo laivi au ga me'u lako ga.”

Me vaka ni sa tui Itomi, a sa dua na meca sevaki i Isireli o Etati.

23A sa vakatura cake na Kalou e dua tale na meca i Solomoni, o ya o Risoni na luve i Elaiata, o koya ka a dro tani mai vua na nona turaga o Etateseri na tui Sopa.

24E a vakasoqoni ira vata eso na tamata o koya ka liutaka voli e dua na i lawalawa dauvakacaca. (A yaco oqo ena gauna sa ravuti Etateseri kei ira na sotia ni Siria oti kina o Tevita.) E a lako ki Tamasiko o Risoni kei ira na nona tamata ka vakaitikotiko mai kea; era sa buli koya na nona tamata me tui Siria.

25A sa nodra meca voli na Isireli ena dela ni gauna i Solomoni, ka i kuri ni leqa a dau vakavuna o Etati; a sa cati Isireli, ka sa veiliutaki voli e Siria.

Na Yalayala ni Kalou vei Jeropoama

26A sa veisaqasaqa talega kei Solomoni na tui e dua na nona i vakalesilesi ka yacana o Jeropoama, na luve i Nipati na kai Efiraca mai Sirata. Na marama tinana e dua na yada ka yacana o Sirua.

27Oqo na i tukutuku ni nona veisaqasaqa kei na tui.

A sa buluta voli o Solomoni eso na vanua ena yasana ki na tokalau kei Jerusalemi ka vakavinakataka tiko na bainikoro.

28Sa dua na cauravou qaqa o Jeropoama, ia ni sa raica o Solomoni ni sa daucakacaka o koya, a sa lesi koya me lewa na cakacaka ni veivakabobulataki kecega ena mataqali i Iosefo.

29Ena dua na siga ni a lesu tiko mai Jerusalemi o Jeropoama, a sotavi koya duadua ena gaunisala ena loma ni vanua lala na parofita o Eaija mai Sailo, ka sa daramaka tiko na i sulu vou.

30A sa taura o Eaija na i sulu vou ka vakaisulu kina o koya, ka dresulaka me tinikarua na tikitikina.

31A sa qai kaya vei Jeropoama, “Mo kauta e tini na tikina, ni sa vosa vakaoqo o Jiova na nodra Kalou na Isireli, ‘Raica, au sa vakarau dresulaka na matanitu mai na liga i Solomoni, ka solia vei iko e tini na mataqali.

32O Solomoni ena nona i votavota ga e dua na mataqali ena vuku i Tevita na noqu tamata, kei na vuku i Jerusalemi, na koro ka'u sa digitaka me noqu mai vei ira na mataqali kecega ni Isireli.

33Au na vakayacora oqo baleta ni sa biuti au o Solomoni, ka la'ki cuva vei Aseteroci na nodra kalou yalewa na kai Saitoni, kei Kimosi na nodra kalou na Moapi, kei Moloke na nodra kalou na luve i Amoni. A sa sega ni muria na noqu sala, o ya me cakava na ka e dodonu vei au, kei na noqu i lesilesi, vata kei na noqu lewa me vakataki Tevita na tamana.

34Ia au na sega ni kauta tani mai ligana na matanitu taucoko; ia au na qisi koya me veiliutaki tiko ena veisiga taucoko ni nona bula. Au na cakava na ka oqo ena vuku i Tevita na noqu tamata ka'u a digitaka, o koya ka vakabauta na noqu i vakaro kei na noqu i lesilesi.

35Ia oqo, au na kauta tani na matanitu mai vua na luvei Solomoni tagane ka'u na solia vei iko e tini na mataqali.

36Ia au na solia ga e dua na mataqali vua na luvena tagane, ka me drodrova tikoga kina na kawa i Tevita na noqu tamata na veiliutaki e Jerusalemi, ena koro ka'u sa digitaka me vakatikori kina na yacaqu.

37Ia o iko Jeropoama, au na vakayacori iko mo tui Isireli, ka lewa na ka kecega sa gadreva na yalomu.

38Kevaka o na vakarorogo ki na veika kece sara ka'u sa vakarota vei iko, mo muria na noqu sala, ka cakava na ka e dodonu e mataqu me vaka ka a cakava o Tevita na noqu tamata, ia au na qai tiko kei iko. Au na vakayacora mo tui Isireli ka vakataudeitaki ira na nomu kawa me ra veiliutaki e muri, me vaka ga na veika au a vakayacora vei Tevita.

39Ena vuku ni valavala ca i Solomoni ka'u na totogitaka kina na kawa i Tevita, ia ena sega ga ni tawa mudu.’ ”

40A saga kina o Solomoni me vakamatei Jeropoama. Ia a cavutu o Jeropoama, ka dro ki Ijipita, vei Sisaki na kena tui; a tiko mai Ijipita o koya me yacova na mate i Solomoni.

Na Mate i Solomoni(2Vei 9.29-31)

41Ena vuku ni veika kece sara e vakayacora o Solomoni me baleta na nona veiqaravi kei na vuku, sa volai kece oqo e Na i Volatukutuku kei Solomoni.

42A sa tui voli e Jerusalemi ka liutaka na vanua taucoko o Isireli me 40 na yabaki.

43A sa mate ka la'ki vakotori na yagona ena Koro i Tevita, ka sa sosomitaki koya ena i tutu vakatui na luvena o Reopoama.