Siraki 33 - Vakavakadewa Vou kei na iVola tale eso（FNVDC12）

1E sega na ca e na yacovi koya e doka na Turaga; e na veigauna dredre, e na dau sereki koya tu ga mai kina na Turaga.

2Na tamata vuku e na sega ni beca na lawa, ia o koya e rokova ga vakarairai, e vaka na waqa e na tokavuki.

3 Lako 28.30; Sr 45.10 Na tamata kilaka e na nuidei e na lawa; vei koya, na lawa e ka nuitaki me vaka na madigi vakalotu.

4Vakarautaka na ka mo tukuna, o na qai rogoci; tuvana na ka o sa vulica, qai saumi taro.

5Na vakasama ni tamata lialia e vaka na yava ni kareti, e cacawiriwiri tu ga.

6Na itau dauveivakalialiai e vaka na ose kila; e tagi e na gauna kece e vodo kina e dua.

Era duidui na tamata

7Na cava e tabu kina e dua na siga mai na dua tale, ni rarama kece ni loma ni yabaki e vu mai vua na matanisiga?

8Na Turaga ga sa wasewasea qai digitaka na dui gauna kei na solevu;

9e so e vakatabuya, e so e bulia me siga wale.

10Na tamata kece era vu mai na qele, o Atama a buli mai na kuvuniqele.

11E na kila levu ni Turaga, a wasewasei ira, digitaka kina nodra dui itavi;

12e so vei ira a taburaka vakacerecerea, e so tale a vakatabuya kauta vakavoleka vua,

ia e so a vosa vakaloucataka vakalolovirataka, tokitaka ira laivi mai na nodra itikotiko.

13Me vaka na qele e na liga ni dautulituli e buli e na nona lewa, e vaka kina na tamata e liga a koya e buli ira, me soli ka vei ira me vaka e lewa.

14Na vinaka na veibasai ni ca, na bula na veibasai ni mate; vakina na dauvalavalaca na veibasai ni doka na Kalou.

15Raica na cakacaka kece nei koya na Cecere Sara; era veisa tale tu ga vakina, e dua e kena veibasai e dua tale.

16O yau na iotioti ni yadra; au vaka na dau muri ira na dau beti vaini meu betia na ka e vo;

e na veivuke ni Turaga au cakacaka vinaka, au mani vakatawana noqu iqaqi ni waini me vaka na dau beti vaini.

17Nanuma niu a sega ni cakacaka e na vukuqu taudua, me baleti ira kece ga era qara ivakasala.

18Ni rogoci yau o kemuni na sau ni vanua; o kemuni na iliuliu ni vavakoso, ni vakarorogo mai.

Tu galala

19Me yacova nio mate, kua vakadua ni solia vei luvemu se watimu, tacimu se nomu itau, me lewai iko,

kua tale ga ni soli nomu iyau vua e dua deo veisautaka na lomamu mo kerea lesu tale mai.

20Nio se bula tiko cegu tiko, kua ni laiva e dua me taura nomu itutu,

21ni vinaka mera kerekere vei iko na luvemu, ca mo kere veivuke vei ira.

22Vakayacora vakavinaka na veika kece o cakava, kua ni laiva me vakacacani na kemu irogorogo.

23Ni sa vakarau cava nomu bula mo sa toki yani, veisoliyaka nomu iyau.

Nodra raici na bobula

24Na asa me nona na co, na kuita kei na usa iyaya; na dauveiqaravi me nona na madrai, na vakadodonutaki kei na cakacaka.

25Vakacakacakataka na nomu bobula, o na qai vakacegu; laiva me vakasavu liga, e na vaqara ga na galala.

26Na ivua kei na varaele e na vakamalumutaka na domo kaukaua; na dauveiqaravi ca, e na nona na vakararawataki kei na vakatotogani.

27Vakacakacakataki koya me kua ni vakasavu liga, ni vakasavu liga e vakavure e levu na ca.

28Vakacakacakataki koya, ni ya nona itavi; kevaka e sega ni vakarorogo, me vesu.

29Kua ni cudruva vakasivia e dua, lewa vakamatau na ka kece o cakava.

30Ke dua nomu dauveiqaravi, cakava vua na ka o vinakata me caka vei iko, nio sa voli koya e na buno.

31Ke dua na nomu dauveiqaravi, wiliki koya me tacimu, nio na gadrevi koya me vaka nomu gadrevi iko.

Kevaka o cakava vakaca vua e qai dro, o na qai vaqarai koya e vei?