1Oqo na i lesilesi sa soli vei ira na Livai me ra dauyadrava na vale tabu. Sa okati mai na mataqali i Kora o Meselimaia na luve i Kora tagane, mai na vuvale i Esava.
2E ratou sa lewe vitu na luvena tagane: ena kedratou veitarataravi, sai ulumatua o Sakaraia, na kena i karua o Jitieli, na i katolu o Sepataia, na i kava o Jacinieli,
3na i kalima o Ilama, na i kaono o Joanani ka kena i kavitu o Elioenai.
4E okati talega kina o Opeti Itomi, o koya sa vakalougatataka na Kalou ni sa solia vua e walu na luvena tagane: ena kena veitaratavavi, sai ulumatua o Semaia, na kena i karua o Jiosevata, na i katolu o Jica, na i kava o Sakari, na i kalima o Nacanieli,2Samu 6.11; 1Vei 13.14
5na i kaono o Amieli, na i kavitu o Isakari ka kena i kawalu o Piulicei.
6Na ulumatua tagane nei Opeti Itomi, o Semaia, a sa ono na luvena tagane ka ratou a gumatua ka yaga ki na nodra mataqali ena vuku ni nodra daurawa-ka vakalevu.
7Na yacadratou o Ocini, kei Rifaeli, kei Opeti, kei Elisapati, kei Ilaiu, vata kei Simakaia. Oi rau na lewe rua na qai cavuti e muri e rau sa tamata nuitaki ena vuqa na ka.
8E vakarautaka rawa na lewe ni vuvale nei Opeti Itomi e lewe 62 na tamata sa vakarautaki vinaka ka nuitaki ena cakacaka oqo.
9E vakarautaka rawa na lewe ni vuvale nei Meselimaia e lewe 18 na tamata sa vakarautaki vinaka ka nuitaki.
10Mai na vuvale i Mirari, e tiko kina o Osa, ka ratou lewe va na luvena tagane: o Simiri (a lesi koya o tamana me nodratou i liuliu, ka dina ga ni sega ni ulumatua o koya),
11kei Ilikaia, kei Tipalaia, vata kei Sakaraia. Ni ra wili vata kece, era sa lewe 13 taucoko na lewe ni vuvale i Osa era sa dauyadrava na vale tabu.
12Era sa wase vakailawalawa na matayadra ni vale tabu, ena nodra i wasewase vakavuvale, ka sa lesi na nodra dui i tavi ena vale tabu me vakataki ira na Livai tale eso.
13A sa ia na vakawiri madigi me kilai kina na matamata eso me ra dui yadrava, ka veitalia na levu se lalai ni vuvale.
14A donui Selemaia na madigi me yadrava na matamata vaka ki na tokalau, ka donui Sakaraia na luvena tagane, o koya na daunivakasala vinaka, na madigi ni kena yadravi na matamata ki na vualiku.
15A sa nei Opeti Itomi na madigi me yadrava na matamata ki na ceva, ia o ira na luvena tagane era sa dauyadrava na valeniyau.
16Na madigi ni kena yadravi na matamata ki na ra sa dusi rau o Supimi kei Osa, ka vaka talega kina na matamata ena sala ka lako cake ki Salekoci. A sa tuvani na cakacaka ni yadra ena kedra gauna, me vaka na kedra veitarataravi.
17Ena matamata mai na tokalau, eratou toka kina e ono na Livai me ratou yadra ena veisiga, ka ratou lewe va mai na vualiku, ka lewe va mai na ceva. E lewe va na yadra eratou sa dauyadrava na valeniyau ena veisiga, ka tau yarua ena vale yadua.
18E ratou yadrava na sala ki na lomanibai mai na yasana ki na ra e ratou lewe va, ka rau lewe rua e rau yadra toka ga ena lomanibai vakaikoya.
19Sa i koya oqori na i wasewase ni veiqaravi ena yadravi ni katuba vei iratou na vuvale i Kora kei na vuvale i Mirari.
Na Veitavi Tale Eso ni Valenisoro20Eso tale vei ira na Livai era sa qarava na valeniyau ni vale tabu kei na vale e daumaroroi kina na i yau sa vakatabui me nona na Kalou.
21O Latani, e dua vei ira na luve i Kerisoni tagane, a sa nodra qase eso na matavuvale ka wili kina na vuvale nei luvena tagane o Jieli.
22E rua tale na luve i Latani tagane, o Secami vata kei Joeli, e rau sa qarava na valeniyau ni vale tabu kei na vale ni maroroi yaya.
23A sa lesi talega na nodratou cakacaka o iratou na kawa i Emirami, kei Isari, kei Epironi, vata kei Usieli.
24A lesi me kena i vakalesilesi liu ka lewa na valeniyau ni vale tabu o Sipueli, mai na mataqali i Kerisomi na luve i Mosese tagane.
25Sa rau veiwekani vata kei Silomeci baleta ni rau sa veitacini o Kerisomi kei Iliesa. O ira na wekana mai vei Iliesa: o Riapaia na luvena tagane, kei Jesaia na luvena tagane, kei Jorami na luvena tagane, kei Sikiri na luvena tagane, kei Silomeci na luvena tagane.
26O Silomeci oqo kei ira na lewe ni nona vuvale era sa maroroya na veisolisoli i yau kecega sa vakatabuya vua na Kalou o Tevita na tui, kei ira na qase ni veivuvale, kei ira na turaga ni mataqali, vata kei ira na turaganivalu.
27Era a taura eso na i tokinivalu sa rawati mai na i valu ka vakatabuya me vakayagataki ena Valenisoro.
28Ia o Silomeci kei na nona vuvale e ratou sa dau maroroya na veiyaya kece ka vakatabui me vakayagataki ena Valenisoro, ka okati kina na veiyau ka ratou sa kauta mai o Samuela na parofita, kei Saula na tui, kei Epineri na luve i Neri, vata kei Joape na luve i Seruwaia.
Na Nodra i Tavi na Vo ni Livai29Vei ira na kawa i Isari, a sa lesi o Kinanaia kei iratou na luvena tagane me ratou qarava na cakacaka raraba vakaivola: o ya na kena volai na i tukutuku bibi eso kei na kena wali na nodra veileti na Isireli.
30Vei ira na kawa i Epironi, a sa lesi o Esapaia kei na 1,700 na wekana, era sa tamata qaqa kece o ira oqo, me ra qarava na cakacaka raraba me baleta na veika vakalotu kei na bula raraba e Isireli mai na yasana vaka ki na ra ni Joritani.
31A sa liutaki ira na kawa i Epironi o Jiraia. Ena i ka 40 ni yabaki ni veiliutaki vakatui i Tevita, a sa vakayacori e dua na veivakatarogi me baleta na nodra kawa na vuvale i Epironi, ka mani kunei kina ni so na sotia yaloqaqa mai na vuvale oqo era sa la'ki vakaitikotiko mai Jaseri ena nodra vanua na kai Kiliati.
32A sa digitaka o Tevita na tui e lewe 2,700 na i liuliu ni vuvale mai vei ira na weka i Jiraia ka lesi ira me ra vakailesilesi liu ena qaravi ni veika vakalotu kei na veika raraba ni matanitu e Isireli mai na yasana vaka ki na tokalau ni Uciwai o Joritani, oqori ena vanua o Rupeni, o Kata, kei na Tokalau ni vanua o Manasa.
Who We AreWhat We EelieveWhat We Do
2025 by iamachristian.org,Inc All rights reserved.
