1A sa kaya o Jiova,
“Ni rogoci au mada, oi kemuni sa vinakata na bula,
Oi kemuni o ni lako mai vei au me'u vukei kemuni.
Ni nanuma mada na vatu o ni a lako mai kina,
Sa i koya na vatu o ni a ta mai kina.
2Ni nanuma mada na nomuni tubutubu o Epara-ama
Kei Sera o koya o ni a kawa mai vua.
Ena gauna au a kacivi Epara-ama kina
E a sega tu na luvena,
Au a qai vakalougatataki koya,
Ka vakalewevuqataka na nona kawa.
3“Au na vakaraitaka na noqu loloma ki Saioni
Kei na kena veiyasana kece sa rusa tu.
E dina ga sa vaka tu e dua na vanua dravuisiga,
Au na cakava me dua na loga ni teitei,
Me vaka na i teitei au a cakava mai Iteni.
Ena yaco e kea na reki kei na marau
Kei na sere ni veivakacaucautaki
Kei na vakavinavinaka vei au.
4“Ni rogoci au mada na noqu tamata,
Ni vakarogoca mada na ka au kaya:
Au sa solia na noqu i vakavuvuli ki na veimatanitu;
Na noqu lawa ena kauta yani vei ira na rarama.
5Au na lako vakatotolo yani me'u vakabulai ira,
Sa voleka mai na noqu gauna ni qaqa.
Oi au ga au na liutaki ira na veimatanitu,
Ka ra na waraki au na veivanua yawa
Era nuitaki au me'u vakabulai ira.
6Raica mada na lomalagi, ka raica na vuravura!
Ena seavu yani na lomalagi me vaka na kubou;
Ena madra yani na vuravura vaka na i sulu makawa,
Ka ra mate kece talega na tamata era tiko kina.
Ia na veivakabulai au na cakava ena tawamudu
Ka na tudei tu ga na noqu qaqa.
7“Ni rogoci au mada oi kemuni o ni kila na ka dodonu
Oi kemuni sa tu e lomamuni na noqu i vakavuvuli.
Ni kakua ni rere ni ra vakalialiai kemuni
Ka vakacacani kemuni na tamata.
8Ena kani ira na sarasara me vaka na i sulu,
Ka kani ira na bacaniqele me vaka na vutinisipi.
Ia na veivakabulai au na kauta yani ena sega ni mudu
Ka na tudei tu ga na noqu qaqa.”
9Ni yadra mada, Jiova, ka vukei keimami!
Ni vakayagataka na nomuni kaukauwa
Mo ni vakabulai keimami.
Ni vakayagataka mada
Me vaka na nomuni a vakayagataka ena gauna e liu.
Oi kemuni ga o ni a musumusulaki Reapi,
Na drakoni levu ni wasawasa.
10Oi kemuni ga o ni a vakamacara na wasawasa
Ka cakava ena loma ni wasawasa e dua na sala,
Me ra rawa ni lako kina o ira o ni vakabulai ira.
11O ira o ni vakabulai ira
Era na yaco ki Jerusalemi ena marau,
Era na sere ka kaila ena reki.
Era na marau ka sega ni mudu
Ka galala mai na rarawa kei na veika dredre.
12A sa kaya o Jiova,
“Oi au ga au a vakacegui kemuni.
Na cava mo ni rerevaki ira kina na tamata
Ni ra sa dau mate talega,
Ka ra sa sega ni bula dede cake mai vei ira na co?
13O ni sa guilecavi Jiova beka o koya ka a buli kemuni
O koya ka a tevuka na lomalagi
Ka cakava na yavu kei vuravura?
Na cava o ni rerevaka tikoga kina
na nodra cudru o ira sa vakararawataki kemuni?
Sa evei kina na cudru o ya?
14O ira na vakararawataki era na sereki vakatotolo,
Era na sega ni mate ka bulu
Se na sega na kedra kakana.
15“Oi au o Jiova na nomuni Kalou,
Ka'u sa vakayavalata na wasawasa
Ka vakavuna me vadugu na kena ua.
Na yacaqu o Jiova ni lewevuqa.
16Au a tevuka yani na lomalagi
Ka bulia na yavu kei vuravura;
Ka'u kaya ki Saioni, ‘Oi kemuni na noqu tamata!
Au a solia vei kemuni mo ni na noqu i vakavuvuli
Ka taqomaki kemuni ena ligaqu.’ ”
Na i Cavacava ni Vakararawataki nei Jerusalemi17 Vtaki 14.10; 16.19 I Jerusalemi, mo yadra mai!
Yadra mada ka duri cake!
O a mateni ena bilo ni veitotogitaki
E a solia vei iko ena nona cudru o Jiova mo gunuva;
O a gunuva kece ka vakavuna mo veicebayaki.
18A sega ni dua me tuberi iko
Ka sa sega ni dua vei ira na luvemu
Me tuberi iko ena ligana.
19Sa yaco vei iko e rua na leqa oqo:
Sa vakacacani sara na nomu vanua ena i valu,
Ka ra sa viakana na luvemu.
A sega ni dua me lomani iko.
20Era sa mata buto ena malumalumu na luvemu,
Era sa davo koto ena veitutu ni sala;
Era sa vaka na dia sa coko ena nona i cori na dauvakasasa.
Era sa vakila na kaukauwa ni cudru i Jiova.
21Kemuni na lewe i Jerusalemi o ni sa rarawa,
O ni sa veicebayaki me vaka o ni sa mateni.
22Sa taqomaki kemuni o Jiova na nomuni Kalou,
A sa kaya, “Au sa kauta tani mai na ligamuni
Na bilo au a solia vei kemuni ena noqu cudru.
O ni sa na sega tale ni gunuva
Na waini o ni a veicebayaki kina.
23Au na qai solia vei ira sa vakararawataki kemuni,
O ira era vakavuna mo ni davo sobu ena veisala,
Ka buturaki kemuni ena nodra veilakoyaki.”
Who We AreWhat We EelieveWhat We Do
2025 by iamachristian.org,Inc All rights reserved.
