Joni 13 - Vakavakadewa Vou kei na iVola tale eso（FNVDC12）

Sa Vuya na Yavadratou na Nona Tisaipeli o Jisu

1Era sa yacova yani e dua na siga ni bera ni vakayacori na Solevu ni Lakosivia. A sa kila o Jisu ni sa yaco mai na gauna me biuta kina na vuravura oqo, ka lako yani vei Tamana. Sa dau lomani ira era sa nona ena vuravura oqo o koya, ka sa lomani ira me yacova na i vakataotioti.

2A ratou sa vakayakavi tiko o Jisu kei iratou na nona tisaipeli. A sa vakatubura oti koto na Tevoro ena loma i Jutasa Isikarioti, na luve i Saimoni, me na soli Jisu yani vei ira na nona meca.

3A sa kila o Jisu ni sa solia vua o Tamana na kaukauwa kecega; ka sa kila o koya ni sa lako mai vua na Kalou ka sa lako tale yani vua na Kalou.

4Sa qai tucake mai na teveli ni kana, a sa luvata na nona i sulu e sau, ka taura e dua na i tawelu ka vesuka ki tolona.

5Sa qai livia na wai ki na dua na beseni, ka vakatekivu me vuya na yavadratou na nona tisaipeli, ka qusia ena i tawelu sa vesu toka e tolona.

6Ni sa yaco vei Saimoni Pita, sa qai kaya vua o Pita, “Turaga, o ni na vuya li na yavaqu?”

7Sa qai sauma o Jisu ka kaya vua, “O se sega ni kila rawa ena gauna oqo na i balebale ni ka au sa vakayacora oqo, ia o na qai kila e muri.”

8Sa qai kaya tale vua o Pita, “Ena sega vakadua mo ni vuya na yavaqu ena dua na gauna!”

Sa qai sauma o Jisu, ka kaya, “Kevaka ka'u sa sega ni vuya na yavamu, ena sega na nomu i votavota ena vukuqu.”

9Sa kaya tale vua o Saimoni Pita, “Turaga, mo ni qai kakua walega ni vuya na yavaqu! Ni vuya na ligaqu kei na uluqu talega!”

10Sa kaya vua o Jisu, “O koya sa sili oti, sa savasava taucoko na yagona, ka sa ganita walega me vuya na yavana. Dou sa savasava kece, ka vakavo walega e dua.”

11(A sa kila oti tu o Jisu na tamata ena soli koya yani; o ya na vuna sa kaya kina, “Dou sa savasava kece, ka vakavo walega e dua.”)

12Ni sa vuya oti na yavadratou, ka daramaka tale na nona i sulu e sau, sa qai dabe tale, ka kaya vei iratou, “Dou sa kila na ka au sa cakava oqo vei kemudou, se sega?Sa Tukuna Rawa o Jisu na Nona Bukiveretaki(Maciu 26.20-25; Mari 14.17-21; Luke 22.21-23)

21Ni sa vosa oti vaka o ya o Jisu, sa qai rarawa na lomana, ka sa kaya cake mai, “Au sa tukuna vakadodonu sara vei kemudou oqo: e dua ga vei kemudou ena bukiveretaki au.”

22E ratou a qai veiraici na tisaipeli, ni ratou sega ni kila se a baleti cei na nona vosa.

23E a dabe toka e yasa i Jisu e dua vei iratou na nona tisaipeli, o ya na tisaipeli ka sa daulomana.

24Sa qai deguvacu yani vua o Saimoni Pita, me taroga se sa baleti cei beka na nona vosa.

25Sa qai toso voleka yani vei Jisu na tisaipeli o ya ka tarogi koya, “Turaga, o cei beka o ya?”

26Sa qai kaya o Jisu, “Sa i koya ga ka'u na solia vua na tiki ni madrai oqo ni'u sa tonia oti.” Sa qai taura na tiki ni madrai, a sa tonia, ka solia yani vei Jutasa na luve i Saimoni Isikarioti.

27Ena gauna ga e taura kina o Jutasa na madrai, a sa curumi koya o Setani. Sa qai kaya vua o Jisu, “Mo cakava vakatotolo sara na ka o sa via vakayacora!”

28E sega ni dua vei ira ka kana tiko o ya e kila se cava sa vosa kina vaka o ya ki vua o Jisu.

29Me vaka ni dau maroroya voli na taga ni lavo o Jutasa, e ratou vakasamataka kina eso de a kaya vua o Jisu me la'ki volia mai na veika ena yaga vei iratou ena solevu, se me la'ki solia eso na ka vei ira na dravudravua.

30Ni sa taura oti ga na tiki ni madrai o ya o Jutasa, sa curu sara ki tautuba. A sa bogi na vanua.

Na i Vakaro Vou

31Ni sa curu oti ki tuba o Jutasa, sa qai kaya o Jisu, “Sa qai vakalagilagi na Luve ni Tamata ena gauna oqo ka sa vakalagilagi na Kalou ena vukuna.

32Kevaka sa vakalagilagi na Kalou ena vukuna na Luve ni Tamata, ena vakalagilagia talega na Luve ni Tamata na Kalou ena vukuna vakai koya ga, ka sa na vakalagilagi koya sara ga ena gauna oqo.

33Kemudou na luvequ, sa na sega ni dede na nodatou tiko vata. Dou na vakasaqarai au; ia me vaka ga au sa tukuna vei ira na Jiu, au sa kaya talega vei kemudou, ‘Dou na sega ni lako rawa ki na vanua au sa lako kina.’Joni 7.34

34Au sa solia vei kemudou e dua na i vakaro vou, mo dou veilomani. Me vaka au sa lomani kemudou, mo dou veilomani talega vakakina.Joni 15.12,17; 1Joni 3.23; 2Joni 5

35Na ka oqo era na kila kina na tamata kecega ni dou sa noqu tisaipeli, o ya kevaka dou sa dau veilomani.”

Sa Tukuna Rawa o Jisu na Veicakitaki i Pita(Maciu 26.31-35; Mari 14.27-31; Luke 22.31-34)

36Sa qai kaya vua o Saimoni Pita, “Turaga, o ni sa lako kivei?”

A sauma o Jisu ka kaya, “Na vanua au sa lako tiko kina, o na sega ni muri au rawa kina edaidai; ia o na qai muri au yani e muri.”

37Sa qai kaya vua o Pita, “Turaga, a cava na vuna au sega ni muri kemuni rawa kina edaidai? Au sa tu vakarau me'u mate ena vukumuni!”

38Sa kaya vua o Jisu, “O na solia li na nomu bula ena vukuqu? Au sa tukuna vakadodonu sara vei iko oqo: ni se bera ni tagi na toa, o na tukuna vakatolu ni o sa sega ni kilai au.