Jeremaia 6 - Vakavakadewa Vou kei na iVola tale eso（FNVDC12）

Sa Wavoliti Jerusalemi na Meca

1Kemuni na kawa i Penijamini, ni dro mo ni bula! Ni lako tani mai Jerusalemi! Ni uvuca na davui mai Tekoa, ka vakaduria e dua na i vakatakilakila mai Peci Akerimi. Sa vakarau lako sobu mai na vualiku na leqa kei na veivakarusai levu.

2Kemuni mai Saioni, o ni sa vaka e dua na veico rairai vinaka,

3ia era na vakoro e keri na tui kei na nodra mataivalu. Era sa birika na nodra valelaca wavokiti kemuni ka ra na dui taura na ka ra dui vinakata.

4Era na kaya, “Vakarau me da ravuti Jerusalemi. Ni vakarau, keimami na ravuti kemuni ena yakavi!” Ia, era qai kaya, “Sa rui bera, sa vakarau dromu na siga. Ka sa vakabalavutaki na rurugu ni yakavi.

5Ni vakarau, keimami na kaba ena bogi ni kua, ka vakarusa na veibai kei Jerusalemi.”

6Sa solia mai na i vakaro na Kalou Kaukauwa, “Ni taya sobu na veikau ka bulia na bukebuke, O ni na qai rawa ni kabai Jerusalemi.”

A sa kaya o koya, “Au na vakatauca na i totogi ena koro oqo, ni sa sinai ena veivakalolomataki.

7Me vaka na kena maroroya e dua na i keliwai na kena wai sa maroroya vakakina o Jerusalemi na nona ca me kakua ni malai. Au sa rogoca na i valavala kaukauwa kei na veivakarusai ena koro; ka'u sa raica kecega na mate ca kei na mavoa.

8Ni rogoca mada na i vakasala na lewe i Jerusalemi, de'u na qai biuti kemuni; Au na vukica nomuni koro me dua na vanua dravuisiga, ka na sega e dua e bula rawa kina.”

Na Talaidredre i Isireli

9Sa kaya vakaoqo o Jiova ni lewevuqa:

Kumukumuna vinaka me vaka na vaini

Na vo-ni-bula e Isireli;

Me vaka na daukumuni qerepi

Mo tagava tale yani na veitabana e ligamu.

10Au qai kaya,

“O cei ena via vakarorogo vei au,

Ke'u vosa vei ira ka vunauci ira?

Era sa sogota na daligadra

Ka ra sega ni rogoca.

Era bese ni rogoca na nomuni vosa;

Ka beca na ka o ni sa tukuna.

11I Jiova, au sa vakasinaiti ena nomuni cudru, au sa oca na tarova.”

Ia, a qai kaya vei au o Jiova, “Sova yani na noqu cudru vei ira na gone e gaunisala, kei na nodra veisoqosoqo na cauravou. Era sa kau tani na tagane vakawati kei ira na watidra ka bau yaco vei ira na qase sara.

12Na nodra veivale ena soli vei ira na tani ka vakakina na nodra qele kei na watidra. Au na tauca na i totogi vei ira na tamata ni vanua oqo.

13Na tamata kece, mai vei ia na cecere kei ira na tamata wale era sa via rawa ka ena sala ca; o ira talega na parofita kei ira na bete era sa bau ia na veivakaisini.

14Era sa okata na mavoa ni lomadra na noqu tamata me sega ni dua na ka, era kaya, ‘Sa vinaka tu na ka kece,’ ni sega ni dina.

15Era madua beka baleta ni ra a cakava na ka vakasisila? Sega! Era sega sara ga ni bau madua; o koya oqo, era na lutu me vaka na nodra lutu na tani. Ni'u na totogitaki ira, era na qeyavu vakadua. Ni sai au ga o Jiova ka sa tukuna oqo.

Bese o Isireli na Muria na Sala Vakalou

16A sa kaya o Jiova vei ira na nona tamata, “Ni tu ena veibasoga ni sala ka vakararai; taroga na veigaunisala makawa e liu. E vei na sala e uasivi? Lako kina o na kune vakacegu.”

Ia era a qai kaya, “Keimami na sega ni lako kina!”

17Au sa lesia eso me ra yadra, ka vakarogoca na domo ni davui. Ia era qai kaya, “Keimami na sega ni via vakarorogo.”

18Ia a qai kaya o Jiova, “Ni vakarorogo na veimatanitu, ka raica na ka ena yaco vei ira na noqu tamata.

19Rogoca mada o iko na vuravura! Au sa kauta mai na rusa vei ira na tamata oqo, na i sau ni nodra i valavala; baleta ni ra sega ni muria na noqu vosa, ka vakanadakuya na noqu i vakaro.

20A cava na betena vei au na ka boi vinaka era kauta mai vei au mai Sipa, se na i saluwaki boi vinaka mai na dua na vanua yawa? Au na sega ni vakadonuya na nodra i soro kama, au na sega ni taleitaka na nodra i solisoli.

21O koya oqo sa kaya kina o Jiova, au na vakavuna me ra tarabe na tamata oqo ka bale era na mate na tama kei ira na luvedra, ka vakakina na wekadra kei ira na nodra i tokani.”

Na Vakacibivalu mai na Vualiku

22A sa kaya o Jiova, sa lako mai na tamata mai na dua na matanitu mai cake, vaka mai na vualiku; e dua na matanitu sa qaqa ka vakarau ia na i valu.

23Era sa kauta na nodra dakaititi kei na i seleiwau; era i tovo kaukauwa ka tawa loloma. Na domodra sa vadugu me vaka na wasawasa, ni ra sa vodoka na nodra ose. Era sa vakarau tu me vala kei Saioni.”

24Keimami sa rogoca na kena i tukutuku, ka sa malai na liga i keimami; sa luvuci keimami na rarawa ka mosi me vaka e dua na yalewa sa taratara.

25Ni kakua ni lako ki na loma ni vanua, se muria na veigaunisala; baleta ni ra sa vakaiyaragi tu na meca, ka sa tu na rere vei keda kece sara.”

26A sa kaya o Jiova, “Kemuni na noqu tamata, ni vakaisulu ena i sulu taga, ka vaqiqiqi ena dravusa. Mo ni ia na tagi me vaka e dua sa tagicaka na luvena e duabau ga ena tagi rarawa sara; o koya sa lako mai me vakarusai kemuni ena ravuravu sara vakidacala.

27Jeremaia, vakatovolei ira noqu tamata, vakatovolei ira mada mo raica na nodra i valavala.

28Era tamata talaidredre; ka dau kudruvaka na vosa i Jiova. Era sa domoqa me vaka na parasa kei na kaukamea; era sai valavala vakasisila.

29Sa katakata sara vakalevu na lovo ni sa irivi; ia sa sega ni waicala na uma ni sa vakatakatari. Sa tawa yaga me ia tikoga na veivakasavasavataki; ni sa sega ni kune e lomadra e dua na ka vinaka.

30Era sa vakatokai me siliva biu baleta ni sa biuti ira o Jiova.”