1Qo na ilavelave ni ivola: “O yau na tui levu o Asuerosi, au volavola vei kemuni na roko tui e lewe dua na drau ruasagavulukavitu mai Idia i Eciopea kei kemuni na ito ni matanitu qo; ni bula vinaka.
2“Era lewe levu sa qai torocake tiko ga nodra qaciqacia e na levu ni nodra lomani.
3Era saga mera vakacacani ira na noda. Nodra sega ni taqea rawa na iyau sa bini tu vei ira, era bau veretaki ira tale kina na vukei ira.
4E sega tu vei ira na yalo ni vakavinavinaka, era qai nanuma tale tiko nira na drotaka na kuita ni Kalou, koya e raica na ka kece, e na levu ni nodra vakabekabei vei ira na liaca na vinaka.
5E levu tale ga vei ira na veiliutaki era sa mai vakaitavi e na nodra mate na tamata tawacala kei na leqa lelevu sega na kedra iwali, e na veibukani ga ni nodra ilala vakailesilesi vakamatanitu.
6O ira na tamata lawakica veivakaisini qo era sa mai vakaseva na yalovinaka kei na yalodina ni nodra turaga.
7“Na itovo ni veiliutaki ca sa mai veitauvi tiko qo, e sega so ni kune e na ivolatukutuku makawa e dewa sobu mai, e na kune ga nida dikeva na veika e yaco tiko qo.
8Mai muri au na qarauna me vanua ni sautu kei na vakacegu vei keda kece na noda vanua,
9e na noqu veisautaka na ivakarau ni veiliutaki kei na vakatulewa dodonu e na veika kece.
10O Amani mada na luve i Amitaca na kai Masetonia (kaitani, sega ni dra vakaPeresia, sega tale ga vua noda yaloyalovinaka) eda a ciqomi koya.
11E na levu ni noda veivakaitaukeitaki, sa yaco kina me vakatokai me tamada, era cuva kece vua na lewenivanua me vaka ni tarava na tui.
12Ia na levu ni nona viavialevu, sa tovolea kina me muduka na noqu veiliutaki kei na noqu bula.
13E na lawaki qaseqase kei na veivakalaboci, a veretaki Motekai kina me mate, o koya noqu ivakabula noqu itokani tudei, vata kei Esiteri na noqu itokani uasivi e na veiliutaki, kei ira kece nodrau kaivata.
14Nona vakasama nida na malumalumu kina, me qai solia kina na lewa kei Peresia vei ira na kai Masetonia.
15“Ia o ira na Jiu e via vakawabokotaki ira na imurimuri ni tamata sevaki qo, au raica nira sega ni tamata ca, era vauci e na lawa dodonu sara,
16era luve i koya sa Cecere Sara, na Kalou sau na Kalou bula, o koya e uasivi sara na nona maroroya tiko mai noda matanitu me baleti keda kei ira noda qase.
17“Moni kua soti gona ni muria na ivola e so a vakauta yani o Amani na luve i Amitaca,
18baleta ni o koya sa cakava na veika qo sa kuna kei iratou kece nona vuvale e na matamata i Susa. Na Kalou e lewa na ka kece, sa vakatauca vakatotolo na itotogi e ganiti koya.
19“Moni dui veikabiyaka gona na ivola qo e matanalevu, mera vakatarai tale ga na Jiu mera muria ga na nodra lawa.
20Moni vukei ira vakaivalu e na ika13 ni siga ni Atari, na ika12 ni vula, na siga sa lokuci mera moku kina, mera vorati ira kina na kedra meca e na gauna ni nodra leqa.
21Na Kalou e lewa na ka kece, sa lokuca na siga qo me nodra siga ni marau nona tamata digitaki, sega ni siga ni nodra vakacacani.
22“Moni wilika gona na siga qo me siga ni marau vei kemuni me dau solevutaki e na veiyabaki
23me ivakananumi tudei ni noqu vakabulai kei ira na kai Peresia yalodina, ia me ivakananumi ni mate vei ira na bukiveretaki keda.
24“Na koro kei na vanua yadua e sega ni rokova na ivakaro qo, e na vaqeyavutaki e na moto kei na buka. E na sega ni dua na tamata e na lakova rawa, era na sevaka tawamudu na veimataqali manumanu.”
Qo moni wilika na Est 8.13–10.3. E talanoataki kina na nodra vakabulai, nodra vakacerecerei na Jiu, kei na nodra samuti na kedra meca. Nodra vakabulai vaqo na Jiu, a lewai me solevutaki e veiyabaki. Sa qai tini vaqo na ivola.
Who We AreWhat We EelieveWhat We Do
2025 by iamachristian.org,Inc All rights reserved.
