1 Tui 7 - Vakavakadewa Vou kei na iVola tale eso（FNVDC12）

Na Valenitui nei Solomoni

1A sa tara talega o Solomoni e dua na nona vale, ka rauta ni tini katolu na yabaki na dede ni kena tara tiko.

2A sa tara talega o koya na Olo ni Veikau mai Lepanoni ka kena balavu e 44 na mita, ka 22 na mita na kena raba, ka 13.5 na mita na kena cere; ka tara toka ena domo ni duru sitari sa yatu va, ka so na i coka sitari ena domo ni veiduru.

3A ubi na dela ni veicoka (o ya na siligi ni vale) ena kau sitari e 45 taucoko, ka tau ya 15 na duru ena i yatu yadua.

4A yatu tolu na katubaleka, ka veidonui na yasana ruarua.

5Na feremi ni i sogo kece kei na katubaleka era bulicaki vaka na katuba ni sa va taucoko na tutuna, ka veiqaravi vata ki loma na katubaleka e yatu tolu.

6A cakava o koya e dua na Olo ni Duru Lelevu e 22 na mita na kedra balavu ka 13.5 na mita na kedra raba. E koto kina e dua na varada ka vesuki matua na kena i ubi mai na i coka levu sa tu e matadra.

7A qai cakava o koya e dua na i tikotiko se olo vakaturaga, ka sa vakatokai talega na Olo ni Vakatulewa, o ya na tikina e dau vakatauca kina o Solomoni na nona lewa; ka sa ubia ena sitari me vakatekivu mai na buturara ki na siligi ni vale.

8A vale talega i Solomoni ka koto ena dua tale na tikina ena daku ni Olo ni Vakatulewa, a sa tautauvata ga na kena i cakacaka. A cakava talega o Solomoni na mataqali vale vata oqori me nei watina, ka luve tui Ijipita.

9A vatu talei kecega oqori, me vaka na i vakarau ni vatu a dau ta, a lauvaro ena i varo, e loma e sau talega, mai na kena yavu ka yaco ki na dela ni lalaga, me vakatekivu mai tautuba ki na lomanibai levu.

10Sa vakayavutaki na vale ena veivatu lelevu sa ta mai na kena vanua, eso e 3.5 na mita na kedra balavu, ka so tale e 4 na mita na kedra balavu.

11Ia ena delana, a tiko kina eso na vatu talei, me vaka na i vakarau ni vatu ta, ka so na sitari.

12Ia na lomanibai levu a vakavolivolita, a yatu tolu na vatu ta, ka dua na i yatu na i coka sitari, me bai ni rara ni loma ni Valenisoro kei na varada ni vale.

Na Cakacaka nei Urami

13A talatala o Solomoni me la'ki kau mai o Urami mai Taia.

14O Urami na luve ni dua na yada ena mataqali i Navitalai; a kai Taia o tamana, ka matai ni parasa. A tamata vuku sara o koya, ka dau loma kasa, ka sa kena dau dina na veika parasa kecega. A lako mai vei Solomoni na tui, ka cakava kina nona cakacaka.

Na Duru Parasa e Rua(2Vei 3.15-17)

15A cakava e rua na duru parasa ena mata ni Valenisoro. Na duru yadua oqo me rauta ni 8 na mita na kena balavu ka 5.3 na mita na i vakarau ni dagona wavoki.

16A vakawaicalataka na parasa ka cakava kina e rua na domodomo me viria ena dela ni veiduru, na cecere ni dua na domodomo e 2.2 na mita.

17A talia e rua na lawa veivolavolai kei na sinucodo muloci ki na domodomo a tu ena dela ni dua na duru e dua, ka dua ena domodomo ka dua.

18A cakava na veiduru ka rua na i yatu me volita na taudaku ni lawa, me ubia na i ukuuku a vaka na pomokareneti na domodomo o ya a tu e delana, a cakava vakakina ena domodomo ka dua.

19Ia na domodomo ka tu ena dela ni veiduru ena varada, a caka me vaka na se ni viavia, ka 1.8 na mita na kena cere,

20ka vakataqari na domodomo ena dela ni duru ruarua mai cake, ena dela ni ucuna momoto vakarivirivi. Ia e 200 na pomekaraneti sa yatuni rua ka viviga na domodomo ruarua.

21A vakaduria o koya na duru ena varada ni vale tabu; a vakaduria na duru i matau ka vakatoka me yacana o Jakini; ka qai vakaduria na duru i mawi ka vakatoka me yacana o Poasa.

22A caka na domo ni duru me vaka na se ni viavia.

Sa qai mai vakacavari na cakacaka ni duru ruarua.

Na Taqe Parasa(2Vei 4.2-5)

23A vakawaicalataka na parasa me cakava kina ena dua na taqe mokimokiti levu, ka 2.2 na mita na kena titobu, e 4.4 na mita na kena raba, ka 13.2 na mita na kena balavu vakarivirivi.

24Ena dago ni taqe ena ruku ni batibatina sa wavoliti ena i yaloyalo ni vuanikau na vago, e yatu rua, ka buli vata ga kei na taqe parasa.

25A sa taqa koto na taqe ena deladra e lewe tinikarua na bulumakau parasa ka vakanamata ki tautuba; e tolu e ratou vakanamata ki na vualiku, ka tolu ki na ra, e tolu ki na ceva, ka tolu e ratou namata ki na tokalau; ka qara vata kece ki loma na buidra yadua.

26Na veiyasa ni taqe e 75 na milimita na kena vavaku. Na batibatina sa vaka na bati ni bilo, ka sa muloci yani ki tuba me vaka na se ni viavia. E vakatawana rawa na taqe oqo e rauta ni 40,000 na lita.

Na i Tutu ni Beseni Parasa

27A cakava talega o Urami e tini na i tutu ni beseni parasa; a kedra balavu e 1.8 na mita, e 1.8 na mita na kedra raba, ka 1.3 na mita na kedra cere.

28Na kena caka na i tutu ni beseni sa vakaoqo: era sa biu vata na veitikina rabaraba lalai ka vakatikori ki na loma ni kena feremi.

29Era qai toka ena veitutuna ena tikina mai cake na i yaloyalo ni laione, na bulumakau, kei na jerupi. Ia ena kena feremi, a sa toka ruarua ena delana mai cake ka vakakina ena ruku e ra ni laione kei na bulumakau eso na i ukuuku vakamatai.

30Na i tutu ni beseni yadudua oqo koto kina e va na yavana parasa se qiqi, kei na kedra i vakacocowiriwiri parasa. Ena tutuna vava sa toka kina na i vakadei ni beseni ka caka ena parasa; ka ukutaki na i vakadei oqo ena i yaloyalo me vaka na senikau tali vakamokimokiti.

31A sa koto e dua na sui vakarautaki ka bulicaki mokimokiti e delana. Oqo e duri cake tu me 45 na senitimita mai na dela ni i tutu ni beseni, ka 18 na senitimita ki ra. Sa ceuti vakamatau ena i ukuuku na dagona wavoki.

32Na yava ni qiqi vava sa 66 na senitimita na kena cere, ka ra sa vakamautaki ki na tutuna e cowiri kina na yavana.

33Sa yava ni qiqi oqo e sa vaka na yava ni kareti; a sa caka kece sara ena parasa, oqori na ka sa cowiri kina, na batibatina mokimokiti, na kena i sa, kei na lomadonu ni qiqi.

34A sa tau yava na kena i vakadei ena ruku ni i tutu ni beseni yadua, ka sa caka vata ga me dua na tikina kei na i tutu ni beseni.

35Ia ena dela ni i tutu ni beseni yadua sa koto kina e dua na domodomo sa 22 na senitimita na kena cecere; ka sa buli vata ga me duabau na kena i tutu, na kena i vakababa, kei na belena.

36A ceuta o koya na i ukuuku ena veitikina raraba me vaka na jerupi, na laione, kei na niusawa ena veivanua e ganita, ka tini ena i ukuuku e ceuti wavolita.

37Sai koya oqo na i tuvatuva ni kena caka na i tutu ni beseni e tini, ni sa tautauvata na kedra i tulituli, na kedratou i vakarau, kei na kedratou lelevu.

38A cakava talega o Urami e tini na beseni parasa, me ra toka yadua ena i tutu ni beseni parasa; ka raba ni dua na beseni e 1.8 na mita, ka vakatawana rawa e 800 na lita.