Udite 6 - Vakavakadewa Vou kei na iVola tale eso（FNVDC12）

Na vosa nei Oloferenesi

1Ni sa ruru na nodra maue na tiko e taudaku ni bose qo, sa kaya o Oloferenesi, vunivalu kei Asiria, vei Akiori kei ira na kai Moapi e matadra na mataivalu vulagi:

2“O cei mada o iko, Akiori, kei kemuni na tamata volitaki ni Efereimi, moni parofisai vei keimami me vaka oni sa cakava nikua, moni tukuna me keimami kua ni valuti ira na Isireli ni na taqomaki ira na nodra Kalou? O Nepukanesa ga na Kalou, o cei tale?

3E na tala na nona mataivalu me vakawabokotaki ira e dela i vuravura; e na sega ni vueti ira na nodra Kalou - o keimami na italai ni tui, keimami na samulaki ira kece me vaka era le dua ga. Era na sega ni vorata rawa na neimami mataivalu vodo ose.

4Keimami na vakamayavutaki ira, e na mateni na nodra veidelana e na nodra dra, e na robota na nodra veibuca na yagonimate. Era sega ni rawa ni vorati keimami, era na kawaboko vakadua. Qori na vosa ni tui o Nepukanesa, o koya e lewai vuravura taucoko. Sa tau oti na nona vosa, e sega ni dau vosa wale.

5“Ia o iko, Akiori, o iko na kai Amoni volitaki, o sa cavuta na vosa qo e na liumuri, o na sega tale ni raica na mataqu tekivu nikua me yacova niu sa totogitaka na kawatamata a lako mai Ijipita qo.

6E na lausua na saresaremu e na iselewau ni noqu mataivalu kei na nodratou moto na noqu italai, o na bale vata kei ira na vuetaki niu na lesu mai.

7Eratou na kauti iko lesu qo i colo na noqu italai mo na biu e na dua na koro e na yasa ni itabale,

8o na sega ni mate me yacova nio na mate vata kei ira.

9Kevaka o nuitaka dina e yalomu nira na sega ni rawai, kua ni yalolailai! Sa tau oti na noqu vosa, au sega ni dau vosa wale.”

Sa kau i Beculia o Akiori

10Sa qai tukuna o Oloferenesi vei iratou na nona bobula eratou qaravi koya e nona valelaca, meratou vesuki Akiori, kauti koya i Beculia, qai soli koya vei ira na kai Isireli.

11Eratou mani kauti koya na bobula mai na keba i na buca, qai cabeta na veidelana me yacova na vure e ruku i Beculia.

12Nira sa raici iratou na tagane ni koro ya, era ucu iyaragi, ra cici e taudaku ni koro, ra cabe i delana; era qai raborabolaki iratou meratou kua kina ni cabe yani.

13Ia eratou dro e ruku ni delana, eratou vauci Akiori, qai vakadavori koya e vu ni baba, eratou qai lesu vua na nodratou turaga.

14Era qai siro sobu na Isireli, ra kunei koya, ra sereki koya, kauti koya i Beculia, me tu e matadratou na turaganilewa ni koro

15e na gauna ya: o Usia na luve i Maika e na mataqali nei Simione, o Japarisi na luve i Qoconiele, kei Jaramisi na luve i Melikiele.

16Eratou soqoni ira kece na qase ni koro, era mani cici tale ga i vanua ni bose na cauravou kei na yalewa; eratou lewa me tu o Akiori e na kedra maliwa na lewenivanua, sa qai tarogi koya o Usia se cava a yaco.

17A tukuna vei ira na ka a yaco e na bose nei Oloferenesi kei na ka kece a tukuna vei ira na veiliutaki ni Asiria, kei na ka kece a vosadokadokataka tu o Oloferenesi me baleta na kawa Isireli.

18Era sa qai cuva kece mera qarava na Kalou, ra kaci yani vua:

19“I kemuni saka na Kalou ni lomalagi, ni raica mada na nodra qaciqacia, ni lomani keimami na nomuni tamata e na neimami madua, ni raica nikua na mata i keimami na sa vakatabui me nomuni.”

20Era sa qai vosa vakamalua vei Akiori, ra vakacaucautaki koya vakalevu.

21Sa qai kauti koya tani mai o Usia i na nona vale, qai vakarautaka e dua na kanavata vei ira na qase. E na bogi taucoko era masulaka na veivuke ni Kalou ni Isireli.