Aisea 37 - Vakavakadewa Vou kei na iVola tale eso（FNVDC12）

Taro Vakasala vei Aisea o Esekaia na Tui(2Tui 19.1-7)

1Ni rogoca o Esekaia na tui na i tukutuku mai vua na tui Asiria, a dresulaka na nona i sulu ena rarawa, vakaisulu ena taga ka mai lako yani ki na Valenisoro i Jiova.

2A qai talai Eliakimi na vakailesilesi liu ena valenitui, kei Sepina na vunivola vata kei ira na bete sa qase cake vei Aisea na parofita na luve i Emosi.

3E ratou a la'ki tukuna vei Aisea, “E daidai na siga ni rarawa; eda sa totogitaki ka vakamaduataki. Eda sa vaka e dua na yalewa sa vakarau vakasucuma e dua na gone ia sa sega vua na kaukauwa me vakasucuma kina.

4A sa tala mai na nona vakailesilesi liu na tui Asiria me vakarogocataka na Kalou bula. Me qai rogoca mada ga na o Jiova na nomu Kalou na veivakarogorogocataki oqo, ka totogitaki ira era sa tukuna. Ia mo masu ga vua na Kalou ena vukudra na vo-ni-bula era se bula tiko oqo.”

5Ni sa rogoca o Aisea na i tukutuku mai vua na tui,

6a sa qai vakauta lesu tale na kena i sau oqo, “Sa tukuna mai o Jiova mo kakua ni lomaleqa ena veivakarogocataki era sa kaya mai na kai Asiria me na yaco vua na Turaga.

7Sa na vakavuna o Jiova me na rogoca na tui Asiria e dua na i tukutuku lasu ka na vakavuna me na lesu tale ki na nona vanua, ka na vakavuna na Turaga me na bale mate mai kea.”

Era Veivakasosataki Tale na Kai Asiria(2Tui 19.8-19)

8Ni ra rogoca na vakailesilesi ni Asiria ni sa biuti Lakisi na tui Asiria ka sa vala tiko kei Lipina na koro levu voleka e kea, a mani lako kina me tarogi koya.

9Era a mani rogoca na kai Asiria ni a lako mai e dua na mataivalu ni Ijipita me valuti ira; a liutaka tiko o Tiraka na tui Eciopea. Ni rogoca o tui Asiria na ka oqo a qai vakauta tale e dua na i vola vei Esekaia na tui Juta,

10me la'ki tukuni vua, “Me kakua ni vakacalai iko na Kalou o sa vakararavi tiko kina oqori ni a kaya, Ena sega ni vakabalei Jerusalemi rawa na tui Asiria.

11O a sa rogoca na veika a cakava na tui Asiria ki na dua ga na matanitu e via vakarusa. O nanuma beka ni o na rawa ni dro bula mai vei au?

12O ira na noqu qase era a vakarusa na veikoro o Kosami, Karani kei Risefi, ka ra vakamatei ira na kai Peciteni era tiko mai Tilasari. Ia a sega sara ni bau dua na nodra kalou me vakabulai ira rawa.

13Sa e vei na tui ni veikoro o Amaci, Apati, Sifaveimi, Ena kei Iva?”

Na Masu i Esekaia

14A taura na i vola o Esekaia mai vua na dauvakau i tukutuku ka wilika. Ni oti o ya, a sa qai lako yani na tui ki na Valenisoro ka la'ki biuta na i vola ena mata i Jiova,

15ka masu.

16Lako 25.22A sa kaya, “Oi kemuni Jiova ni lewevuqa, na nodra Kalou na Isireli, o ni sa tiko ena nomuni i tikotiko cecere vakaturaga. Sa i kemuni taudua ga na Kalou o ni sa lewa na veimatanitu kecega e vuravura. O ni a bulia na vuravura kei na lomalagi.

17I Jiova ni rogoci keimami ka raici keimami mai ena gauna oqo. Ni rogoca mada na ka e kaya o Senikarivi me vakarogocataki kemuni kina na Kalou bula.

18I Jiova, keimami kila ni sa vuqa sara na vanua sa vakarusa na tui Asiria, ka laiva me lala ka rusa tu.

19Era sa vaka na nodra kalou na matakau ena buka ka ni ra sa sega ni kalou dina. Era sa cakava ga na tamata mai na kau kei na vatu.

20Ia oqo kemuni Jiova, ni vakabulai keimami mai vei ira na kai Asiria, me ra kila kina na veimatanitu kecega e vuravura ni sai kemuni taudua ga na Kalou dina.

Na i Tukutuku i Aisea ki Vua na Tui(2Tui 19.20-37)

21Ia a qai talatala o Aisea na luve Emosi vei Esekaia na tui ka kaya, “Sa kaya o Jiova na nodra Kalou na Isireli ni sa rogoca na nomu masu me baleti Senikarivi na tui Asiria,

22ia sai koya oqo na ka sa tukuna mai o Jiova me baleti koya,

“Senikarivi sa dredrevaki iko o Jerusalemi

Ka vakalialiai iko.

23O cei o nanuma o vosa vakacacataka ka vakalialia?

O sa rui beci au na Kalou Yalo Savasava ni Isireli.

24O sa talai ira mai na nomu tamata,

Me ra vosa beca na Turaga, ka kaya,

O sa vakarusa na veiulunivanua cecere,

Ena nomu qiqinivalu e vuqa,

Ka bau yaco sara ki na ulunivanua o Lepanoni.

O sa dokadokataka na nomu taya sobu.

Na veisitari balavu duadua kei na paini vinaka sara.

O yaco talega ki na tiki ni veikau yawa duadua.

25O sa qaciqaciataka na nomu daukeli toevu,

Ka gunuva na wai ena veivanua tani,

Kei na kena vakamamacataki na veiuciwai ni Ijipita

Ni ra sa butuka ena yavadra na nomu mataivalu.

26O sega beka ni se bau rogoca

Ni'u a sa nakita makawa sara na ka oqo?

Ia oqo au sa qai vakayacora.

Au a solia vei iko na kaukauwa

Mo vukica na veikoro vakabai

Me ra i binibini vatu kakavorovoro.

27Era sa malumalumu na kedra i taukei,

Ka ra sa rere ka taqaya.

Era sa vaka na co ena dua na buca

Se veikau sa qai rovu ena dela ni vale,

Era sa malai ni liwavi ira na

Cagi katakata mai na tokalau.

28Au sa kila na nomu tiko sobu kei na nomu tucake,

Na nomu curu ki tuba se nomu curu ki vale,

Ka vakakina nomu via saqati au.

29Au sa mani rogoca na nomu cudru

Kei na nomu dokadoka o ya,

Ia oqo au na vakacobara e dua na i qaso ki ucumu,

Ka vesuka na i tarovi ni ose ki na gusumu,

Ka'u na qai kauti iko lesu tale ena sala o a muria mai.”

30A qai kaya o Aisea vei Esekaia na tui, “Sa i koya oqo e dua na i vakadinadina ni ka ena yaco. Ena yabaki oqo kei na yabaki ka tu mai, o ni na kania kina na sila sa tubu wale ga mai. Ia ena yabaki ka tarava, sa na rawa mo ni tea ka tamusuka na nomuni sila, o ni na tea kina na nomuni vaini ka kania na kena qerepi.

31Ia o ira na vo-ni-bula ena yavusa o Juta era na bula ka tubu me vaka na kau sa tubu tete sobu na wakana ki na qele ka ra sa vuataka na vuadra.

32Ena tiko talega na vo-ni-bula mai Jerusalemi kei na ulunivanua o Saioni, baleta ni sa nakita o Jiova me vakayacora na ka oqo.”

33Sa i koya oqo na ka sa tukuna o Jiova me baleta na tui Asiria, ‘Ena sega ni curuma na koro oqo o koya se bau vanataka wale mada ga mai kina e dua na gasau ni dakaititi. Ena sega ni lako voleka mai kina e dua na sotia vakaisasabai se viria na i kabakaba wavoki me kaba na koro oqo.

34Ena lesu tale o koya ena sala vata ga e a lakova mai ka na sega ni rawa vua me curuma mai na koro oqo.

35Au na viribaita ka taqomaka na koro oqo ena vuku ni noqu dokai kei na vuku talega ni noqu vosa ni yalayala vei Tevita na noqu i talatala.’ ”

Na Vakadrukai kei na Mate i Senikarivi

36A qai lako e dua na agilosi i Jiova ka vakamatea e lewe 185,000 na sotia ni Asiria ena nodra keba. Ia ena mataka lailai ka tarava, era sa davo ka mate kece tu.

37A qai mai dro lesu tale yani o Senikarivi na tui Asiria ki Ninive.

38Ena dua na siga ni a qarava tiko na nona kalou o Nisikori ena valenisoro, e rau a qai vakamatei koya o Etinameleki kei Saresa na luvena ena i seleiwau ka rau qai dro ki na vanua o Ararata. A qai sosomitaki koya o Esatoni e dua vei ira na luvena me tui Asiria.