1 Sa qai masu vua na Turaga e na nona vakananuma lesu na cakacaka kece ni Turaga, a kaya:
2 “I kemuni saka na Kalou, na Tui ni veika kece, oni lewai vuravura, e sega ni dua e rawa ni vorati kemuni ke sa lomamuni moni vakabulai Isireli,
3 nioni sa buli lomalagi kei vuravura kei na veika talei kece e ruku i lomalagi;
4 o kemuni na Turaga ni veika kece, e sega ni dua e rawa ni vorati kemuni na Turaga.
5 Oni kila na veika kece, oni kila saka ni sega ni noqu dokadoka se viavialevu se na via lagilagi au a bese kina ni vakarorogo vua na tamata viavialevu qo o Amani.
6 Keu a kila ni na bula kina o Isireli, keu a reguca na qeteqete ni yavana!
7 Ia na vu ni noqu cakava qo, meu kua kina ni vakalagilagia vakalevu na tamata, vakalailai ga na Kalou; au na sega tale ga ni cuva vua e dua, vei kemuni duadua na noqu Turaga; au na sega ni cakava na ka qo e na viavialevu.
8 Ia qo, kemuni na Turaga na Kalou, na Tui, na Kalou i Eparahama, ni lomani keimami na nomuni tamata, nira sa wanonovi keimami matua na meca mera vakawabokotaki keimami, mera talaraka na iyau makawa sa nomuni mai na itekivu.
9 Ni kua ni vakawalena na nomuni iyau oni a sereka mai na vanua o Ijipita.
10 Ni rogoca na noqu masu, ni lomana na nomuni iyau; ni vukica neimami lolosi me mamarau, me keimami bula, me keimami dau vakacerecerea saka na yacamuni e na sere; ni kua ni sogota na gusu e dau vakacaucautaki kemuni.”
11 Sa qai qoqolou o Isireli taucoko, ni sa tu e matadra o mate.
Who We AreWhat We EelieveWhat We Do
2025 by iamachristian.org,Inc All rights reserved.
