1A sa taura o Mosese e dua na yalewa ni Kusa me watina, ka rau sa vosa vakacacataki koya kina o rau o Miriama kei Eroni ena vuku ni ka oqo.
2E rau sa kaya, “Sa dau vosa beka ga ena gusu i Mosese o Jiova? Sa sega li ni dau vosa talega ena gusu i keirau?” A sa rogoca na ka oqo o Jiova.
3(A sa tamata vakaturaga o Mosese, ka sa uasivi sara ena yalomalumalumu mai vei ira na tamata kecega ena dela i vuravura.)
4E vakasauri ni sa voqa mai na vosa i Jiova vei iratou o Mosese, o Eroni, kei Miriama, ka kaya, “Au vinakati kemudou tolutolu mo dou lako mada mai ki na Vale ni Veitavaki.” E ratou sa mani lako yani.
5A sa lako sobu mai o Jiova ena duru o, ka mai tu ena katuba ni vale tabu, ka kacivi rau o Eroni kei Miriama; ka rau sa lako ruarua yani.
6Sa kaya o Jiova, “Drau rogoca mada na noqu vosa: Ke sa tiko vei kemudou e dua na parofita, sai au o Jiova ka'u na vakatakilai au vua ena raivotu, ka'u na vosa talega vua ena tadra.
7Ia sa sega ni vakakina vei Mosese na noqu tamata; ni ka'u sa solia vua na veiliutaki vei ira kece na noqu tamata na Isireli. Ipe 3.2
8Au sa vosa vua ena matana votu, ka keirau veivosaki ena vosa matata sara, ka sega ena vosa vakatautauvata; sa raica talega o koya na i bulibuli i Jiova! Na cava tiko mada o kemudrau mo drau vosa doudou kina ka vosavakacacataki Mosese na noqu tamata?”
9A sa waqa vei rau na cudru i Jiova, ka gole tani yani.
10Ia ni sa lako tani na o mai na vale tabu, raica, sa tauvi Miriama na mate ni kuli me vaka na vukavuka, ka sa vulavula me vaka na uca vulavula. Ni sa rai yani vei Miriama o Eroni, sa raica ni sa tauvi koya tu na vukavuka.
11Sa qai vakamasuti Mosese o Eroni, “Isa, au kerea saka na noqu turaga, mo ni kakua ni cudruvi keirau ena vuku ni neirau i valavala yalowai, ka keirau sa valavala ca kina.
12Mo ni kakua ni vakavuna me tautauvata o Miriama kei na dua na gone sa sucu dole, ni sa vuca tu eso na tiki ni yagona ena gauna sa sucu kina mai na kete i tinana.”
13Sa qai tagi vei Jiova o Mosese, ka kaya, “Kemuni na Kalou, au vakamasuti kemuni mo ni vakabulai Miriama mada.”
14Ia sa vosa o Jiova vei Mosese, ka kaya, “Ena sega beka ni madua tiko me siga vitu na yalewa kevaka e kasivita na matana o tamana? Ena ka oqo, me sogolati tani tiko mada o koya ki na taudaku ni keba me siga vitu; ni sa oti o ya me qai kau tale mai ki loma.”Tiko 5.2-3
15A sa sogolati tani me siga vitu ena taudaku ni keba o Miriama; ka ra sa sega ni tosoya na nodra i lakolako na tamata me yacova ni sa kau tale mai ki loma o koya.
16Ia ni sa oti o ya era sa qai biuti Eseroci o ira na Isireli ka ra la'ki birika na nodra keba ena vanua lala o Perana.
Who We AreWhat We EelieveWhat We Do
2025 by iamachristian.org,Inc All rights reserved.
