Jope 30 - Vakavakadewa Vou kei na iVola tale eso（FNVDC12）

1Ia ena gauna oqo, era sa vakalialiai au

O ira na tamata ka ra gone sobu sara mai vei au!

O ira na tamadra e sega sara tu mada ga na betedra

Ka sega sara ni rawa vei au me'u vakadonuya

Me ra vukei ira na noqu koli ena vakatawa sipi.

2Oqo na i lala tamata vakasavuliga ka vucesa,

Ka rui tawa yaga me ra cakacaka vei au.

3Sa rui levu na nodra dravudravua kei na viakana

Ka rawa me ra barilaka na wakanikau ena veivanua lala mai veikau.

4Era vakacavuta ka kania na veika era tubu vakaveitalia tu ga e loma ni veikau,

Ka ra bau kania talega na waka ni junipa!

5Na tamata kecega e dau vakasavi ira ka qolouvaki ira,

Me vaka na noda dau qolouvaka e dua na daubutako.

6Sa nodra i tikotiko ga na veiqara vatu,

Era keli ena yasa ni veibari ni vatu.

7Era qolou mai loma ni veikau loa me vaka e tagi na manumanu kila,

Ka ra sorosoroni ena veiruku ni kau.

8Na i lala tamata tawa yaga ka sega na ka era rawata!

9Ia oqo era sa mai veiwalitaki au;

Au sa sega ni dua na ka, ka'u sa nodra ka wale ga ni veiwali.

10Era cakava vei au na i tovo vakasisila;

Ka ra nanuma ni ra vinaka cake mai vei au,

Ka ra kakasivi ni ra raica na mataqu.

11Era sa saumaki lesu ka saqati au ena kaukauwa taucoko ni nodra cudru,

Baleta ni ra sa raica ni sa vakamalumalumutaki au vakaca sara ga na Kalou.

12Era cavutu mai yasaqu i matau na i lala dauvakacaca oqo;

Era vakasavi au;

Ka ra vakarautaka na i otioti ni nodra samuti au.

13Era sogota na noqu sala ni dro ka ra tovolea me ra vakarusai au vakadua;

Ka sega sara ni dua e bau tarovi ira.

14Era curuma mai na veivanua galala ena noqu bai ni valu,

Ia ni sa kasura na bai, era qai tabili kece mai vei au.

15Sa qai bikai au e dua na rere levu ka cagina na noqu dokai

Me vaka na ka sa liwava yani na cagi;

Ka cagina laivi na noqu vutuniyau

Me vaka e dua na o.

16Ia oqo au sa vakarau mate

Ka'u sa sega ni vakacegui ena noqu rarawa.

17Sa mosi kece na suiqu ena bogi,

Ka'u sega ni vakacegu rawa ena mosi.

18Sa taura vakaukauwa na noqu i sulu na mosi oqo;

Ka muloraki au me vaka e muloraki na domo ni noqu kote.

19Sa viritaki au na Kalou ki na veilolobo;

Ka sega sara na keirau duidui kei na soso ni lolobo.

20Au kaci yani vei kemuni na Kalou,

O ni qai sega ni rogo mai;

Ia ni'u masu, o ni sega sara ga ni maleleta.

21O ni vakararawataki au;

Ka vakacacani au ena nomuni kaukauwa taucoko.

22O ni sa laiva na cagi me vukataki au tani;

O ni kolotaki au vaka ka vaka ni sa liwa tiko na cagilaba.

23Au kila tu ni o ni sa kauti au tiko ki na noqu mate,

Ki na i tinitini sa vakarautaki tu me nona na tamata yadua.

24A cava o ni valuta tiko kina e dua na tamata sa vakacacani tu

Ka sega na ka e cakava rawa,

Ka vakavo ga me vakamamasu me bau lomani?

25E sega li ni'u a bau tagi vata kei ira na leqa

Ka rarawa ena vukudra era viakana ka vakaloloma tu?

26Au a nuitaka tu me yaco mai na marau kei na rarama,

Ia sa qai kena i sosomi ga mai na leqa kei na butobuto.

27Au sa veilecayaki ga ena lomaocaoca kei na mosi;

Ka sega sara na ka tani sa tu mai liu, na rarawa duadua ga.

28Au sa lako ena loma ni butobuto ka sega kina na veivakacegui;

Au tucake e matanalevu ka cikeva na veivuke.

29Sa rarawa ka galili na rorogo ni domoqu

Me vaka na tagi ni dua na jekeli se dua na ositeriji.

30Sa vuki na i rairai ni kuliqu me loaloa;

Ka sa curumi au vakaukauwa na katakata ni tauvi mate.

31Ena vanua au a dau rogoca kina na domo ni vakatagi marautaki,

Sa yaco tiko kina ena gauna oqo na vakaloloku kei na tagi.