Vosavakaibalebale 16 - Vakavakadewa Vou kei na iVola tale eso（FNVDC12）

1Sa mai vua na tamata na i tuvatuva ni lomana, ia sa mai vua na Kalou na i otioti ni lewa.

2O sa rairai nanuma ni sa dodonu taucoko tu na veika o sa cakava, ia sa kila o Jiova na kedra i naki vuni ka sa vakataulewa kina.

3Kerea vei Jiova me vakalougatataka na nomu i tuvatuva, o na qai rawata vinaka kece ni o sa qarava.

4Na ka kece e vakayacora o Jiova e tiko na kena i cavacava, ka nodra i cavacava na tamata ca na rusa.

5Sa cati ira na tamata viavialevu o Jiova, ka na sega ni laivi ira me ra dro bula mai na cudruvi.

6 Tb 12.9 Mo yalodina ka dodonu sara, ena vosota kina na nomu i valavala ca o Jiova. Talairawarawa vei Jiova, ena sega ni tarai iko kina e dua na ka ca.

7Ni o sa vakalomavinakataki Jiova, sa rawa vei iko mo veivinakati tale kei ira na kemu meca me ra sa nomu i tokani voleka.

8 Tb 12.8 E vinaka cake me lailai na ka eda taukena ni rawati ena sala savasava, ka ca ni sivia na keda i sau mai na sala dukadukali.

9A loma ni tamata sa tuvana na ka me cakava, ia o Jiova ga sa lewa na nona i lakolako.

10Na vakatulewa bibi sa koto ena gusu ni tui; sa dodonu ka sega ni cala na nona lewa.

11Sa vinakata o Jiova na i vakarau ni ka me caka vakadodonu kei na veivoli kece sara me qaravi vakasavasava.

12E ka vakasisila vei ira na tui na i valavala ca, ni sa vakaduri cake na nodra i tikotiko vakatui ena caka dodonu.

13Era taleitaka na tui na tebenigusu sa dau vosa vakadodonu, ka vakaturagataka na tamata sa dautukutuku dina.

14Na tamata yalomatua ena segata me vakamarautaka tikoga na tui; ia kevaka sa cudru na tui, ena rawa ni basika na mate.

15Ni serau na matana na tui, sa dusia oqo na bula; na nona yalovinaka sa vaka na o e dau vakatubu uca ena vula i tubutubu.

16Sa uasivi cake me noda na yalomatua mai na rawati ni koula, kei na digitaki ni kila-ka mai na rawati ni siliva.

17Na tamata vinaka sa muria na sala sa gole tani mai na ca; o koya sa qarauna na nona sala sa qarauna na nona bula.

18Na dokadoka sa vakavuna na rusa, kei na viavialevu sa vakavuna na lutu sobu ni bula.

19E vinaka cake me da yalomalumalumu ka dravudravua, ka ca ni da vota vata na i toki ni valu kei ira na tamata viavialevu.

20O koya sa vakarorogo matua ki na i vakavuvuli ena sautu vakalevu, ka sa kalougata na tamata sa dinati Jiova.

21Na tamata yalomatua sa vakatakilai ena nona kila-ka, kei na vosa rogorogo matau sa vukea vakalevu na ciqomi ni i tukutuku.

22Na kila-ka sa vaka na wai tovure ki na bula vei ira sa yalomatua, ia sa vakaoti gauna na sasaga me ra vakavulici na tamata yalowai.

23Na tamata kila-ka sa qarauna na gusuna ena ka me tukuna; ka sa dau veirawai vakalevu na i vakavuvuli ni tebenigusuna.

24Na veivosa vinaka sa vaka na oni sa ka kamikamica ki na lomada ka veivakabulai ki na yagoda.

25 Vbale 14.12 Sa dua na sala sa rairai dodonu vua na tamata, ia sa kena i cavacava ga na sala ki na mate.

26Na gagadre ni tamata cakacaka sa vakavuna me cakacaka kina vakaukauwa, baleta me rawa kina ni vakamamautaki.

27Na tamata ca sa dauvakasaqara na sala ni veivakacacani, kei na nona vosa sa vaka na buka caucaudre.

28 Sr 28.13-26 A tamata yalovakatani sa vakavuna na veileti, kei koya na daukakase sa tawasei ira era veiwekani dina.

29Na tamata i tovo kaukauwa sa vakaisina na nona i tokani, ka sa tuberi koya ki na sala ni rusa.

30Na tamata sa sauriva na matana sa vakasamataka na ka vakatani; kei koya sa yavalata na tebenigusuna sa vakayacora na ca.

31A nodra i cocovi na yalododonu na bula balavu; na ulu sikoa sai sala vakaiukuuku ka dokai.

32E vinaka cake na tamata dauvosota vei koya na tamata qaqa, kei koya sa lewa vinaka na yalona vei koya sa kaba na koro levu.

33Era sa vakawiri madigi na tamata me kilai kina na loma ni Kalou, ia sa mai vei Jiova duaduaga na kena lewa.