Same 63 - Vakavakadewa Vou kei na iVola tale eso（FNVDC12）

Yalovakacegu ena Mata ni KalouA Same i Tevita, ni sa tiko ena vanua lala mai Juta.

1Oi kemuni na Kalou, sai kemuni na noqu Kalou,

Ka'u sa gadrevi kemuni.

Sa gadrevi kemuni na veitiki ni noqu bula taucoko;

Ka sa karamaca ena viagunu vei kemuni na yaloqu,

Me vaka e dua na vanua mamaca sa sega kina na wai.

2Au gadreva me'u rai yani vei kemuni ena nomuni vale tabu

Me'u raica na nomuni qaqa kei na nomuni lagilagi.

3Ni sa vinaka cake sara na nomuni loloma tudei mai na bula,

Io, ena vakacaucautaki kemuni kina na tebe ni gusuqu.

4Au na vakavinavinaka vei kemuni ena gauna kece ni noqu bula;

Ka'u na laveta cake yani na ligaqu vei kemuni ena masu.

5Ena kana ga ka mamau na yaloqu,

Ka'u na lagata na veisere ni vakacaucau eso vei kemuni.

6Ni'u davo ena i davodavo, au sa dau vakananumi kemuni;

Au vakasamataki kemuni ena bogi taucoko,

7Ni sai kemuni ga ka sa dau vukei au voli.

Au na laga sere ena marau ena yaloyalo ni tabamuni.

8Au sa kabiti kemuni

Ka'u sa maroroi au na ligamuni i matau.

9Ia, o ira era sa tovolea me ra vakamatei au,

Era na lako sobu ki na nodra vuravura na mate.

10Era na vakamatei ena i valu,

Ka ra na kania na yagodra o ira na oliva.

11Ena marau na tui ni sa solia vua na qaqa na Kalou,

Era na marau o ira kece era vosa yalayala ena yaca ni Kalou,

Ia, na gusudra ga na tamata lasulasu ena sogoti.

A Masu ni Kere Veitaqomaki

Vua na i liuliu ni sere. A Same i Tevita.