Tobita 14 - Vakavakadewa Vou kei na iVola tale eso（FNVDC12）

1Sa tinia e ke o Tobita na nona vosa ni veivakacaucautaki.

Na itatau i Tobita

2Sa yabaki onosagavulukarua e na gauna a mataboko kina. Ni sa qai rai tale, sa maucokona tale nona bula. A dau lomani ira na dravudravua, qai doka tiko ga na Turaga na Kalou a vakacaucautaki koya. Sa yabaki dua na drau tinikarua qai mate, qai bulu e na vakarokoroko mai Ninive.

3Sa vakarau mate, a kacivi luvena, a kaya, “Na luvequ, tauri iratou na luvemu,

4Nie 1.2–3.19dou dro i Mitia, niu vakabauta dina na vosa ni parofita o Neumi me baleti Ninive, ni sa vakarau vua na kuita ni Kalou. Nodra vosa kece na parofita ni Kalou me baleti Ninive kei Asiria e na yaco dina. E na vakavotukana dina e na kena gauna. Au kila deivaki o yau ni vosa kece ni Kalou e na yaco ga, e na vaka dina kina, e sega ni bau cala e dua na nona vosa. Dou na maroroi vinaka mai Mitia, mai Siria se Papiloni e sega.

“Era na veiseyaki e dela i vuravura na wekada mai Isireli. E na lala na vanua vinaka ya, rau na vakavuai o Samaria kei Jerusalemi. Na kena vale ni Kalou, e na kama yavu, e na rusa tu.

5Ia na Kalou e na lomani ira tale, e na tuberi ira tale i na nodra vanua; era na qai tara tale na vale ni Kalou, e na sega ga ni vaka na kena e liu me yacova na kena gauna. E na gauna ya era na lesu tale mai e na vanua era bobula tu kina, era na qai tarai Jerusalemi tale e na kena lagilagi. E na qai tara tale kina na vale ni Kalou, me vaka nodra vosa na parofita.

6Era na qai vuki na kaitani mera doka dina na Turaga na Kalou, era na biuta na qaravi matakau sa vakacalai ira.

7Na kaitani kece era na vakacaucautaka na Kalou tawamudu e na nodra muria nona vosa. O ira kece na lewe i Jerusalemi era muria na Turaga na Kalou e na dina kei na dodonu, e na vakabulai ira na Kalou, e na soqoni ira i Jerusalemi, me nodra na vanua i Eparahama, mera tiko vakacegu tu ga kina. Era na reki na lomana dina na Kalou, ia o ira na dau valavalaca, era na kau tani e vuravura.

8“Qo na noqu itatau vei kemudou na luvequ. Dou qarava na Kalou e na yalodina,

9dou vakadreti iratou na luvemudou meratou dau valavala dodonu, meratou dau soli vei ira na vakaloloma, meratou dau vakalagilagia na Kalou e na yalodina.

10“Koya gona luvequ, biuti Ninive sara, kua tale ni tiko e ke. Nio sa buluti tinamu ga e yasaqu, siga sara ga qori mo lako kina. Kua tale ni tiko e loma ni koro. E koro ca, sinai kina na itovo ca, era sega ni kila na madua na lewenikoro. Raica luvequ na ka a cakava o Natavi vei Ahikari, na tamana vakacabecabe. A via vakamatei koya, qai vakavuna me lai vuni e na fonualoto. O Ahikari a vura tale mai i na rarama ni siga, ia na Kalou sa vakatalai Natavi i na buto tawamudu, me isau ni nona ivalavala. O Ahikari a dau lomani ira na dravudravua, mani calata na kena dai a biria o Natavi; ia a coko kina o Natavi qai mate.

11Koya gona ragone, dou vakasamataka mada na yaga ni lomani ira na dravudravua kei na vua ni yalododonu. Ia au sa malumalumu sara.” Sa vakadavori o Tobita e na nona loga, mani mate, qai bulu e na vakarokoroko.

12Ni qai mate o watina, rau sa bulu vata.

Eratou sa qai lesu tale vakaveitamani i Ekevatana mai Mitia vei Rakueli na vugo i Tobia.

13E qaravi Etenā kei Rakueli nirau sa qase mai, e rokovi rau. Nirau sa mate, sa buluti rau mai Ekevatana. A qai nona na nodrau iyau, me vaka na nei tamana o Tobita.

14Sa yabaki dua na drau tinikavitu, qai mate mai Ekevatana e Mitia.

15Se bera ni mate, sa rogoca ni sa vakavuai o Ninive, sara bobula na lewenikoro vei Siakeresi na Tui Mitia. A vakacaucautaka na Kalou e na nona kuitataki ira na kai Ninive kei Asiria, me yacova nona mate.