Isikeli 14 - Vakavakadewa Vou kei na iVola tale eso（FNVDC12）

Sa Cudruva na Kalou na Qaravi kalou Matakau

1A qai lako mai vei au eso vei ira na qase ni Isireli, ka mai tiko e mataqu.

2A sa vosa vei au o Jiova, ka kaya,

3“Luve ni tamata, o ira na tamata oqo era sa dui vakaduria na nodra matakau ena lomadra, ka ra dui tauca e matadra na nodra caka cala era tarabe kina; me'u vakalaiva li me ra vakatarogi au o ira oqo?

4O koya oqo mo kaya kina vei ira, ‘Sa kaya vakaoqo na Kalou o Jiova: Na tamata yadua ni mataqali i Isireli sa vakaduria na nona matakau e lomana, ka sa tauca e matana na nona caka cala sa tarabe kina, ia me qai lako ga vua na parofita; oi au o Jiova au na sauma vua sa levu na nona matakau;

5me rawa ni'u taura na lomadra na mataqali i Isireli, o ira kecega ka ra yalo vakatani vei au ena vuku ni nodra matakau.’

6O koya oqo, mo ni kaya kina vei ira na mataqali i Isireli, ‘Sa kaya vakaoqo o koya na Kalou o Jiova: Ni veivutuni, biuta tani na nomuni matakau, ka vakanadakuya na nomuni veika vakasisila kecega’.

7“O ira yadua na mataqali i Isireli, kei ira na kai tani era tiko mai Isireli, vei koya sa tawasei koya tani mai vei au, ka vakaduria na nona matakau e lomana, ka sa tauca kina e matana na nona caka cala me tarabe kina, ka qai lako vua na parofita me tarogi au vua; au sa na vosa ka sauma yani vua oi au o Jiova;

8ia ka'u na vakaukauwataka se vakacudrucudruya na mataqu vua na tamata o ya me sa ca, ka'u na cakava me dua o koya na i vakatakilakila kei na i bole, ka muduki koya tani mai vei ira na noqu tamata; ia o ni na kila ni sai au o Jiova.

9“Ia kevaka sa vakacalai na parofita, ni sa cavuta e dua na ka, sai au o Jiova ka'u na vakacala na parofita o ya, ia ka'u na dodoka yani na ligaqu, ka vakarusai koya tani mai vei ira na noqu tamata na Isireli.

10Era sa colata na i sau ni nodra dui caka cala - me rau tautauvata na nona cudruvi na parofita kei koya ka la'ki taro vua

11me kakua tale ni lako sese mai vei au na mataqali i Isireli, se me ra vakadukadukalitaki ira tale ena nodra talaidredre kecega; ia me ra yaco mada ga me ra noqu tamata, ka me'u yaco talega me'u nodra Kalou, sa kaya o Jiova.”

12A yaco tale vei au na vosa i Jiova, ka vaka,

13“Luve ni tamata, ni sai valavala ca vei au e dua na vanua ni sa talaidredre sara, ka'u na qai dodoka yani kina na ligaqu, ka muduka na kakana e bula kina, io, na madrai, ka vakavuna kina na viakana, ka muduka tani mai kina na tamata kei na manumanu.

14Kevaka mada ga e ratou tiko kina na tamata tolutolu oqo, o Noa, o Taniela, kei Jope, e ratou sa dui vakabula ga na yalodratou ena nodratou yalo dodonu, sa kaya na Kalou o Jiova.

15“Kevaka ka'u sa lewa me lakova na vanua na manumanu ca, ka ra vakacacana, me lala, ka sega na tamata me lako rawa kina ena vuku ni manumanu; ia kevaka mada ga e ratou tiko kina na tamata tolutolu oqo,

16me vaka na dina ni noqu bula, sa kaya na Kalou o Jiova, e ratou na sega ni vakabula rawa na luvedratou tagane se na luvedratou yalewa; e ratou na vakabulai ga o iratou tolutolu; ia na vanua ena lala ga.

17“Ia kevaka ka'u sa vakayacora ki na vanua na i seleiwau, ka kaya, Laiva na i seleiwau me lako voli yani ki na loma ni vanua; ka me'u muduka tani mai kina na tamata kei na manumanu;

18ia kevaka mada ga e ratou tiko kina na tamata tolutolu oqo, me vaka na dina ni noqu bula, sa kaya na Kalou o Jiova, e ratou na sega ni vakabula rawa na luvedratou tagane se na luvedratou yalewa; ia e ratou na vakabulai ga o iratou.

19“Se kevaka ka'u na vakayacora ki na vanua na mate dauveitauvi, ka sovaraka kina na noqu cudru ena mate, me'u muduka tani kina na tamata kei na manumanu;

20ia kevaka mada ga e ratou tiko kina o Noa, o Taniela kei Jope, me vaka ga na dina ni noqu bula, sa kaya na luvedratou tagane se na luvedratou yalewa; ia ena vakabulai ira ga na nodra yalo dodonu.”

21Ni sa kaya vakaoqo na Kalou o Jiova, “Me na vakavica tale na noqu vakanakuitataki Jerusalemi ena va na i totogi ni veivakarusai ni noqu cudru, o ya na i seleiwau, na dausiga, na manumanu ca, kei na mate dauveitauvi, me'u muduka tani mai kina na tamata kei na manumanu!Vtaki 6.8

22Ia kevaka era i vovo ni bula, me ra kauti ira tani na gone tagane kei na gone yalewa, era na lako mai vei kemuni: ia mo ni raica na nodra i tovo kei na nodra i valavala; dou na qai vakacegui ena vuku ni ka ca ka'u sa kauta mai ki Jerusalemi kei na ka kece ka'u sa vakayacora kina.

23Era na vakacegui kemuni, ni o ni sa raica na nodra i tovo kei na i valavala; o ni na qai kila kina ni'u sa sega ni cakava wale na ka kece ka'u sa vakayacora kina,” sa kaya na Kalou o Jiova.