1Ia ni raica o Balami ni sa vinaka vei Jiova me vosa vakalougatataki ira na Isireli, a sega ni muria tale me vaka e liu, o ya me vakasaqara na veivakatakilakila, ia sa vakanamata ga ki na vanua lala.
2A sa tacake o Balami, ka raici ira na Isireli ni ra sa vakaitikotiko vakamataqali. A sa qai curumi koya na Yalo ni Kalou,
3ka tekivu me vosataka na nona vosa vakaibalebale, ka vaka:
“Na vosa i Balami, na luve i Piori,
Na vosa ni tamata sa rai vakavinaka na matana,
4o koya sa rogoca rawa na vosa ni Kalou,
Ni yadra tu na mataqu au sa raica na raivotu,
A raivotu mai vei Koya sa Kaukauwa,
ni sa davo sobu, ia sa sega ga ni ubi na matana:
5Sa totoka na nomuni valelaca na luve i Jekope,
kei na nomuni veitikotiko na Isireli!
6Sa vaka na veiniusawa sa tuva vakamaqosa,
Se na veiwere ena bati ni uciwai,
Sa vaka na i saluwaki sa teivaka o Jiova,
Se na sitari ena bati ni wai.
7Era na drodro mai na wai mai na nona saqa ni wai,
Ka teivaki na nodra i tei ena qele suasua vinaka.
Na nodra tui ena cecere cake mai vei Ekaki,
Ka vakatetei yani na nona veiliutaki.
8Sa kauti ira tani mai Ijipita na Kalou;
Sa valuti ira me vaka na bulumakau kila.
Era sa vakadrukai ira na nodra meca,
Era sa qaqiraka na suidra ka vakacacana na nodra dakaititi.
9Na matanitu sa vaka e dua na laione levu;
Ni sa koto sobu me moce, sa sega e dua me via vakayadrata.
O ira yadua sa vosavakalougatataki Isireli ena vakalougatataki talega vakakina.
O ira yadua sa cudruvi Isireli ena cudruvi talega vakakina.”
10A sa waqa vei Balami na cudru i Pelaki ka tavia vata na ligana, ka kaya vei Balami Au sa kacivi iko mo mai tauca na vosa-ni-cudru vei ira na kequ meca, ka raica, o sa mai vosa vakalougatataki ira tale vakatolu oqo.
11Ia oqo Balami, mo dro sara ki na nomu i tikotiko; a kaya o Pelaki, ‘Au na vakalevulevui iko vakaidina,’ ia ka qai tarovi iko o Jiova, mai na veivakalevulevui o ya.
12A sa kaya vei Pelaki o Balami, Au sa sega li ni tukuna vei ira na nomu i talai o a talai ira yani vei au, ka vaka,
13Kevaka mada ga e solia vei au o Pelaki na valenitui sa sinai tu ena siliva kei na koula, au na sega ga ni vorata na vosa i Jiova, me'u na kitaka na ka vinaka, se ka ca, vakataki au ga; ia na ka ga sa vosataka o Jiova, oqori ka'u na vosataka.
14Ia oqo, au sa na lako vei ira na kai noqu; mo lako mai me'u vakatakila mada vei iko na ka era na cakava vei ira na nomu tamata, o ira na tamata oqo ena gauna mai muri.
Na i Kava ni Tukutuku i Balami15A sa qai vakuria tale o Balami na nona vosa vakaibalebale ka kaya,
“Na vosa i Balami na luve i Piori,
Na vosa i koya na tamata sa rai vakavinaka na matana:
16O cei e rawa ni rogoca na ka sa vosa tiko kina na Kalou,
ka maroroya na i vakavuvuli i Koya sa Cecere Sara.
Ni rai vinaka tu na mataqu au sa raica e dua na ka,
E dua na raivotu mai vei Koya na Kaukauwa,
O koya sa lutu sobu mai, ka sa tadola tu na matana:
17Au sa raica na veika sa tu mai liu,
Kau sa raica na matanitu o Isireli.
E dua na tui, sa vaka e dua na kalokalo serau, ena vura mai kina.
Ena basika mai Isireli me vaka na kalokalo na komete.
Ena vorati ira na i liuliu ni vanua o Moapi
ka vakarusai ira kece na luve i Seci.
18Ena vakarusai ira kece na nona meca mai Itomi,
ka vesuka na nodra qele me nona,
ni ra rawata tikoga na qaqa o ira na Isireli.
19Ena butuqaqi ira na matanitu o Isireli,
ka vakawabokotaki ira era se bula tiko.”
20Ena nona raivotu o Balami, sa raici ira na Amalekaiti ka cavuta na vosa ni parofisai oqo:
“Na matanitu kaukauwa duadua mai vei ira na veimatanitu o Amaleki,
Ia, mai muri, ena yacovi koya na veivakarusai tawa mudu.”
21Ena nona raivotu o Balami, sa raici ira na Kenaiti ka cavuta na vosa ni parofisai oqo:
“Sa kaukauwa ka tudei na nomuni i tikotiko,
Sa tudei me vaka na sova ni manumanu sa la'ki toka ena dua na bai vatu cecere;
22Ia o ni na vakarusai na Kenaiti,
Ena gauna sa kauti kemuni vakabobula kina o Asiria.”
23Sa vakuria tale na parofisai o Balami, ena nona tukuna,
Isa lei! O cei tale me na qai bula rawa ni sa kitaka na ka oqo o Jiova?
24E vuqa na waqa era na soko mai Saipurusi;
Era na ravuti Asiria kei Iperi,
Ia, era na vakarusai talega.
25A sa qai cavutu o Balami, ka lesu ki na nona i tikotiko; a lako talega yani o Pelaki.
Who We AreWhat We EelieveWhat We Do
2025 by iamachristian.org,Inc All rights reserved.
