1Nira sa rogoca na sotia e na veivalelaca, era kidroataka na ka sa yaco.
2Sa tuburi ira na rere kei na sautaninini, era sa mani sega ni veiwaraki, era sa dui kubu ga mera veidroyaki e na sala kece e loma ni buca kei na veidelana.
3O ira era keba tu e na colo kei Beculia, era sa dui dro tale ga. Era qai cicivi ira yani na sotia kece ni Isireli.
4Sa qai vakatadu mata o Usia i Betomesecaimi, Bevai, Jova, Kola kei na iyalayala kece kei Isireli me vakasavui na kena itukutuku, me vakauqeti ira kece mera cicivi ira na kedra meca mera ravuti ira.
5Nira sa rogoca na Isireli, era sa duavata mera ravuti ira na meca, ra qai samulaki ira me yaco sara i Jova. Era lako tale ga mai na kai Jerusalemi kei na kai colo ni sa tukuni vei ira na ka sa yaco e na keba ni meca; erau taisautaki ira na kai Kiliati kei Kaleli, ra ravuti ira vakaca sara, me sivita na iyalayala kei Tamasiko.
6Na vo ni kai Beculia era curuma nodra keba na kai Asiria, ra yauta na veika e tu kina, ra mani vutuniyau sara kina.
7Nira sa lesu mai na ravuravu na Isireli, era sa qai qoqona na vo ni iyau, era qai wase tale ga kina na veikoro e na colo kei na buca, ni ka vakaitamera na itokinivalu.
Solevutaka o Isireli nona qaqa8Sa qai lako mai o Joakimi na bete levu kei na nodra seneti na kai Isireli eratou tu mai Jerusalemi, meratou vakadinadinataka na veika vinaka sa cakava na Turaga me baleti Isireli, meratou raici Udite tale ga, vakavinavinaka vua.
9Eratou lako yani vua, ratou vakalougatataki koya vata kece, ratou kaya, “O kemuni na iqoroqoro kei Jerusalemi, o kemuni na lagilagi levu kei Isireli, o kemuni na isakisaki ni noda vanua!
10Oni sa cakava taudua ga na ka levu qo; oni sa vueti Isireli, e vinaka sara vua na Kalou. Me vakalougatataki kemuni tawamudu na Kalou sau!” Era qai kaya kece na tamata, “Mana!”
11Era mani yanaraka kece na keba me tolusagavulu na siga. Era solia vei Udite na valelaca nei Oloferenesi vata kei na nona disi siliva kece, nona loga, nona bilo, kei na nona iyaya ni vale kece; sa qai vakavodoka kece e na meuli kei na kareti.
12Era qai soqo kece mai na yalewa ni Isireli mera raici koya, ra vakalougatataki koya, e so era meketi koya; sa qai tauri tabanikau o Udite qai solia vei ira na yalewa era tomani koya;
13era qai vakaisalataki ira e na drauniolive; sa qai liutaki ira kece na yalewa e na meke, ra qai muri yani na tagane, era vakaiyaragi, ra vakasalusalu, ra lagalagasere.
Who We AreWhat We EelieveWhat We Do
2025 by iamachristian.org,Inc All rights reserved.
