Tiko Voli mai na Lekutu 17 - Vakavakadewa Vou kei na iVola tale eso（FNVDC12）

1Sa kaya vei Mosese o Jiova,

2“Mo vosa vei ira na Isireli me ra kauta mai vei iko e tinikarua na i titoko, me ra yadua na i liuliu ni veimataqali.

3Mo vola na yaca ni tamata yadua ena nona i titoko, ka vola na yaca i Eroni ena nodra i titoko na Livai.

4Mo kauta ira na i titoko ki na Vale ni Veitavaki, ka biuta ena mata ni Kato ni Veiyalayalati, na tiki ni vanua ni nodaru veivosaki.

5Ena qai cadra na drauna mai na i titoko ni tamata ka'u sa digitaka; oqo me na tarova vakadua kina na nodra vosa kudrukudru tiko na Isireli me baleti iko.”

6Sa qai vosa vei ira na Isireli o Mosese, ka ra sa solia ki vua na nodra i titoko, me yadudua mai na veimataqali, sa tinikarua taucoko na kena i wiliwili, ka sa tiko talega kina na i titoko i Eroni.

7Sa qai biuta na i titoko taucoko o Mosese ki na mata i Jiova, me donumaka na Kato ni Veiyalayalati ena loma ni vale tabu.

8Ena mataka cake ni siga e tarava, ni sa curu ki na vale tabu o Mosese, sa raica ni sa cadra mai na draunikau ena i titoko nei Eroni mai na mataqali i Livai. Sa tubu cake vinaka sara na drauna kei na tabana, ka sa vuataka eso na amodi dreu.Ipe 9.4

9Sa qai kauta taucoko na i titoko o Mosese mai na mata i Jiova vei ira na Isireli me ra raica. Era sa raica na ka sa yaco, ka ra sa taura lesu na i liuliu yadua na nodra i titoko.

10Sa tukuna vei Mosese o Jiova, “Mo kauta tale na i titoko nei Eroni me la'ki maroroi tiko ena mata ni Kato ni Veiyalayalati, me i dusidusi tiko vei ira na tamata dauvakaduiduile me ra tinia vakadua kina na nodra vosakudrukudru me baleti au, de ra na qai mate.”

11Sa vakayacora oqo o Mosese me vaka sa vakarota o Jiova.

12Era sa kaya vei Mosese na Isireli, “Keimami sa na mate, keimami sa na kawaboko, io keimami sa na kawaboko kecega.

13O ira yadua na lako volekata yani na vale tabu era na mate. E dodonu beka li me da mate kece?”