1Era a vala kei ira na Isireli na kai Filisitia; era a dro tani na Isireli mai vei ira na kai Filisitia, ka ra bale mate mai Ului Qiliboa.
2Era a cici muri Saula ka tauri koya kei iratou na luvena tagane na kai Filisitia; ka ra vakamatei Jonacani, Amenatave, kei Malikisua o iratou na luve i Saula.
3Sa kaukauwa na i valu ena yasa i Saula, era sa vanai koya na dauvana ka sa mavoa bibi kina.
4A sa kaya o Saula vua na nona dau cola i yaragi, “Mo ucuna na nomu i seleiwau, ka suaki au kina; de ra lako mai na tamata tawa cili oqo, ka suaki au, ka vakalialiai au.” A sa bese na daucola nona i yaragi; ni a rere vakalevu. A taura o Saula na nona i seleiwau ka bikaca.
5Ia ni sa raica na dau cola i yaragi ni sa mate o Saula, sa bikaca talega na nona i seleiwau, ka mate vata kaya.
6A sa mate o Saula vata kei iratou na luvena tagane, na nona dau cola i yaragi, kei ira kecega na nona tamata ena siga o ya.
7Ia ni ra sa raica na Isireli era a tiko ena yasa ni buca ka dua, kei ira era tiko mai na tai ka dua ni Joritani, ni ra sa dro na Isireli, ka ratou sa mate o Saula kei iratou na luvena, era a qai biuta na nodra veikoro ka dro; era a curuma na kai Filisitia, ka la'ki tawana.
8Ia ena mataka, ni ra a lako na kai Filisitia me ra luvata tani na nodra i sulu na moku, era a kunei Saula kei iratou na luvena tolutolu ni ratou a bale mate koto mai Ului Qiliboa.
9Era a tamusuka na uluna, luvata tani na nona i yaragi, ka ra vakatadumata voli ki na nodra vanua na kai Filisitia, me ra tukuna ena burekalou ni nodra veimatakau, vei ira talega na tamata.
10Era a ciqira na nona i yaragi ena burekalou i Aseteroci; ka ra vakota na yagona ki na bainikoro mai Pecisani.
11Ia ni ra rogoca na kai Jepesi Kiliati na ka era a kitaka vei Saula na kai Filisitia,
12era a cavutu o ira kecega na tamata qaqa, ka lako ena bogi taucoko o ya, ka la'ki kauta sobu na yago i Saula, kei na yagodratou na luvena, mai na bainikoro mai Pecisani, ka kauta tale mai ki Jepesi, ka vakama kina.
13Era a kauta na suidratou, ka buluta ena ruku ni vunikau na Tamarisiki mai Jepesi, ka ra lolo me bogi vitu.
Who We AreWhat We EelieveWhat We Do
2025 by iamachristian.org,Inc All rights reserved.
