Josua 22 - Vakavakadewa Vou kei na iVola tale eso（FNVDC12）

Lesu o Ira na Mataqali mai na Tokalau ki na Nodra Vanua

1Sa qai kacivi ira vata na lewe ni mataqali i Rupeni, Kata kei na veimama ni mataqali i Manasa o Josua.

2Sa qai tukuna vakaoqo vei ira, “O ni sa vakayacora na veika kece a vakaroti kemuni kina o Mosese na tamata ni Kalou, ka o ni sa muria talega na noqu i vakaro taucoko.

21Era sa qai vosa vei ira na turaga ni veivuvale ni veimataqali ena ra, o ira na lewe ni mataqali i Rupeni, Kata kei na veimama ni mataqali i Manasa, ka vaka,

22“O koya sa kaukauwa sara, o Jiova na Kalou! O Jiova na nodra Kalou na veikalou! Sa kila o koya. Ia me kila talega o Isireli! Kevaka keimami sa cakava na veika oqo ena loma i keimami ka talaidredre vei Jiova, ia me kakua sara ni qai vo bula e dua vei keimami ena siga edaidai.

23Kevaka keimami sa vakanadakui Jiova ka tara cake ga na neimami dui i cabocabonisoro, ka vakacabora kina na i soro kama kei na i madrali laukana, se vakacabora kina na i soro ni veivinakati, ia me qai cudruvi keimami ga kina o Jiova.

24Keimami sa sega ni cakava na ka oqo ena vuku ni rere de dua na siga era na tukuna kina na luvemuni vei ira na luve i keimami, “Na cava o ni sa cakava kina na ka oqo vei Jiova na Kalou ni Isireli?

25Sa biuta tu na uciwai na Joritani o Jiova me tawasei keimami kina vei kemuni na luve i Rupeni kei ira na luve i Kata! Sa sega na nomuni votavota vei Jiova.” Era qai vakavuna o ira na luvemuni me ra sega ni qaravi Jiova o ira na luve i keimami.

26Ena vuku ni ka oqo, keimami sa tara cake kina e dua na i cabocabonisoro ka sega ni kena i naki me vakacabori kina na i soro kama se i madrali.

27Ia sa tara ga me i vakadinadina vei ira na neimami tamata kei ira na nomuni, ka vakakina vei ira na veitabatamata kece era na muri keda mai, ni keimami sa qaravi Jiova talega ena nona vale tabu ena neimami i madrali vakamai, na i soro eso kei na i madrali ni veivinakati. Oqo me ra kakua ni tukuna kina na luvemuni vei ira na luve i keimami, “Sa sega na nomuni votavota vei Jiova.”

28Keimami sa nanuma kina de mani dina na ka oqo, era na qai tukuna na luve i keimami, ‘Raica! O ira na neimami qase era a tara e dua na i cabocabonisoro i Jiova. E sega ni caka me vakamai kina na i madrali, se na i soro, ia me i vakadinadina ga vei ira na neimami tamata kei ira na nomuni.

29Keimami na sega sara ni vakadrecike ka vorati Jiova, se bese ni muri koya edaidai mai na kena tarai cake e dua na i cabocabonisoro me vakamai kina na i madrali, se me cabori kina na i madrali laukana, se i soro. Keimami na sega ni tara tale e dua na i cabocabonisoro ka rokova ga na cabocabonisoro i Jiova ka toka ena mata ni nona Valelaca tabu.”

30Ia ni ra rogoca, na nodra i vakamacala na mataqali i Rupeni, Kata kei na veimama ni mataqali i Manasa, o Finiasi na bete kei ira na turaga ni veimataqali kei ira na i liuliu ni veivuvale ena ra, era sa vakacegui.

31Sa qai vosa vei ira na Rupeni, na Kata kei ira na Manasa, o Finiasi na bete na luve i Iliesa ka tukuna, “Eda sa qai kila edaidai ni sa tiko kei keda o Jiova. O ni a sega ni vakauyalomuni mo ni vorati koya, ka o ni sa vakabulai keda na lewe i Isireli mai na cudru i Jiova.”

32Sa qai lesu tale o Finiasi na bete na luve i Iliesa kei ira na i liuliu ki Kenani, vei ira na Isireli me ra la'ki vakasavu i tukutuku kina ka biuti ira tu yani na mataqali Rupeni kei Kata ena vanua o Kiliati.

33Era sa vakacegui na Isireli ka vakavinavinaka vua na Kalou. A sega tale ni qai toso i na veivosakitaki ni nodra la'ki valuta ka vakarusa na vanua era tawana na mataqali i Rupeni kei Kata.

34Era sa vakatoka na i cabocabonisoro oqo na mataqali i Rupeni kei Kata me o ‘Vakadinadina’ baleta ni ra tukuna, “Na i cabocabonisoro oqo sai vakadinadina vei keimami ni sa Kalou o Jiova.”