Vosavakaibalebale 19 - Vakavakadewa Vou kei na iVola tale eso（FNVDC12）

1E vinaka cake me da dravudravua ka yalododonu, e ca ga me da tamata yalowai ka lasulasu.

2Na yalo gu sa segai kina na kila-ka sa sega ni vinaka; na sega ni dauvosota ena vakavuna na nomu leqa.

3Eso na tamata era sa vakarusai ira ga ena veika lialia era cakava ka ra qai beitaki Jiova kina.

4Na tamata vutuniyau sa dau levu cake tikoga na i wiliwili ni nona i tokani, ia na tamata dravudravua sa dredre vua me kabiti iratou matua tikoga na nona i tokani e lewe vica wale ga.

5O koya e tukuna na ka lasu ena mataveilewai ena totogi ena sega ni rawa ni dro bula o koya.

6Na tamata kece sa vinakata me ra vakalomavinakataki ira na tamata rogo ka kilai; era sa via veikilai kecega na tamata kei ira sa dausolia na ka ni veivuke eso.

7Era sa sega ni yaga vua na tamata dravudravua na tacina; sa rauta me sega na nona i tokani. Veitalia sara ga na nona saga vakaukauwa, ena sega sara ni rawata e dua.

8O koya sa rawata na vuku sa lomana na yalona; o koya sa maroroya na nona kila-ka ena kune ka vinaka.

9E sega ni dua na tamata e tukuna na ka lasu ena mataveilewai me na sega ni totogi; ena yaco ga vua na leqa.

10E sega ni dodonu me bula ena bula ni tamata vutuniyau na tamata lialia, ka sega ni dodonu me lewai ira na turaga, na tamata bobula.

11Na tamata yalomatua sa dau lewa vinaka na nona cudru ni yalona. Ni dua e caka ca vei iko, sai vakarau uasivi ga me da kakua ni via kauwaitaka.

12Na cudru ni tui sa vaka na tagi ni laione, ia na nona yalovinaka sa vaka na kena yaco mai na uca sa gadrevi vakalevu.

13Na gone lailai sa rawa ni vakavuna na rusa i tamana, ia na yalewa vakawati dauveileti sa vaka na wai e turu tikoga ka sega ni mudu.

14Sa rawa vua e dua na tamata me taukena e dua na vale kei na i lavo mai vei rau na nona qase, ia sa rawa duadua ga vei Jiova me solia vua e dua na watina yalomatua.

15Na vucesa sa dauvakavuna na moce lutu; na tamata e tu wale ga ena sega na kena kakana.

16Maroroya na lawa ni Kalou, ena balavu kina na nomu bula; ni kevaka o sega ni kauwaitaka, o na mate.

17Na nomu soli-ka vua na tamata dravudravua sa vaka na soli-ka vei Jiova, baleta ni na sauma lesu o Jiova.

18Vakavulica na luvemu ni ra se gone ni se rawa me ra vakavulici; kevaka e sega, o sa vukei ira tikoga me ra vakarusai ira.

19Kevaka e dua na tamata e yalo katakata, laiva me sota kaya ga na i sau ni nona yalo katakata. Kevaka o sa vukei koya ena i matai ni gauna mo kauti koya tani mai na leqa, o na cakava tale vakarua.

20Kevaka o sa dauvakarorogo ki na i vakasala ka o sa gadreva mo vakavulici, ena yaco mo tamata yalomatua ena dua na siga.

21Sa rawa ni nakita na tamata e vuqa sara na ka, ia ena qai vakayacori ga na loma i Jiova.

22Sa dua dina na ka vakamadua me da kocokoco; sa vinaka cake sara na tamata dravudravua mai vua e dua sa daulasulasu.

23Mo talairawarawa vei Jiova, ena qai balavu kina na nomu bula ka yaco kina vei iko na bula vakacegu kei na tiko vinaka.

24Eso na tamata era sa rui vucesa vakalevu me ra biuta ga ki gusudra na kedra kakana.

25E dodonu me ra cudruvi na tamata dokadoka, me rawa ni ra vuli kina na tamata era lecaika. Kevaka o sa yalomatua, o na vulica na ka mai na nomu vakadodonutaki.

26Na tamata ga e veivakamaduataki ka veivakalolomataki ena vakasosataki tamana ka vakatala na tinana mai na nona vale.

27Na luvequ ni sa mudu ga na nomu vuli, sa na totolo talega na nomu guilecava na veika o sa bau kila tu.

28Na tamata i vakadinadina ca ena tukuna na ka lasu. Na tamata ca sa daugadreva ga me cakava na ka ca.

29Na tamata yalowai ka dauveivakaisini e ciqoma ga na kena kuita.