Tobita 3 - Vakavakadewa Vou kei na iVola tale eso（FNVDC12）

Masu o Tobita

1Au mani tagi e na levu ni rarawa, au masu e na yaluma levu, au kaya,

2“O kemuni saka na yalododonu; na nomuni cakacaka kece kei na nomuni itovo kece e sinai e na loloma kei na dina, nomuni vakataulewa e dina e dodonu tawamudu.

3Ni nanumi yau, lomani yau, ni kua ni totogitaki yau e na noqu ivalavalaca kei na lecaika kei na nodra cala na noqu itubutubu e matamuni,

4nira beca na nomuni ivakaro, oni mani lewa me keimami butakoci, kau vakabobula, vakamatei; oni lewa me keimami vakasewasewani e na veimatanitu keimami dui se kina.

5E dodonu kece na nomuni lewa moni totogitaki yau e na noqu ivalavalaca kei na nodra na tubuqu, ni keimami a beca na nomuni ivakaro, keimami sega ni yalodina vei kemuni.

6Qo, moni veitaliataki yau; ni vakarota me lesu yani na yaloqu meu suka tale o yau meu kuvuniqele. Sa ca vei yau na bula, niu sa rogoca na veibeitaki lasu, sa rarawa vakalevu na lomaqu. Ni vakarota mada meu sereki mai na noqu rarawa meu lai vakacegu tawamudu; ni kua ni vakanadakui yau.”

Veilecayaki tu o Sera

7E na siga vata ga mai Ekevatana e Mitia, era sa beitaki Sera tale ga na luve i Rakueli o ira na vada nei tamana,

8ni sa vitu oti na watina, ia sa vakamatei iratou vituvitu o Asimoteo na tevoro ca ni se bera nirau tiko vata. Era qai kaya vua, “O sega ni kila nio dau kidomoki iratou na watimu? Sa vitu oti na watimu, sega ni dua e yaga vei iko.

9Na cava o mokulaki keitou kina? Keratou sa mate, muri iratou yani! Me kua ni dua na nomu kawa!”

10Na levu ni rarawa nei Sera sa tagi sara kina, qai cabe i na tabarua me kunati koya. Sa qai vakasama, mani kaya lo, “Sega, sa kua, de qai vosacataki kina o tamaqu, e na kainaki, ‘E duabau na luvemu yalewa o a lomana vakalevu, ia na levu ni nona rarawa sa kunati koya kina.’ Au sega ni via beitaki niu vakavuna na mate nei tamaqu e na nona lolositaki yau. Au na sega ni vakamatei yau, au na masuta ga na Kalou me laivi yau meu mate, me kua tale ni rarawa na yaloqu na rogoca na veidusi.”

Masu o Sera

11Sa qai tevu liga o Sera e yasa ni katubaleka, qai masu vaqo,

“Moni lagilagi saka na noqu Kalou,

me lagilagi tawamudu na yacamuni tabu dokai.

Mera vakacaucautaki kemuni tawamudu na nomuni veikabuli kece.

12Ia qo saka au sa qara yani vei kemuni.

13Ni vakarota meu sereki yani e vuravura qo meu kua tale ni rogoca na veidusi.

14Oni kila saka niu sega ni bau cala vata kei na dua na tagane,

15niu sega ni vakarogocataka na yacaqu se na yaca i tamaqu e na vanua au bobula kina.

O yau duadua na luve i tamaqu, e sega tale na luvena me kequ isosomi,

sega tale ga na wekana se vugona me watiqu.

Eratou sa mate e vitu na watiqu. Me icavai na bula?

Ia ke sega ni donu vei kemuni moni kauta tani noqu bula,

ni lewa meu dokai, meu lomani; meu kua tale ni rogoca na veidusi.”

E rogoca na Kalou na nodrau masu o Tobita kei Sera

16Na nodrau masu e rogoci ruarua e na lagilagi i koya na Cecere.

17Tiko 36.6-9; Tb 6.10-12Sa talai mai o Rafaele me mai vakabulai rau: me kalia laivi na seila ni mata i Tobita me rai tale kina; me soli Sera na luve i Rakueli me wati i Tobia na luve i Tobita, me vesuki Asimoteo tale ga na tevoro ca, ni dodonu ga me nei Tobia o Sera. Tiki ni gauna ya sa lesu mai kina o Tobita, curu i nona vale, sa siro sobu o Sera na luve i Rakueli mai nona rumu e cake.