Vosavakaibalebale 14 - Vakavakadewa Vou kei na iVola tale eso（FNVDC12）

1Sa tauyavutaki na veivalevale mai na nodra yalomatua na yalewa, ia sa vakacacani ga mai vei ira sa lialia ka lecaika.

2O koya sai valavala dodonu sa rerevaki Jiova, ia o koya sai valavala ca sa beci koya.

3Na dokadoka ni tamata lialia sa levu ga kina na nona vosa; ia na nona vosa na tamata vuku sa maroroi koya vakai koya.

4Ni sega na manumanu me dre na i siviyara, ena laladidi na nomu lololo, ia ni tiko na manumanu ena sinai sara ena sila.

5Na i vakadinadina ni tamata yalodina ena sega sara ni lasu, ia na i vakadinadina ni tamata lasulasu ena sega ni vakadinati ena dua na ka.

6Na tamata e dau dokai koya vakai koya ena sega ni rawa ni vuku, ia na tamata yalomatua sa totolo na nona kila-ka.

7Kakua ni vakailala vata kei na tamata yalowai; sa sega sara na ka vinaka me ra vakavulica vei iko.

8Na nona vuku na tamata yalomatua sa dusia vua na sala vinaka me lako kina, ia na nona lialia na tamata yalowai sa vakacalai koya vakai koya.

9Na tamata i valavala ca ena sega ni kauwaitaka kevaka e cala, ia na tamata vinaka ena gadreva me vosoti.

10Na nomu marau ena nomu taudua ga; na nomu rarawa ena nomu taudua talega. Ena sega ni dua mo drau na vota vata.

11Na nona vale na tamata ca ena rusa laivi; ia na nona vale na tamata yalododonu ena tudei tikoga.

12 Vbale 16.25 Na sala o nanuma ni sa rairai dodonu vei iko ena rawa ni la'ki tini sara ki na mate.

13Na veidredrevaki sa rawa ni vunia na yalo rarawa ni dua na tamata. Ia ni sa oti na mamarau, ena tiko ga na lomabibi ni rarawa.

14Na tamata ca ena sota kaya ga na i sau ni nona i valavala, ia na tamata yalododonu ena saumi me vaka na nona i valavala vinaka.

15Na tamata yalowai sa vakabauta na ka kecega, ia na tamata yalomatua ena raica vinaka na nona i lakolako.

16Na tamata yalomatua ena qarauna vinaka sara me kakua ni tacori ena dua na leqa, ia na tamata lialia ena sega ni kauwaitaka, ka na sega ni bera sa coko ki na ca.

17Na tamata yalo totolo sa dau cakava na veika lialia, ia na tamata yalomatua ena dau malumu tu ga.

18Na tamata lecaika ena sota kaya ga na i sau ni nona lialia, ia na tamata vuku ena saumi ena nona kila-ka.

19Era na cuva na tamata ca vei ira na tamata yalododonu ka masuta na nodra yalovinaka.

20Sa sega ni ra dau taleitaki na dravudravua ka ra sa cati talega mai vei ira era sa tiko veimaliwai, ia sa lewe vuqa ga na nodra i tokani na vutuniyau.

21Kevaka o gadreva mo marau, mo caka vinaka vei ira na dravudravua; sai valavala ca na nodra beca e dua na tamata.

22Kevaka o sa daucakava na veika vinaka, era na vakadinati iko ka dokai iko na tamata; ia kevaka o sa daucakava na veika ca, sa qai dua sara na cala levu o sa kitaka.

23Mo cakacaka ka o na rawata kina na nomu bula; kevaka o dadabe tu ga ka talanoa wale, o na dravudravua ga kina.

24Era na saumi na yalomatua ena vutuniyau, ia na tamata yalowai ena kilai ena nona lialia.

25Na tamata i vakadinadina dautukuna na ka dina sa vakabula na nodra bula e lewe vuqa, ia kevaka e tukuna na ka lasu sa vakarusai ira na tamata.

26Na rerevaki Jiova sa solia na veivakadeitaki kei na veikaroni vua e dua na tamata kei na nona vuvale.

27O gadreva li mo kakua ni mate? Na rerevaki Jiova sai vurevure ni bula.

28Na cecere ni dua na tui sa vakatautaki ki na levu ni tamata e liutaka, ia sa sega ga ni dua na ka o koya kevaka sa sega na nona tamata.

29Na tamata vuku e dau tu malua tu ga, ia na tamata yalo totolo sa vakaraitaka ga na nona lecaika.

30Na vakacegu ni vakasama sa solia na bula ki na yago, ia na vuvu sa vaka na mate ni vuca ni sui.

31Ni o vakararawataka e dua na tamata dravudravua, o sa beca na Kalou ka a buli koya.

32Na nona ca e dua na tamata sa vakavuna ga na nona rusa, ia na tamata vinaka sa taqomaki koya na nona i vakarau vinaka.

33Sa kune o yalomatua ena nodra vakasama kecega na tamata vuku, ia sa sega ni kune na vuku vua na tamata yalowai.

34Na yalododonu sa vueta cake e dua na matanitu, ia na i valavala ca sa rogo ca kina na matanitu.

35Era sa yalovinaka na tui vei ira na nodra vakailesilesi era sa rawata vinaka na nodra i tavi, ia era sa totogitaki ira era sega ni qarava vakavinaka na nodra cakacaka.