Jeremaia 18 - Vakavakadewa Vou kei na iVola tale eso（FNVDC12）

O Jeremaia ena Vale i Dautuli Kuro

1A sa kaya vei au na Turaga o Jiova,

2Lako sobu mada ki na nona vale na dautuli kuro, au na qai vosa vei iko mai kea.”

3Au mani lako kina, ka raica na dautuli kuro ni cakacaka tiko ena nona vanua ni tuli kuro.

4Ena veigauna e ca kina e dua na tiki ni kuro e tulia tiko, ena taura sara na tiki ni qele o ya ka tuliva kina e dua tani tale na ka e vinaka vua me cakava.

5A qai kaya vei au o Jiova,

6E sega li ni rawa vei au me'u cakava vei kemuni na Isireli na ka e cakava na dautuli kuro ena nona qele? Kemuni na Isireli o ni sa tiko ga ena ligaqu me vaka na qele ena ligana na dautuli kuro.

7Kevaka au kaya ena dua na gauna ni'u na cavuraka cake ka basuraka sobu, se vakarusa e dua na vanua se dua na matanitu,

8Ia e qai biuta na matanitu o ya na nona i tovo ca, au sa na veisautaka na lomaqu me baleta na ka au a tukuna me'u na cakava.

9Ia kevaka au kaya ni'u na tea se tara e dua na vanua se dua na matanitu,

10Ka qai vakayacora na veika ca na matanitu o ya, ia au na qai veisautaka na lomaqu me baleta na ka au a tukuna me'u na cakava.

11Ia oqo mo tukuna vei ira na Juta kei ira mai Jerusalemi ni'u sa nakita me'u cakava na veika me vorati ira ka vakarau me'u vakaitotogitaki ira. Tukuna vei ira me ra muduka na nodra i tovo ca, me ra veisautaka na nodra i tovo kei na nodra i valavala.

12Era na qai kaya, “Sega, sa sega na betena! Keimami na cakava ga na veika keimami via cakava.”

13O koya oqo a kaya kina o Jiova.

“Taroga mada na veimatanitu.

Sa bau yaco li

E dua na ka vakaoqo e liu?

Era sa cakava na Isireli

E dua na ka vakarerevaki!

14Sa bau mudu li

Na lutu ni wai cevata

Ena veidelana veivatu mai Lepanoni?

Sa bau maca li

Na kena veiuciwai batabata ni ulunivanua?

15Ia o ira na noqu tamata

Era sa guilecavi au;

Era sa vakama na ka boi vinaka

Ki na veimatakau.

Era sa tarabe ena sala e dodonu

Me ra lako kina,

Era sa sega tale ni qai muri

Ena veisala makawa,

Era sa lako

Ena veigaunisala a sega ni bau lakovi.

16Era sa cakava na vanua oqo

Me vanua lala,

Me beci ka tawa mudu.

O ira kece era lako kina

Era na kidacala

Ena ka era raica

Era sa kurea na uludra

Ena nodra kurabui.

17Au na cakava

Me ra veiseyaki na noqu tamata

E matadra na kedra meca,

Me vaka na kuvu ni qele sa cagina

Ena cagi tokalau.

Au na qai vakanadakui ira;

Ka'u na sega sara ni vukei ira

Ni sa yaco na leqa.”

18Ia era a qai kaya na tamata, “Me da sa bosea mada na ka me da cakava vei Jeremaia. Era sa tu na bete me ra na tuberi keda, era na tu na tamata vuku me ra vakasalataki keda ka ra tu na parofita me ra vunautaka na vosa ni Kalou. Me da vosa vakacacataki koya ka kakua ni vakarorogo ki na veika e tukuna.”

19A qai masu o Jeremaia, “Kemuni na Turaga, ni rogoca na veika ka'u sa kaya kei na veika era sa kaya na kequ meca me baleti au.

20Me i sau li ni ka vinaka na ka ca? Era sa kelia e dua na qara me'u sikalutu kina. Ni nanuma na noqu a lako mai vei kemuni ena vukudra, mo ni kakua ni vakatauca vei ira na nomuni cudru.

21Ia oqo, kemuni na Turaga, ni laivi ira me ra mate ena i valu. Laivi ira na yalewa vakawati me ra yava ka sega ni vakawati, laivi ira na tagane me ra mate ena veimate ca, kei ira na nodra cauravou me ra mate ena i valu.

22Talai ira lo eso me ra butako ena nodra veivale, ni cakava me ra tagi mai ena rere. Era sa kelia e dua na qara me'u sikalutu kina ka birika e dua na dai me'u coko kina.

23Ia, Turaga, o ni sa kila na vere ca kece era nakita me ra vakamatei au kina. Ni kakua ni vosota na nodra ca; ni kakua ni bokoca na nodra i valavala ca. Ni vakadrukai ira; ni vakayacora ena gauna ni nomuni cudru.