Jope 13 - Vakavakadewa Vou kei na iVola tale eso（FNVDC12）

1Na veika kece oqo sa raica na mataqu,

Ka sa rogoca na daligaqu ka sa kila.

2Na ka dou sa kila, au sa kila talega,

Ka'u sa sega ni lolovira sobu mai vei kemudou.

3Sa gadreva na yaloqu me'u vosa vei Koya sa Kaukauwa,

Ka veiletitaka na noqu kisi kei na Kalou.

4Dou sa ubia na nomudou lecaika ena vosa lasu;

Dou sa vakataki ira na vuniwai sa sega ni vakabula rawa e dua.

5Kevaka wale ga mo dou vakadigagalu!

Ena vukumudou, o ya na yalomatua.

6Dou rogoca mada me'u tasereka na noqu kisi;

Ka vakarogoca na kerekere ni tebenigusuqu.

7A cava na vu ni nomudou lasu?

Dou nanuma beka ni na yaga vua na Kalou na nomudou lasu?

8Dou tovolea tiko li mo dou tovaka na Kalou?

Dou na veiletitaka li na nona kisi ena mataveilewai?

9Kevaka e raici kemudou matua na Kalou,

Ena bau kunea kina li e dua na ka vinaka?

Dou nanuma beka ni dou na rawa ni vakalialia na Kalou,

Me vaka na nomudou vakalialiai ira na tamata?

10Ena vunauci kemudou vakaidina,

Kevaka dou sa cakacaka lo vakatawadodonu.

11Ena sega li ni vakarerei kemudou na nona cecere?

Ena sega li ni lutuki kemudou na yalo ni rerevaki koya?

12Sa tawayaga me vaka na dravusa na nomudou i vakasala;

Ka malumalumu me vaka na qele ni tuli kuro na nomudou i vakamacala.

13Dou vagagalu mada ka vakalaivi au me'u vosa,

Ka mo dou kakua ni leqataka na kena i soqoni.

14A cava na vuna me'u biuti au kina ena dua na vanua dredre

Ka vakavuna ga na noqu mate vakataki au?

15Sa yali kece na noqu vakanuinui, ka cava ena yaco ke vakamatei au na Kalou?

Au na vakaraitaka ki vua na ka me baleti au.

16De lakolako ena vakabulai au na noqu yalo doudou,

Ni sa sega na tamata ca me torovi koya rawa na Kalou.

17Dou vakarorogo vinaka mada ki na noqu vosa,

Kei na noqu vakatutu ki na daligamudou.

18Sa vakarau me'u tukuna na ka e baleti au,

Baleta ni'u kila ni'u sa caka dodonu.

19Ena rawa li ki vua e dua me beitaki au ena cala eso?

Kevaka sa vakakina, au sa tu vakarau me'u vagagalu ka mate yani.

20Ia mo ni solia ga vei au e rua na ka, kemuni na Kalou,

Ka'u na qai sega ni vuni kina mai vei kemuni.

21Mo ni muduka mada na nomuni totogitaki au tiko,

Ka me kakua ni vakarerei au na veika rerevaki mai vei kemuni.

22Kemuni na Kalou, ni vosa mai e liu, ka me'u qai sauma yani.

Se me'u sa vosa yani, ka mo ni qai sauma mai.

23Na cala kei na i valavala ca cava soti au sa vakayacora?

Ni vakatakila mada mai na noqu talaidredre kei na noqu malumalumu?

24A cava na vuna o ni sa vunia kina na matamuni?

Ka wiliki au me'u kemuni meca?

25O ni na vakacacana beka e dua na draunikau sa cagina?

Se vakacemuria e dua na draunico madu?

26O ni sa vola na veibeitaki wiwi me baleti au,

Ka vakavuna me'u taukena na noqu i valavala ca ni tabagone.

27 Jope 33.11 O ni sa vesuka na yavaqu ena sinucodo;

Ka wanonova matua na noqu cavuikalawa kece,

Ka vakadigova na we ni yavaqu.

28Ena ka oqo, au sa karusa kina me vaka na kau vuca,

Me vaka na i sulu sa kania na sarasara.