Emosi 1 - Vakavakadewa Vou kei na iVola tale eso（FNVDC12）

Na Kalou kei na Veimatanitu

1 2Tui 15.1-7; 2Vei 26.1-23; 2Tui 14.23-29 Oqo na vosa i Emosi, e dua na i vakatawanisipi mai na koro o Tikoa. Ni vo koto e rua na yabaki me yaco mai kina na uneune, ka donuya oqo na gauna e se tui Juta tiko kina o Usaia ka tui Isireli tiko kina o Jeropoama na luve i Joasa, a sa vakatakila kina na Kalou vei Emosi na veika kece sara oqo me baleti Isireli.

2Joeli 3.16Sa kaya o Emosi,

“Sa tagi mai Saioni me vaka na laione o Jiova;

Sa vakuru na domona mai Jerusalemi.

Sa mamaca mai na i kanakana ni sipi,

Ka sa raqosa na co e Ulu i Kameli.”

Na Cudru ni Kalou ki na Veivanua EsoO Siria

3 Aisea 17.1-3; Jere 49.23-27; Saka 9.1 A sa kaya o Jiova, “Me vaka ni sa veibinibini tikoga na nodra i valavala ca na kai Tamasiko, au sa na cudruvi ira kina. Era a vakatotogani ira sara vakaca na kai Kiliati ena i vakarau veivakalolomataki.

4O koya oqo au na vakama kina ena bukawaqa na vale vakaturaga ka a tara o Eseeli na tui, ka'u na vakama na i drodro ni valu i Penietati na tui.

5Au basuraka na i sogo ni matamata kei Tamasiko, ka vagalalataki ira tani na tamata era sa tiko ena Buca o Eveni kei koya na tui ni Pecieteni. O ira na kai Siria era na kau yani vakabobula ki na vanua o Kiri.”

O Filisitia

6 Aisea 14.29-31; Jere 47.1-7; Isi 25.15-17; Joeli 3.4-8; Sefa 2.4-7; Saka 9.5-7 Sa kaya vakaoqo o Jiova: “Me vaka ni ra sa ia tikoga na i valavala ca o ira na kai Qasa, ena ka oqo ka'u na cudruvi ira kina. Era a kauta vakavesu e dua na matanitu taucoko ka volitaki ira ki Itomi me ra nodra bobula.

7Au na tala kina na bukawaqa ki na bainikoro ka vakama na kena veitikotiko ni valu kaukauwa.

8Au na vagalalataki ira tani na veiliutaki ena koro o Asitoti kei Asikiloni. Au na cudruva na koro o Ekironi, ka ra na mate kina na nodra vo-ni-bula na kai Filisitia.”

O Taia

9 Aisea 23.1-18; Isi 26.1–28.19; Joeli 3.4-8; Saka 9.1-4; Maciu 11.21,22; Luke 10.13,14 A sa kaya o Jiova, “Me vaka ni ra sa ia tikoga na i valavala ca na kai Taia, au sa na cudruvi ira kina ena veika oqo. Era a kauta yani vakavesu e dua na matanitu taucoko ki na nodra vanua na kai Itomi, ka ra sega ni maroroya na nodra veiyalayalati ni veitokani era a dregata vata.

10O koya oqo ka'u na tala kina na bukawaqa ki na bai kei Taia, ka vakama na veitikotiko ni valu kaukauwa.”

O Itomi

11 Aisea 34.5-17; 63.1-6; Jere 49.7-22; Isi 25.12-14; 35.1-15; Ope 1-14; Mala 1.2-5 A sa kaya o Jiova, “Era sa ia tikoga na i valavala ca o ira na kai Itomi, ia ena ka oqo ka'u na cudruvi ira kina. Era a vakasasataki ira na Isireli na wekadra voleka, sa tabu loloma vei ira. Sa sega ni vakaiyalayala na nodra cudru, ka ra sega ni bau yalovinaka vakalailai.

12O koya oqo ka'u na tala kina na bukawaqa ki Timani; ena kania na veitikotiko ni valu kaukauwa kei Posira.”

O Ira na Amoni

13 Jere 49.1-6; Isi 21.28-32; 25.1-7; Sefa 2.8-11 A sa kaya o Jiova, “Me vaka ni sa wasoma na nodra cala na kai Amoni, au na sega ni vakasuka na noqu cudru. Era tunatunalaki ira na yalewa bukete ni Kiliati, me rawa kina ni ra tosoya na i yalayala ni nodra vanua.

14Ia ka'u na vakacaudreva na buka ena bai mai Rapa, me na vakama na kena veitikotiko ni valu kaukauwa. Ena ia na qoqolou ena siga ni valu, ka na laba na cagi me vaka na covulaca.

15Ena kau vakabobula na nodra tui, kei ira na nodra turaga,” sa kaya o Jiova.