Siraki 47 - Vakavakadewa Vou kei na iVola tale eso（FNVDC12）

Necani

1 2Samu 7.2,3; 12.1 A taravi koya me parofisai o Necani e na gauna i Tevita.

Tevita

2 1Samu 17.34–18.7; 2Samu 5.7; 8.1; 12.13 Na digitaki nei Tevita mai vei ira na luve i Isireli, e vaka na digitaki ni uro mai na isoro ni veisaututaki.

3A qito vata kei ira na laione me vaka era luve ni me, kei ira na bea me vaka na luve ni sipi.

4A sega li ni yavita na tuawa ni se gone me kua ni vakamaduataki ira na tamata

e na nona raboti Koliaci me tinia na nona vosa dokadoka?

5A kerea na Turaga na Cecere Sara mani soli e ligana imatau na kaukaua

me vakamatea kina na qaqa ni ivalu, me rokovi kina na kaukaua ni nona matatamata.

6Era mani vakalagilagi koya e na nona vakamatea e tini na udolu, ra vakacaucautaki koya ni sa digitaki koya na Turaga me buli me nodra tui.

7A vakawabokotaki ira na kena meca e na veiyasana kece, butuqaqi ira vakadua na kena meca na kai Filisitia.

8E na veika kece a cakava, a dau vakavinavinakataka vakacaucautaka na Kalou yalosavasava, na Cecere Sara e na veivakalagilagi;

a laga sere vua e yalona taucoko, lomani koya dina a buli koya.

9A tuvani ira e mata ni yaletare na daulagasere mera lagata kina na sere rogorogo vinaka.

10A vakarautaka na solevu mera maqosa sara, tuvana na kedra dui gauna e loma ni yabaki,

me qai vakacaucautaki kina na yaca tabu ni Kalou, voqa tu ga e na vale tabu na sere, tekivu sara e na veimataka lailai.

11E a bokoca na Turaga na nona ivalavalaca, vakadeitaka tawamudu na nona sau,

a yalataka vua na itutu vakatui kei na itutu lagilagi e Isireli.

Solomoni

12A cabeta na itutu vakatui me sosomitaki koya na luvena vuku, sa vakarautaka vinaka oti tu o Tevita na tamana na veika baleti koya.

13 1Tui 4.21-32 A veiliutaki o Solomoni e na gauna maravu, qai solia na Kalou vua me galala e na veiyasana kece,

me tara kina nona vale, na vale tabu me tu tawamudu.

14Sa mai levu nomu vuku nio se cauravou! Nomu kilaka a vuabale vaka na uciwai.

15A robota na vuravura na yalomu, o vakasinaita e na vosa vakaibalebale kei na iba.

16Kemu irogorogo a teteva na veiyanuyanu ciriyawa, o lomani e na sautu o vakatubura.

17Era qoroi iko na veivanua e na nomu same, vosa vakaibalebale, vosa vakatautauvata, kei na nomu ivakavakadewa.

18 1Tui 10.21,27 E na yaca ni Turaga na Kalou, o koya e vakatokai na Kalou ni Isireli,

o a kumuni koula me vaka na kava, na siliva me vaka na uma.

19 1Tui 11.1 Ia na vu ni nomu lutu na nomu gagano.

20O vakarogorogocataka na yacamu kei ira na nomu kawa,

vakavuna mera cudruvi na luvemu, ra rarawataka na nomu cala.

21 1Tui 12.15-20 Sa kavida kina na vanua, basika vei Efereimi na matanitu talaidredre.

22 2Samu 7.15 Ia e na dauloloma tu ga na Turaga, e na sega ni laiva me rusa na nona cakacaka;

e na sega ni bokoci ira na kawa ni nona tamata digitaki se vakawabokotaka na kawa nei koya a lomani koya;

a mani solia me vo na kawa i Jekope, me bula na kawa i Tevita.

Reopoama kei Jeropoama

23 1Tui 11.43; 12.10-30; 2Tui 17.6,18 A lai vakacegu o Solomoni vata kei ira na tubuna, biuta tu mai e dua na luvena

e levu nona lialia, lailai nona yalomatua, o Reopoama, nona ivakarau ni veiliutaki a vakavuna mera vorati koya na lewenivanua.

O Jeropoama tale ga na luve i Nevati a vakavuna mera valavalaca na Isireli, dusia vei Efereimi e dua na sala ca.

24Sa vuabale sara na nodra ivalavalaca, vakavuna mera kau tani vakabobula mai nodra vanua,

25nira qara na ivakarau ca kece me yacova ni sa saumi vei ira na nodra ivalavala.